ରାହୁଲ ଗାନ୍ଧୀ ଦେଶର ଯୁବପିଢ଼ିଙ୍କୁ ବିଭ୍ରାନ୍ତ କରୁଛନ୍ତି : ଧର୍ମେନ୍ଦ୍ର
ନୂଆଦିଲ୍ଲୀ: ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଦେଶର ଯୁବପିଢ଼ି ଏବଂ ବିଶେଷ କରି ନିଟ୍ ଆଶାୟୀଙ୍କୁ ବିଭ୍ରାନ୍ତ କରୁଛନ୍ତି ବୋଲି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗୁରୁବାର କହିଛନ୍ତି। ନିଟ୍ ପ୍ରଶ୍ନପତ୍ର ଲିକ୍କୁ ନେଇ ବିବାଦ ଉପୁଜିଥିବାବେଳେ ଏବଂ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି ଜୋର୍ ଧରିଥିବାବେଳେ ଏହି ସମୟରେ ସେ ଉକ୍ତ ମନ୍ତବ୍ୟ ରଖିଛନ୍ତି। ସିଏନ୍ଏନ୍-ନ୍ୟୁଜ ୧୮ ସହିତ କଥାବାର୍ତ୍ତାବେଳେ ଧର୍ମେନ୍ଦ୍ର ପ୍ରଧାନ କହିଛନ୍ତି, ରାହୁଲ ଗାନ୍ଧୀ ଓ ବିରୋଧୀ ଦଳ ଯୁବପିଢ଼ିଙ୍କ ମନରେ ଭୟ ସୃଷ୍ଟି କରୁଛନ୍ତି। ଆମ ସମସ୍ତଙ୍କର ସେମାନଙ୍କ ପ୍ରତି ଦାୟିତ୍ବବୋଧ ରହିଛି। ଛାତ୍ରଛାତ୍ରୀଙ୍କ ଭବିଷ୍ୟତକୁ ଦୃଷ୍ଟିରେ ରଖି ମୁଁ ରାଜନୀତିରେ ପଶିବାକୁ ଚାହୁନାହିଁ। କିନ୍ତୁ ନିଟ୍ ପରୀକ୍ଷାର କିଛି ଦିନ ପୂର୍ବରୁ କୋଟାରେ ରାଲି କରିବାକୁ ବିରୋଧୀ ଦଳଙ୍କ ନିଷ୍ପତ୍ତି ସଠିକ୍ ନଥିଲା। କେନ୍ଦ୍ର ଶିକ୍ଷା ମନ୍ତ୍ରୀ ଆହୁରି କହିଛନ୍ତି ଯେ, ବେଙ୍ଗାଲୁରୁରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ଦ୍ୱାରା ଆୟୋଜିତ ଏକ ରାଲି ଯୋଗୁଁ କର୍ଣ୍ଣାଟକର ତିନି ଜଣ ନିଟ୍ ଆଶାୟୀ ସେମାନଙ୍କ ପରୀକ୍ଷା କେନ୍ଦ୍ରରେ ପହଞ୍ଚିପାରିଲେ ନାହିଁ। ଖଡ଼ଗେ ପରେ ସେମାନଙ୍କୁ କ୍ଷମା ପ୍ରାର୍ଥନା କଲେ। କଂଗ୍ରେସ କେମିତି ଆମକୁ ଏହି ପ୍ରସଙ୍ଗରେ ଭାଷଣ ଦେଉଛି ବୋଲି ସେ ପ୍ରଶ୍ନ କରିଥିଲେ। କକ୍ରୋଚ ଜନତା ପାର୍ଟିର ଆନ୍ଦୋଳନକୁ ମଧ୍ୟ ସମାଲୋଚନା କରି ପ୍ରଧାନ ଏହାକୁ ରାହୁଲ ଗାନ୍ଧୀଙ୍କ ‘ବି’ ଟିମ୍ ବୋଲି କହିଛନ୍ତି।
