Brij Bhushan Singh Acquitted: ଯୌନ ନିର୍ଯାତନା ମାମଲାରେ ବ୍ରିଜ ଭୂଷଣ ସିଂହଙ୍କୁ ଦିଲ୍ଲୀ କୋର୍ଟରୁ କ୍ଲିନ୍ ଚିଟ୍

୬ ଜଣ ମହିଳା କୁସ୍ତିଯୋଦ୍ଧାଙ୍କ ଦ୍ୱାରା ଦାଖଲ ହୋଇଥିବା ଯୌନ ନିର୍ଯାତନା ମାମଲାରେ ପୂର୍ବତନ ରେସଲିଂ ଫେଡେରେସନ୍ ଅଫ୍ ଇଣ୍ଡିଆ (WFI) ଅଧ୍ୟକ୍ଷ  ବ୍ରିଜ ଭୂଷଣ ଶରଣ ସିଂହଙ୍କୁ ଦିଲ୍ଲୀର ଏକ କୋର୍ଟ ନିର୍ଦ୍ଦୋଷ ଘୋଷଣା କରିଛନ୍ତି। ଏହି ମାମଲାରେ ଦୁଇ ବର୍ଷ ଧରି ଚାଲିଥିବା ବିଚାର ପ୍ରକ୍ରିୟା ପରେ କୋର୍ଟ ଏହି ରାୟ ଦେଇଛନ୍ତି।

ଛଅ ଜଣ ମହିଳା କୁସ୍ତିଯୋଦ୍ଧା ବ୍ରିଜ ଭୂଷଣ ସିଂହ ଏବଂ WFIର ପୂର୍ବତନ ସଚିବ ବିନୋଦ ତୋମରଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିଥିଲେ। ରାଉଜ୍ ଆଭେନ୍ୟୁ କୋର୍ଟର ଅତିରିକ୍ତ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ୍ (CJM) ଅଶ୍ୱିନୀ ପନୱାର ଏହି ମାମଲାରେ ବ୍ରିଜ ଭୂଷଣ ସିଂହ ଏବଂ ବିନୋଦ ତୋମରଙ୍କୁ ଦୋଷମୁକ୍ତ କରିଛନ୍ତି।

ଜୁଲାଇ ୨ ତାରିଖରେ କୋର୍ଟ ରାୟ ସଂରକ୍ଷିତ ରଖିଥିଲେ। ଏହା ସହିତ ଉଭୟ ପକ୍ଷର ଓକିଲଙ୍କୁ ଦୁଇ ସପ୍ତାହ ମଧ୍ୟରେ ଲିଖିତ ଯୁକ୍ତି ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଥିଲେ।

ବ୍ରିଜ ଭୂଷଣ ସିଂହଙ୍କ ବିରୋଧରେ ଭାରତୀୟ ଦଣ୍ଡ ସଂହିତା (IPC)ର ଧାରା ୩୫୪ (ମହିଳାଙ୍କ ମର୍ଯ୍ୟାଦା ଭଙ୍ଗ କରିବା ଉଦ୍ଦେଶ୍ୟରେ ଆକ୍ରମଣ କିମ୍ବା ବଳ ପ୍ରୟୋଗ), ୩୫୪A (ଯୌନ ନିର୍ଯାତନା) ଏବଂ ୫୦୬(୧) (ଅପରାଧିକ ଧମକ) ଅନୁସାରେ ଅଭିଯୋଗ ରହିଥିଲା। ଅଭିଯୁକ୍ତ ବିନୋଦ ତୋମରଙ୍କ ବିରୋଧରେ କେବଳ ଅପରାଧିକ ଧମକ ଦେବା ଅଭିଯୋଗ ରହିଥିଲା। ଏହି ଧାରାଗୁଡ଼ିକରେ ସର୍ବାଧିକ ୫ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡର ବ୍ୟବସ୍ଥା ରହିଛି।

କ’ଣ ଥିଲା ମାମଲା?

୨୦୨୩ ଜାନୁଆରୀରେ ଦିଲ୍ଲୀର ଜନ୍ତର ମନ୍ତରରେ ଅନେକ ଜଣାଶୁଣା ମହିଳା କୁସ୍ତିଯୋଦ୍ଧା ଦୀର୍ଘ ସମୟ ଧରି ବିକ୍ଷୋଭ କରିଥିଲେ। ସେମାନେ ବ୍ରିଜ ଭୂଷଣ ସିଂହଙ୍କ ବିରୋଧରେ ବର୍ଷ ବର୍ଷ ଧରି ମହିଳା କୁସ୍ତିଯୋଦ୍ଧାଙ୍କୁ ଯୌନ ନିର୍ଯାତନା ଦେଇଥିବା ଅଭିଯୋଗ ଆଣି ତାଙ୍କ ଗିରଫ ଏବଂ ଫେଡେରେସନ୍‌ରୁ ହଟାଇବା ଦାବି କରିଥିଲେ।

ବ୍ରିଜ ଭୂଷଣ ସିଂହ ଉତ୍ତର ପ୍ରଦେଶର କୈସରଗଞ୍ଜର ପୂର୍ବତନ ବିଜେପି ସାଂସଦ ଥିଲେ। ଅଭିଯୋଗ ପରେ ତାଙ୍କୁ ରେସଲିଂ ଫେଡେରେସନ୍ ଅଧ୍ୟକ୍ଷ ପଦରୁ ହଟାଯାଇଥିଲା। ତାଙ୍କ ଘନିଷ୍ଠ ସହଯୋଗୀ ବିନୋଦ ତୋମରଙ୍କୁ ମଧ୍ୟ ଅଭିଯୋଗ ପରେ ନିଲମ୍ବିତ କରାଯାଇଥିଲା।