ରଚନା ବାନାର୍ଜୀଙ୍କ ନାଁରେ FIR! ବନ୍ଧା ହେବେ… ଆସିଲା ବଡ଼ ଖବର

କୋଲକାତା,୨।୬: ଓଡ଼ିଶାରେ ଘରେ ଘରେ ପରିଚିତ ଲୋକପ୍ରିୟ ଅଭିନେତ୍ରୀ ତଥା ତୃଣମୂଳ କଂଗ୍ରେସ (TMC) ଏମପି ରଚନା ବାନାର୍ଜୀଙ୍କ ନାଁରେ ଏଫଆଇଆର ରୁଜୁ। କୋଲକାତାର ଆର.ଜି. କର ମେଡିକାଲ କଲେଜରେ ଘଟିଥିବା ବର୍ୱର ବଳାତ୍କାର ଓ ହତ୍ୟା ମାମଲାର ପୀଡ଼ିତାଙ୍କ ପରିଚୟ ଏବଂ ନାମ ସୋସିଆଲ ମିଡିଆରେ ପ୍ରକାଶ କରିଥିବା ଅଭିଯୋଗରେ ତାଙ୍କ ବିରୋଧରେ ବର୍ତ୍ତମାନ ପୋଲିସରେ ଏକ ଲିଖିତ ଅଭିଯୋଗ ଦାୟର କରାଯାଇଛି।

କୋଲକାତା ହାଇକୋର୍ଟର ଜଣେ ବରିଷ୍ଠ ଆଇନଜୀବୀ ଶାୟନ ସଚିନ ବାସୁ ଏହି ମାମଲା ଦାୟର କରି ରଚନାଙ୍କ ବିରୋଧରେ ତୁରନ୍ତ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।

ରିପୋର୍ଟ ଅନୁଯାୟୀ, ଅଭିନେତ୍ରୀ ରଚନା ବାନାର୍ଜୀ ଆର.ଜି. କର ମେଡିକାଲର ଏହି ଦୁଃଖଦ ଘଟଣାକୁ ନିନ୍ଦା କରି ନିଜ ସୋସିଆଲ ମିଡିଆ ହ୍ୟାଣ୍ଡେଲରେ ଏକ ଭିଡିଓ ପୋଷ୍ଟ କରିଥିଲେ। ଏହି ଭିଡିଓରେ ସେ ବେଶ ଭାବୁକ ହୋଇ ପୀଡ଼ିତାଙ୍କ ପାଇଁ ନ୍ୟାୟ ଦାବି କରୁଥିବା ଦେଖିବାକୁ ମିଳିଥିଲା। କିନ୍ତୁ ଭିଡିଓର ଶେଷ ଭାଗରେ ସେ ଭୁଲବଶତଃ ପୀଡ଼ିତା ଡାକ୍ତରଙ୍କ ଅସଲ ନାମ ଉଲ୍ଲେଖ କରିଦେଇଥିଲେ। ଆଇନ ଅନୁଯାୟୀ, କୌଣସି ବି ବଳାତ୍କାର ପୀଡ଼ିତାଙ୍କ ପରିଚୟ କିମ୍ୱା ନାମ ସାର୍ୱଜନୀନ କରିବା ଏକ ଗମ୍ଭୀର ଅପରାଧ, ଯେଉଁଥିପାଇଁ ଭାରତୀୟ ନ୍ୟାୟ ସଂହିତା (BNS) ର ଧାରା ୭୨ ଅନୁସାରେ ୨ ବର୍ଷ ପର୍ଯ୍ୟନ୍ତ ଜେଲ କିମ୍ୱା ଜରିମାନା ହେବାର ପ୍ରାବଧାନ ରହିଛି।

ଏହି ବିବାଦ ସାମ୍ନାକୁ ଆସିବା ଏବଂ ମାମଲା ରୁଜୁ ହେବା ପରେ ରଚନା ବାନାର୍ଜୀ ନିଜର ଭୁଲ ସ୍ୱୀକାର କରିଛନ୍ତି ଏବଂ ତୁରନ୍ତ ସୋସିଆଲ ମିଡିଆରୁ ସେହି ଭିଡିଓଟିକୁ ଡିଲିଟ କରିଦେଇଛନ୍ତି।

ସେ ଗଣମାଧ୍ୟମରେ କହିଛନ୍ତି, ଏହା ନିଶ୍ଚିତ ଭାବେ ମୋର ଏକ ବଡ଼ ଭୁଲ ଥିଲା, ମୋର ଏପରି କରିବା ଉଚିତ ନଥିଲା। ବାକି ସମସ୍ତଙ୍କ ଭଳି ମୋର ମଧ୍ୟ ତାଙ୍କୁ ‘ତିଲୋତ୍ତମା’ ବୋଲି ସମ୍ୱୋଧନ କରିବାର ଥିଲା। ସେହି ସମୟରେ ମୁଁ ମାନସିକ ସ୍ତରରେ ଅତି ଦୁଃଖିତ ଏବଂ ଭାବୁକ ଥିଲି। ମୁଁ ଯାହା ବି କହୁଥିଲି, ତାହା କୌଣସି ସ୍କ୍ରିପ୍ଟ ନଥିଲା ବରଂ ମୋ ହୃଦୟରୁ ବାହାରୁଥିଲା। ସେହି ଭାବବିହୱଳ ପରିସ୍ଥିତିରେ ଅଜାଣତରେ ମୋ ପାଟିରୁ ସେହି ନାମଟି ବାହାରି ପଡ଼ିଥିଲା।

The post ରଚନା ବାନାର୍ଜୀଙ୍କ ନାଁରେ FIR! ବନ୍ଧା ହେବେ… ଆସିଲା ବଡ଼ ଖବର appeared first on Dharitri Odia News.