Chandrika Death Case କାଠଯୋଡ଼ିରୁ ଡାକ୍ତରୀ ଛାତ୍ରୀଙ୍କ ମୃତଦେହ ମିଳିବା ଘଟଣା: ଓଏଏସ୍‌ ପୁରୁଷ ବନ୍ଧୁ ଗିରଫ

କଟକ: କାଠଯୋଡ଼ିରୁ ଡାକ୍ତରୀ ଛାତ୍ରୀ ଚନ୍ଦ୍ରିକା ହେମ୍ବ୍ରମଙ୍କ ମୃତଦେହ ମିଳିବା ଘଟଣାରେ ପୁଲିସ ତାଙ୍କ ପୁରୁଷ ବନ୍ଧୁ ଭୀମସେନ ଟୁଡ଼ୁଙ୍କୁ ମୟୂରଭଞ୍ଜରୁ ଗିରଫ କରିଛି। ତାଙ୍କୁ ବାରଙ୍ଗ ଥାନାକୁ ଅଣାଯାଉଥିବା ବେଳେ ଆସନ୍ତାକାଲି ତାଙ୍କୁ କୋର୍ଟଚାଲାଣ କରାଯିବ ବୋଲି ସୂଚନା ମିଳିଛି। ତ୍ରିକୋଣୀୟ ପ୍ରେମ ସମ୍ପର୍କରୁ ଚନ୍ଦ୍ରିକା କାଠଯୋଡ଼ିକୁ ଡ଼େଇଁ ଆତ୍ମହତ୍ୟା କରିଥିଲେ। ସେ ତାଙ୍କର ପିଲାଦିନର ବନ୍ଧୁ ଭୀମସେନଙ୍କୁ ପ୍ରେମ କରୁଥିଲେ। ତେବେ ଭୀମସେନଙ୍କ ଜୀବନରେ ଆଉ ଜଣେ ଯୁବତୀ ଆସିଥିଲେ। ଏହି ଘଟଣାକୁ ନେଇ ଚନ୍ଦ୍ରିକା ଓ ଭୀମସେନଙ୍କ ମଧ୍ୟରେ ଫାଟ ସୃଷ୍ଟି ହୋଇଥିଲା। ଚନ୍ଦ୍ରିକାଙ୍କ ମା’ ବାରଙ୍ଗ ଥାନାରେ ଭୀମସେନ ଓ ତାଙ୍କ ଦ୍ବିତୀୟ ପ୍ରେମିକାଙ୍କ ବିରୋଧରେ ଅଭିଯୋଗ କରିଥିଲେ। ତାଙ୍କ ଝିଅର ମୃତ୍ୟୁ ପାଇଁ ଉଭୟ ଦାୟୀ ବୋଲି ଉଲ୍ଲେଖ କରିଥିଲେ। ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଥିଲା।

ସୂଚନା ଥାଉ କି, ମୟୂରଭଞ୍ଜ ଉଦଳା ଅଞ୍ଚଳର ଚନ୍ଦ୍ରିକା ବାଲେଶ୍ବର ଜିଲ୍ଲା ଫକିରମୋହନ ମେଡିକାଲ୍ କଲେଜର ଏମବିବିଏସ ତୃତୀୟ ବର୍ଷ ଛାତ୍ରୀ ଥିଲେ। ସ୍ଥାନୀୟ ଅଞ୍ଚଳର ଭୀମସେନଙ୍କ ସହ ଏକାଠି ପଢ଼ୁଥିଲେ। ପାଖାପାଖି ୧୫ ବର୍ଷ କାଳ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ରହିଥିଲା। ଚନ୍ଦ୍ରିକା ଡାକ୍ତରୀ ପଢ଼ିବାକୁ ବାଲେଶ୍ବର ଚାଲିଗଲେ। ଭୀମସେନ ମଧ୍ୟ ଗାଁରୁ ଭୁବନେଶ୍ବର ଚାଲି ଆସିଲେ। ଭୁବନେଶ୍ବରରେ ରହିବା ବେଳେ ଭୀମସେନ ଆଉ ଜଣେ ଯୁବତୀଙ୍କୁ ଭଲ ପାଇ ବସିଲେ। ଭୀମସେନ ଓଡ଼ିଶା ଟ୍ୟାକ୍ସେସନ ଆଣ୍ଡ ଆକାଉଣ୍ଟସ ସର୍ଭିସ ପାଇବା ସହିତ ଚାକିରି ପୂର୍ବ ଟ୍ରେନିଂରେ ଥିଲେ। ଭୀମସେନ ପ୍ରତାରଣା କରିବାରୁ ଏଥିରେ ମାନସିକ ସ୍ତରରେ ଭାଙ୍ଗିପଡ଼ି ଚନ୍ଦ୍ରିକା ଆତ୍ମହତ୍ୟା କରିଥିବା ସଂପର୍କରେ ଥାନାରେ ଅଭିଯୋଗ ହୋଇଥିଲା।