IPL ୨୦୨୭ ପୂର୍ବରୁ ବଡ଼ ଚର୍ଚ୍ଚା, ପଞ୍ଜାବ ଯିବେ ହାର୍ଦ୍ଦିକ, ମୁମ୍ୱାଇ ଆସିବେ ଅର୍ଶଦୀପ
ନନ୍ଦିଘୋଷବ୍ୟୁର: ଆଇପିଏଲ୍ ୨୦୨୭ ସିଜିନ୍ ପୂର୍ବରୁ କ୍ରିକେଟ୍ ଜଗତରେ ଏକ ବଡ଼ ଟ୍ରେଡ୍କୁ ନେଇ ଚର୍ଚ୍ଚା ଜୋର ଧରିଛି। ମୁମ୍ବାଇ ଇଣ୍ଡିଆନ୍ସର ହାତ ଛାଡ଼ି ପଞ୍ଜାବ କିଙ୍ଗସ୍ରେ ସାମିଲ ହୋଇପାରନ୍ତି ଷ୍ଟାର୍ ଅଲରାଉଣ୍ଡର୍ ହାର୍ଦ୍ଦିକ ପାଣ୍ଡ୍ୟା। ଯଦି ଏହି ଟ୍ରେଡ୍ ଚୂଡ଼ାନ୍ତ ହୁଏ, ତେବେ ଆଇପିଏଲ୍ ଇତିହାସର ଅନ୍ୟତମ ବଡ଼ ଖେଳାଳି ଅଦଳବଦଳ ହେବ।
ସୂଚନେ ଅନୁସାରେ, ମୁମ୍ବାଇ ଇଣ୍ଡିଆନ୍ସ ଓ ପଞ୍ଜାବ କିଙ୍ଗସ୍ର ଶୀର୍ଷ ପରିଚାଳନା ମଧ୍ୟରେ ଏହି ଟ୍ରେଡ୍କୁ ନେଇ ପ୍ରାୟ ସହମତି ହୋଇସାରିଛି। ପ୍ରସ୍ତାବିତ ଟ୍ରେଡ୍ ଅନୁସାରେ, ହାର୍ଦ୍ଦିକଙ୍କ ବଦଳରେ ମୁମ୍ବାଇ ଇଣ୍ଡିଆନ୍ସକୁ ଆସିପାରନ୍ତି ପଞ୍ଜାବର ଷ୍ଟାର୍ ବୋଲର୍ ଅର୍ଶଦୀପ ସିଂହ ଏବଂ ୱିକେଟ୍କିପର୍ ବ୍ୟାଟର୍ ବିଷ୍ଣୁ ବିନୋଦ। ନଭେମ୍ବର ୧୭ ତାରିଖର ରିଟେନ୍ସନ୍ ଡେଡଲାଇନ୍ ପୂର୍ବରୁ ଏହାର ଆବଶ୍ୟକୀୟ କାଗଜପତ୍ର ଆଇପିଏଲ୍ କର୍ତ୍ତୃପକ୍ଷଙ୍କ ନିକଟରେ ଦାଖଲ ହୋଇପାରେ।
ଏହି ଟ୍ରେଡ୍ ଚୂଡ଼ାନ୍ତ ହେଲେ ମୁମ୍ବାଇ ଇଣ୍ଡିଆନ୍ସ ସହ ହାର୍ଦ୍ଦିକଙ୍କ ଦ୍ୱିତୀୟ ଇନିଂସ୍ ର ଅନ୍ତ ଘଟିବ। ଏଥିସହ ପଞ୍ଜାବ କିଙ୍ଗସ୍ର ମୁଖ୍ୟ କୋଚ୍ ରିକି ପଣ୍ଟିଂଙ୍କ ସହ ପୁଣି ଏକାଠି କାମ କରିବାର ସୁଯୋଗ ପାଇବେ ହାର୍ଦ୍ଦିକ।
କାହିଁକି ହାର୍ଦ୍ଦିକଙ୍କୁ ଛାଡ଼ିବାକୁ ଚାହୁଁଛି ମୁମ୍ବାଇ?
୨୦୨୪ ଆଇପିଏଲ୍ ପୂର୍ବରୁ ଗୁଜରାଟ ଟାଇଟନ୍ସରୁ ମୁମ୍ବାଇ ଇଣ୍ଡିଆନ୍ସକୁ ଫେରିଥିଲେ ହାର୍ଦ୍ଦିକ। ଏହାପରେ ତାଙ୍କୁ ଦଳର ଅଧିନାୟକ ଦାୟିତ୍ୱ ମିଳିଥିଲା। ସେ ରୋହିତ ଶର୍ମାଙ୍କ ସ୍ଥାନ ନେଇଥିଲେ। ହେଲେ ଅଧିନାୟକ ଭାବେ ତାଙ୍କ ଦ୍ୱିତୀୟ ଇନିଂସ୍ ସେତେଟା ସଫଳ ହୋଇପାରିନଥିଲା । ତିନୋଟି ସିଜିନ୍ ମଧ୍ୟରୁ ମାତ୍ର ଥରେ ହିଁ ମୁମ୍ବାଇ ପ୍ଲେଅଫ୍ରେ ପହଞ୍ଚିବାରେ ସଫଳ ହୋଇଛି।
ଅନ୍ୟପଟେ ଦଳରେ ଜଣେ ଭଲ ଭାରତୀୟ ବାମହାତୀ ଦ୍ରୁତ ବୋଲର୍ଙ୍କ ଆବଶ୍ୟକତା ରହିଛି। ଏହି ଦୃଷ୍ଟିରୁ ଅର୍ଶଦୀପ ସିଂହ ମୁମ୍ବାଇ ପାଇଁ ଏକ ବଡ଼ ବିକଳ୍ପ ହୋଇପାରନ୍ତି। ଯଶପ୍ରୀତ ବୁମ୍ରାଙ୍କ ସହ ଅର୍ଶଦୀପଙ୍କ ଯୋଡ଼ି ପାୱାରପ୍ଲେ ଏବଂ ଡେଥ୍ ଓଭର୍ରେ ଦଳର ବୋଲିଂକୁ ଆହୁରି ମଜଭୁତ କରିପାରିବ।
କାହିଁକି ହାର୍ଦ୍ଦିକଙ୍କୁ ଚାହୁଁଛି ପଞ୍ଜାବ କିଙ୍ଗସ୍?
ସେପଟେ ପଞ୍ଜାବ କିଙ୍ଗସ୍ ପାଇଁ ହାର୍ଦ୍ଦିକ ଜଣେ ଅଭିଜ୍ଞ ଭାରତୀୟ ଅଲରାଉଣ୍ଡର୍ ଭାବେ ଦଳର ବ୍ୟାଟିଂ ଓ ବୋଲିଂ ଉଭୟ ବିଭାଗକୁ ଶକ୍ତିଶାଳୀ କରିପାରିବେ। ଏହାସହ ତାଙ୍କର ଅଧିନାୟକତ୍ୱ ଅଭିଜ୍ଞତା ମଧ୍ୟ ଦଳ ପାଇଁ ଲାଭଦାୟକ ହୋଇପାରେ। ୨୦୨୨ରେ ଗୁଜରାଟ ଟାଇଟନ୍ସ ପ୍ରଥମ ଥର ଆଇପିଏଲ୍ ଖେଳି ହାର୍ଦ୍ଦିକଙ୍କ ନେତୃତ୍ୱରେ ଚାମ୍ପିୟନ୍ ହୋଇଥିଲା। ଏହାପରେ ୨୦୨୩ରେ ମଧ୍ୟ ଦଳକୁ ଫାଇନାଲ୍ରେ ପହଞ୍ଚାଇଥିଲେ ହାର୍ଦ୍ଦିକ ।
ତେବେ ହାର୍ଦ୍ଦିକ ପଞ୍ଜାବ ଦଳକୁ ଆସିଲେ ମଧ୍ୟ ଅଧିନାୟକ ପରିବର୍ତ୍ତନ ହେବାର ସମ୍ଭାବନା କମ୍ ଅଛି। IPL 2027ରେ ଶ୍ରେୟସ ଆୟର ହିଁ ପଞ୍ଜାବ କିଙ୍ଗସ୍ର ନେତୃତ୍ୱ ନେବେ ବୋଲି ଆଶା କରାଯାଉଛି। ତେବେ ଏହି ବଡ଼ ଟ୍ରେଡ୍ କୁ ନେଇ ଏବେ କ୍ରିକେଟ୍ ପ୍ରେମୀଙ୍କ ନଜର ରହିଛି ମୁମ୍ବାଇ ଓ ପଞ୍ଜାବ ଫ୍ରାଞ୍ଚାଇଜ୍ ର ପରବର୍ତ୍ତୀ ନିଷ୍ପତ୍ତି ଉପରେ।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ nandighosha-tv-ନନ୍ଦିଘୋଷ-ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
Odisha Press & Media
Learn Data Science & Analytics at IAIAC.IN
Learn in-demand data skills with hands-on projects and mentor support.
