Funeral: ଇରାନରେ ଅଲ୍ଲୀ ଖେମିନିଙ୍କ ଛଅଦିନିଆ ଅନ୍ତ୍ୟେଷ୍ଟି ପାଇଁ ଦେଶବ୍ୟାପୀ ସୁରକ୍ଷା ବ୍ୟବସ୍ଥା
ତେହେରାନ: ଇରାନରେ ଆୟାତୋଲ୍ଲା ଅଲ୍ଲୀ ଖେମିନିଙ୍କ ଛଅଦିନିଆ ରାଷ୍ଟ୍ରୀୟ ଅନ୍ତ୍ୟେଷ୍ଟି ଜୁଲାଇ ୪ରୁ ୯ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେଉଛି। ଏହି ଅବସରରେ ଇରାନ ସରକାର ଦେଶବ୍ୟାପୀ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରିଛନ୍ତି। ଏହି କାର୍ଯ୍ୟକ୍ରମରେ ପ୍ରାୟ ୨ କୋଟି ଶୋକାକୁଳ ଲୋକ ଯୋଗଦେଉଥିବା ଅନୁମାନ କରାଯାଉଛି, ଯାହା ଇତିହାସର ଏକ ବଡ଼ ସାର୍ବଜନୀନ ସମାବେଶ ଭାବେ ଗଣ୍ୟ ହେଉଛି। ଏହା ସହିତ ଭାରତ ସମେତ ୩୦ଟି ଦେଶର ପ୍ରତିନିଧି, ଉଚ୍ଚସ୍ତରୀୟ ନେତା ଓ ଅନ୍ତର୍ଜାତୀୟ ଅତିଥିମାନେ ମଧ୍ୟ ଏହି ଶୋକ ଅନୁଷ୍ଠାନରେ ଅଂଶଗ୍ରହଣ କରୁଛନ୍ତି।
ସରକାରୀ ସୂଚନା ଅନୁଯାୟୀ, ଏହି ଅନ୍ତ୍ୟେଷ୍ଟି କାର୍ଯ୍ୟକ୍ରମ ଛଅ ଦିନ ଧରି ଚାଲିବ। ପ୍ରଥମ ଦିନରେ ତେହରାନର ମୁଖ୍ୟ ଧାର୍ମିକ କେନ୍ଦ୍ରରେ ସାର୍ବଜନୀନ ଶ୍ରଦ୍ଧାଞ୍ଜଳି କାର୍ଯ୍ୟକ୍ରମ ଆୟୋଜିତ ହୋଇଛି। ପରବର୍ତ୍ତୀ ଦିନଗୁଡ଼ିକରେ ଶୋଭାଯାତ୍ରା ମାଧ୍ୟମରେ ତାଙ୍କ ମୃତଦେହକୁ ବିଭିନ୍ନ ସହର ଦେଇ ଶେଷ ସମାଧିସ୍ଥଳକୁ ନିଆଯିବ। ଶେଷ ଦିନରେ ଧାର୍ମିକ ରୀତିନୀତି ସହ ଦଫନ (ଶବ ପୋତିବା) କାର୍ଯ୍ୟ ସମ୍ପନ୍ନ ହେବ।
Iran:ଖେମିନିଙ୍କ ଶେଷକୃତ୍ୟ ପାଇଁ ନିତିନ ନବୀନ, ଖଡ଼ଗେ ନିମନ୍ତ୍ରିତ
ତେହେରାନ ସହର ସମେତ ଦେଶର ପ୍ରମୁଖ ଅଞ୍ଚଳଗୁଡ଼ିକରେ ସୁରକ୍ଷା ବଳକୁ ଉଚ୍ଚ ସତର୍କତାରେ ରଖାଯାଇଛି। ପୁଲିସ, ସେନା ଓ ରିଭଲ୍ୟୁସନାରୀ ଗାର୍ଡ ମିଳିତ ଭାବେ ଶବଯାତ୍ରା ମାର୍ଗରେ ତିନିସ୍ତରୀୟ ସୁରକ୍ଷା ବଳୟ ଗଠନ କରିଛନ୍ତି। ଡ୍ରୋନ୍ ଓ ସିସିଟିଭି ନିରୀକ୍ଷଣ ସହ ଭିଡ଼ ନିୟନ୍ତ୍ରଣ ଟିମ୍ମାନେ ନିରନ୍ତର ନଜର ରଖୁଛନ୍ତି। ଭିଡ଼ ଅତ୍ୟଧିକ ହେବା ଆଶଙ୍କାରେ କିଛି ସହରରେ ଯାତାୟାତ ନିୟମ ମଧ୍ୟ କଡ଼ା କରାଯାଇଛି। ଶବଯାତ୍ରାରେ ଭାଗ ନେବାକୁ ଲୋକମାନେ ଦେଶର ବିଭିନ୍ନ ପ୍ରାନ୍ତରୁ ଆସିଛନ୍ତି। ଅନେକ ଲୋକ ରାସ୍ତାରେ ରାତି କାଟୁଛନ୍ତି ଏବଂ ସରକାରଙ୍କ ପକ୍ଷରୁ ଅସ୍ଥାୟୀ ଆଶ୍ରୟ, ଖାଦ୍ୟ ଓ ପାଣିର ବ୍ୟବସ୍ଥା କରାଯାଇଛି। ଧାର୍ମିକ ସଂଗଠନଗୁଡ଼ିକ ମଧ୍ୟ ସ୍ୱେଚ୍ଛାସେବକ ମାଧ୍ୟମରେ ସହାୟତା ପ୍ରଦାନ କରୁଛନ୍ତି। ଶେଷ ଦିନରେ ଦଫନ ପରେ ରାଷ୍ଟ୍ରୀୟ ଶୋକ ସମାପ୍ତ ହେବ ଏବଂ ଇରାନ ଧୀରେ ଧୀରେ ସାଧାରଣ ଜୀବନକୁ ଫେରିବା ପ୍ରକ୍ରିୟା ଆରମ୍ଭ କରିବ।
