୩ ପିଲର ପରେ ଠପ୍ ସେତୁ କାମ, ବିପଦରେ ନଈ ପାର ହେଉଛନ୍ତି କୁଶପଲ୍ଲୀବାସୀ

ନନ୍ଦିଘୋଷ ବ୍ୟୁରୋ : ଗଡୁଛି ଅବଧି, ଆଗଉନି ବ୍ରିଜ କାମ। ମାତ୍ର ୩ଟି ପିଲର ନିର୍ମାଣ କରି ଛୁ’ ମାରିଛି ଠିକାଦାର। ଫଳରେ ବିପଦପୂର୍ଣ୍ଣ ଭାବେ ନଈ ପାର ହେଉଛନ୍ତି ଲୋକେ। ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଦାମିଆ ବରବରା ପଞ୍ଚାୟତର କୁଶପଲ୍ଲୀ ଗାଁ ନିକଟରେ ବୋହିଯାଇଛି କୁଶପଲ୍ଲୀ ନଈ। ହେଲେ ନଈ ଉପରେ ନିର୍ମାଣ ହୋଇନି ବ୍ରିଜଟିଏ। ଫଳରେ ନଈରେ ପାଣି ଆସିଲେ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଆନ୍ତି ଗ୍ରାମବାସୀ। ଜରୁରୀ ସମୟରେ ନଈର ଏପଟୁ ସେପଟ ବନ୍ଧା ହୋଇଥିବା ଦଉଡ଼ି ହିଁ ପାଲଟେ ସେମାନଙ୍କ ସାହା ଭରସା।

୨୦୨୨-୨୩ ଆର୍ଥିକ ବର୍ଷରେ କୁଶପଲ୍ଲୀ ସେତୁ ନିର୍ମାଣ ପାଇଁ ୬ ଲକ୍ଷ ଟଙ୍କାର ବ୍ୟୟବରାଦ ହୋଇଥିଲା। ପରେ ଆଉ ୫ ଲକ୍ଷ ଟଙ୍କାର ଅନୁଦାନ ମିଳିଥିଲା। ହେଲେ ମାତ୍ର ୩ଟି ପିଲର ନିର୍ମାଣ କରି କାମ ଅଧାରେ ଛାଡ଼ି ଦେଇଛି ଠିକାଦାର। ଏବେ ପିଲର ଉପରେ ଗଛଲତା ମାଡ଼ିଗଲାଣି।

ସୂଚନା ଅନୁଯାୟୀ, ଗୋଟିଏ ବ୍ରିଜ ନିର୍ମାଣ ପାଇଁ ସର୍ବନିମ୍ନ ୩୦ରୁ ୩୫ ଲକ୍ଷ ଟଙ୍କାର ଅଟକଳ ହୋଇଥାଏ। ତେବେ କାହା ସ୍ୱାର୍ଥରେ ଏହି ବ୍ରିଜ ପାଇଁ ମାତ୍ର ୧୧ ଲକ୍ଷ ଟଙ୍କାର ଅନୁଦାନ ଯୋଗାଇ ଦିଆଯାଇଥିଲା? ଟଙ୍କା ହେରଫେର କଲା କିଏ? ଏହାର ତଦନ୍ତ ଦାବି କରିଛନ୍ତି ଗ୍ରାମବାସୀ।ଅନ୍ୟପଟେ, ଆସନ୍ତା ବର୍ଷେ ମଧ୍ୟରେ ବ୍ରିଜ ନିର୍ମାଣ କାମ ଶେଷ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ବିଡିଓ।