ରାଜସ୍ବ ବିଭାଗର ଅନଲାଇନ ଆଶ୍ବାସନା ପାଲଟିଛି ପ୍ରହସନ

ନନ୍ଦିଘୋଷ ବ୍ୟୁରୋ : ଗଞ୍ଜାମ ଆସିକାର ରାମହରି ଚୌଧୁରୀ । ନିଜ ପଟ୍ଟା ସଂଶୋଧନ ପାଇଁ ୬ ମାସ ହେଲା ଦୌଡୁଛନ୍ତି ତହସିଲ କାର୍ଯ୍ୟାଳୟ। ଏଠି ଅନଲାଇନ ଫେଲ ମାରିଛି । ସବୁ କିଛି ଚାଲିଛି ଅଫଲାଇନରେ। ବାରମ୍ବାର ତହସିଲ କାର୍ଯ୍ୟାଳୟ ଯିବାକୁ ପଡୁଛି। କିରାଣୀଙ୍କୁ ଅନୁରୋଧ କରିବାକୁ ପଡୁଛି । ଦିନ ସାରା ଗୋଡ଼ ଭାଙ୍ଗି ଛିଡ଼ା ହେବାକୁ ପଡୁଛି। ତଥାପି ବାବୁଙ୍କ ଦୟା ନହେଲେ କାମ ହେଉନି। ରାଜସ୍ବ ବିଭାଗର ଅନଲାଇନ ଆଶ୍ବାସନା ପାଲଟିଛି ପ୍ରହସନ। ମନ୍ତ୍ରୀ କେବଳ ପ୍ରଚାର ପାଇଁ ଟିଭି ଆଗରେ ଏମିତି କହୁଛନ୍ତି ସିନା, ହେଲେ ବାସ୍ତବରେ ଚାଲିଛି ଓଲଟା। ଆସିକା ଅଞ୍ଚଳର ଅନେକ ଲୋକଙ୍କ ଅଭିଯୋଗ ସମାନ । ରାଉରକେଲା ସହରରେ ବି ଅନଲାଇନରେ କିଛି ହେଉନାହିଁ ବୋଲି ଲୋକେ ଅଭିଯୋଗ କରିଛନ୍ତି । ତହସିଲ କାର୍ଯ୍ୟାଳୟକୁ ସବୁବେଳେ ଯିବାକୁ ପଡୁଛି, ବାବୁମାନଙ୍କୁ ଗୁହାରୀ କରିବାକୁ ପଡୁଛି। ବାବୁମାନଙ୍କୁ ହାତଗୁଞ୍ଜା ବି ଦେବାକୁ ପଡୁଛି। ତଥାପି କାମ ହେଉନାହିଁ। ସରକାର ଅନଲାଇନର ଥୋପ ନ ଦେଇ ଆଗ ଭଳି ସବୁ କାମ ଅଫଲାଇନରେ ହେଉଛି ବୋଲି ଘୋଷଣା କରିଦେଲେ ଭଲ ହୁଅନ୍ତା ବୋଲି ହିତାଧିକାରୀମାନେ କହିଛନ୍ତି।

ପଟ୍ଟାରେ ମାଲିକାନା ସ୍ବତ୍ତ୍ବ ଆପେ ଆପେ ସଂଶୋଧନ ହେବ। ଏଥିପାଇଁ ଗାଁକୁ ଯାଉଛି ତହସିଲ । ଏଭଳି ଢଙ୍ଗରେ ଲକ୍ଷାଧିକ ପଟ୍ଟା ସଂଶୋଧନ ହେଲାଣି ବୋଲି ମନ୍ତ୍ରୀ କହୁଛନ୍ତି । ଜାତିଗତ ପ୍ରମାଣପତ୍ର, ଆୟ ପ୍ରମାଣପତ୍ର, ରେସିଡେନ୍ସ ସାର୍ଟିଫିକେଟ, ପଟ୍ଟା ସଂଶୋଧନ, ଜମି ସୀମା ଚିହ୍ନଟ, ଜମିର କିସମ ପରିବର୍ତ୍ତନ ଭଳି ଗୁରୁତ୍ବପୂର୍ଣ୍ଣ କାମ ପାଇଁ ଲୋକେ ତହସିଲ ଅଫିସ ଯିବାକୁ ପଡ଼ୁନାହିଁ ବୋଲି ରାଜସ୍ବ ବିଭାଗର ସ୍ଲୋଗାନ ଫେଲ ମାରୁଛି। ଏବେ ରାଜସ୍ବ ବିଭାଗର ଅନଲାଇନ ସେବା, ହ୍ବାଟସଆପ୍ ସେବା ଗ୍ରାଉଣ୍ଡ ଜିରୋରେ ବିଫଳ ହୋଇଛି। ତଥାପି ଚାଲିଛି ବିଭାଗରେ ସଂସ୍କାର। ଆସୁଛି ଗୋଟିଏ ପରେ ଗୋଟିଏ ଡିଜିଟାଲ ସେବା। ମନ୍ତ୍ରୀ କହିଛନ୍ତି, ରାଜସ୍ବ ସେବା ଲୋକଙ୍କ ପାଖରେ ଡିଜିଟାଲ ମାଧ୍ୟମରେ ପହଞ୍ଚାଇବା ପାଇଁ ସରକାର ବଦ୍ଧପରିକର।

ଗାଁ ହେଉ କି ସହର, ସାଧାରଣ ଲୋକଙ୍କ ସରକାରୀ କାମ ସବୁଠାରୁ ଅଧିକ ଥାଏ ତହସିଲ କାର୍ଯ୍ୟାଳୟରେ । ବର୍ଷ ବର୍ଷ ଧରି ନିଜ ଜମି ରେକର୍ଡ ସଠିକ କରିବା ପାଇଁ ହନ୍ତସନ୍ତ ହେଉଛି ସାଧାରଣ ଲୋକ। ମନ୍ତ୍ରୀଙ୍କ ଡିଜିଟାଲ ସେବା ପ୍ରଚାର ଯେତିକି ହେଉଛି, ବାସ୍ତବରେ ସେତିକି ରୂପାୟନ ହେଲେ ତଳ ସ୍ତରରେ ଲୋକେ ଉପକୃତ ହୋଇପାରନ୍ତେ ।..