Agriculture: କୃଷି ସଚିବ ଆସିବେ ଏସିଆ ମହାଦେଶର ସର୍ବବୃହତ୍ ସୁକିନ୍ଦା ବିହନ ଫାର୍ମ

"କାଳିଆପାଣି (ରବି ନାରାୟଣ କର): ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତୀକରଣ ବିଭାଗ ଆୟୁକ୍ତ ତଥା ସଚିବ ସଚିନ ରାମଚନ୍ଦ୍ର ଯାଦବ ଆସନ୍ତାକାଲି ଦାମୋଦରପୁରସ୍ଥିତ ସୁକିନ୍ଦା ବିହନ ଉତ୍ପାଦନ କ୍ଷେତ୍ର ଓ ଏହା ସଂଲଗ୍ନ ଉଦ୍ୟାନକୃଷି କ୍ଷେତ୍ର ପରିଦର୍ଶନ କରି ମୌସୁମୀ ଋତୁରେ ଖରିଫ୍‌ ଚାଷ ସମୀକ୍ଷା କରିବେ ବୋଲି ଜିଲ୍ଲାପାଳଙ୍କ ଉଦ୍ଦେଶ୍ୟରେ ବିଭାଗୀୟ ବିଜ୍ଞପ୍ତି ନମ୍ବର ୪୨୨୦/୨୨-୦୭-୨୦୨୬ ପ୍ରକାଶ ପାଇଛି।

ପ୍ରଥମକରି କୃଷି ବିଭାଗ ସର୍ବୋଚ୍ଚ ପାହ୍ୟାର ଜଣେ ଅଧିକାରୀଙ୍କ ଏହି ଗସ୍ତକୁ ନେଇ ସାଧାରଣରେ ଉତ୍ସୁକତା ପ୍ରକାଶ ପାଇଛି।

ଶ୍ରୀହୀନ ହୋଇ ପଡ଼ି ରହିଥିବା ୬ଶହ ହେକ୍ଟର ବିଶିଷ୍ଟ ଏସିଆର ସର୍ବବୃହତ୍ ବିହନ ଫାର୍ମର ପୁନରୁଦ୍ଧାର ସମ୍ଭାବନା ଜାଗିଉଠିଛି।Advertisment ୧୯୪୮ ମସିହାରେ ପ୍ରତିଷ୍ଠା କରାଯାଇଥିବା ଏହି କୃଷିକ୍ଷେତ୍ର ୧୯୮୫ ମସିହା ପର୍ଯ୍ୟନ୍ତ ବିଶ୍ବସ୍ତରୀୟ ଥିଲା।

୩ ଶହ ହେକ୍ଟର ପାଖାପାଖି ଜମିରେ ଧାନ, ହରଡ଼, ଚିନାବାଦାମ, ମକା, ଧଣିଚା, ସୋରିଷ ଇତ୍ୟାଦି ଚାଷ ଓ ଫସଲ ଅମଳ କରାଯାଇ ଉନ୍ନତମାନର ବିହନ ସଂଗ୍ରହ କରାଯାଉଥିଲା।

ଏପରିକି ୧୯୮୦ ମସିହା ପୂର୍ବରୁ ସରକାର ଏଠାରେ ୪ ବର୍ଷ ଧରି ପରୀକ୍ଷାମୂଳକ ଭାବେ ଗଞ୍ଜେଇ ଚାଷକରି ଲାଭବାନ ହୋଇଥିଲେ।

ଅଶୋକଝର କ୍ଷୁଦ୍ର ଜଳସେଚନ ବିଭାଗ ଜଳାଶୟର ପାଣିକୁ ବ୍ୟବହାର କରାଯାଇ ଖରିଫ୍‌ ଫସଲ କରାଯାଉଥିଲା।

ଏଠାରେ ୨୦ ହଳ ବଡ଼ ବଳଦ ଦ୍ବାରା ହଳ କରାଯାଉଥିଲା।

ସୁଦୃଶ୍ୟ ଅଫିସ, ଗୋଦାମ ଘର ଓ ଗୁହାଳ ଆକର୍ଷଣର କେନ୍ଦ୍ର ଥିଲା।

ଟାଙ୍ଗରା ଭୂଇଁ ଜଳାଭାବ ପରିସ୍ଥିତି ପାଇଁ ଏଠାରେ ରବିଚାଷକୁ ଗୁରୁତ୍ବ ଦିଆଯାଉନଥିଲା।

୧୯୮୫ ମସିହା ପରେ ରକ୍ଷଣାବେକ୍ଷଣ ଅଭାବ, ପରିଚାଳନାଗତ ତ୍ରୁଟି ତଥା ବିଭାଗୀୟ ଉଦାସୀନତାରୁ ଏହି କୃଷିକ୍ଷେତ୍ର ପ୍ରଭାବିତ ହୋଇଥିଲା।

୧୯୯୫ ମସିହା ବେଳକୁ କୃଷିକର୍ମଣ ‌କ୍ଷେତ୍ର ୧୬୦ ହେକ୍ଟରକୁ ଖସି ଆସିଥିଲା।

ଖରିଫ୍‌ ଋତୁରେ ୬ ମାସ ପର୍ଯ୍ୟନ୍ତ ଦୁଧୁଯୋରୀ, ବନ୍ଧଗାଁ, ଲେମ୍ବୋ, ସୁକିନ୍ଦାଗଡ଼, କୁହିକା, ପିମ୍ପୁଡ଼ିଆ ପଞ୍ଚାୟତର ୩୫୦ ରୁ ୪ ଶହ ଶ୍ରମିକ ନିୟୋଜିତ ହେଉଥିଲେ।

ଫେବ୍ରୁଆରି ମାସରୁ ଜୁନ ମାସ ପର୍ଯ୍ୟନ୍ତ ବିହନ ପ୍ରସ୍ତୁତି କାର୍ଯ୍ୟରେ ୬୦ ରୁ ଅଧିକ ଶ୍ରମିକ କାମ କରୁଥିଲେ।

Turmeric and rice: ହଳଦୀ ଓ ଧାନ ବିକି ଗାଁ"କୁ ରାସ୍ତା ନିର୍ମାଣ: ଉଦାହରଣ ସୃଷ୍ଟି କଲେ ଚାଷୀ ପବିତ୍ର  ୨୦୧୪ ମସିହାରେ ଗୁହାଳରେ ଥିବା ଶେଷ ବଳଦର ମୃତ୍ୟୁ ହୋଇଥିଲା।

ପୂର୍ବରୁ ଏଠାରେ ଭଲ ଶାଳ ଜଙ୍ଗଲ ଟିଏ ଥିଲା।

ହେଲେ ସ୍ଥାନୀୟ କାଠ ମାଫିଆଙ୍କ ପ୍ରାଦୁର୍ଭାବରୁ ଜଙ୍ଗଲରେ ଏକ ଭଲ ଜଙ୍ଗଲୀ ଗଛଟିଏ ଦେଖାଯିବା ବିରଳ।

ଏଠାରେ ୩୦ ହେକ୍ଟର ଜମିରେ ଅର୍ଜୁନ ଗଛର ଜଙ୍ଗଲ ସୃଷ୍ଟି କରାଯାଇଛି।

ରେଙ୍ଗାଲି ବାମ କେନାଲ ଓ ଗୋଟିଏ ଆଇଟିଆଇ ପ୍ରତିଷ୍ଠାନ ପାଇଁ ଫାର୍ମର ଚାଷ ଜମି ୧୧୦ ହେକ୍ଟରକୁ ସଂକୁଚିତ ହୋଇଥିଲା।

ସେହିପରି ଉଦ୍ୟାନକୃଷି ବିଭାଗକୁ ୧୦୬ ହେକ୍ଟର ଜମି ହସ୍ତାନ୍ତର କରାଯାଇଛି।

୨୦୧୬ ମସିହାରେ ସରକାର ୩ ଶହ ହେକ୍ଟର ବିଶିଷ୍ଟ ଏହି ବୃହତ୍ ଫାର୍ମକୁ ନ୍ୟାସନାଲ ସିଡ୍‌ କର୍ପୋରେସନ(ଏନ୍‌ଏସ୍‌ସି)କୁ ହସ୍ତାନ୍ତର କରିଥିଲେ।

ଏହାକୁ ନେଇ ବିବାଦର ସୂତ୍ରପାତ ହୋଇଥିଲା।

କର୍ମନିଯୁକ୍ତି ହରାଇଥିବା ସ୍ଥାନୀୟ ଶ୍ରମିକମାନେ ଅବ୍ୟବସ୍ଥା ବିରୁଦ୍ଧରେ ଆନ୍ଦୋଳନ କରିଥିଲେ।

ଏନ୍‌ଏସ୍‌ସି ପକ୍ଷରୁ ଟେଣ୍ଡର ଆହ୍ବାନ କରାଯାଇ ଏକ ଅଣଓଡ଼ିଆ ସଂସ୍ଥାକୁ ଏହାର ପରିଚାଳନା ଦାୟିତ୍ବ ଦିଆଯାଇଥିଲା।

ଯାହାକି କମ୍ପାନି ପାଇଁ ବୁମେରାଂ ସାବ୍ୟସ୍ତ ହୋଇଥିଲା।

ବ୍ୟାପକ କ୍ଷତି ସହିବା କାରଣରୁ ୨୦୨୪ ମସିହା ଶେଷ ଭାଗରେ ଏନ୍‌ଏସ୍‌ସି କର୍ତ୍ତୃପକ୍ଷ ଏହି ଫାର୍ମକୁ ରାଜ୍ୟ ସରକାରଙ୍କୁ ହସ୍ତାନ୍ତର କରି ଦାୟତ୍ବରୁ ଓହରି ଯାଇଥିଲେ।

୩ ଶହ ହେକ୍ଟରରୁ ଅଧିକ କୃ‌ଷିକ୍ଷେତ୍ର ପତିତ ଅବସ୍ଥାରେ ରହିଛି।

"