ଆଜିଠାରୁ ନୂଆ SIM ନିୟମ: ୯ଟିରୁ ଅଧିକ ମୋବାଇଲ୍ କନେକ୍ସନ୍ ଥିଲେ ମିଳିବନି ନୂଆ SIM

ନନ୍ଦିଘୋଷ ବ୍ୟୁରୋ : ଆଜିଠାରୁ ଲାଗୁ ହେବ ନୂଆ ସିମ୍‌କାର୍ଡ ନିୟମ। ଏଣିକି ମନଇଚ୍ଛା ନେଇପାରିବେନି ନୂଆ ସିମ୍। ଆପଣଙ୍କ ନାଁରେ ଅନୁମୋଦିତ ସୀମା ପୂର୍ବରୁ ପୂରଣ ହୋଇସାରିଥିଲେ, ଆଉ ନୂଆ ମୋବାଇଲ୍ କନେକ୍ସନ୍ ଦେବେନାହିଁ ଟେଲିକମ୍ କମ୍ପାନୀ। ଏହି ନିୟମକୁ କଡ଼ାକଡ଼ି ଭାବେ ଲାଗୁ କରିବାକୁ ଯାଉଛି ଦୂରସଞ୍ଚାର ବିଭାଗ ବା DoT। ଏନେଇ ଅଗଷ୍ଟ ୧୭ ତାରିଖରେ ଟେଲିକମ୍ କମ୍ପାନୀଗୁଡ଼ିକୁ ନିର୍ଦ୍ଦେଶ ଦିଆଯାଇଥିଲା। ସାଧାରଣ ଭାବେ, ଜଣେ ବ୍ୟକ୍ତିଙ୍କ ନାଁରେ ସର୍ବାଧିକ ୯ଟି ମୋବାଇଲ୍ କନେକ୍ସନ୍ ରହିପାରିବ। ଏହି ସୀମା ସମସ୍ତ ଟେଲିକମ୍ ଅପରେଟର୍ ଏବଂ ଟେଲିକମ୍ ସର୍କଲ୍‌କୁ ମିଶାଇ ଲାଗୁ ହେବ। କିନ୍ତୁ ଜମ୍ମୁ-କଶ୍ମୀର, ଆସାମ ଏବଂ ଉତ୍ତର-ପୂର୍ବାଞ୍ଚଳର କିଛି ରାଜ୍ୟରେ ଏହି ସୀମା ୬ଟି କନେକ୍ସନ୍ ରହିଛି। ଅର୍ଥାତ୍, ଆପଣଙ୍କ ନାଁରେ ଗୋଟିଏ କମ୍ପାନୀର ୫ଟି ଏବଂ ଅନ୍ୟ ଏକ କମ୍ପାନୀର ୪ଟି ସିମ୍ ଥିଲେ ମଧ୍ୟ ମୋଟ ସଂଖ୍ୟା ୯ଟି ଭାବେ ଗଣାଯିବ।

ଆପଣ ନୂଆ ସିମ୍ ନେବାକୁ ଗଲେ, ଟେଲିକମ୍ କମ୍ପାନୀ ଯାଞ୍ଚ କରିବ ଯେ ଆପଣଙ୍କ ନାଁରେ ପୂର୍ବରୁ କେତୋଟି ମୋବାଇଲ୍ ନମ୍ବର ରହିଛି। ଏଥିପାଇଁ DoTର Digital Intelligence Platform (DIP) ବ୍ୟବହାର କରାଯିବ। ବିଭିନ୍ନ ଟେଲିକମ୍ କମ୍ପାନୀର ଗ୍ରାହକଙ୍କ ତଥ୍ୟକୁ ଏହି ପ୍ଲାଟଫର୍ମ ମାଧ୍ୟମରେ ଯାଞ୍ଚ କରାଯିବ।

ନୂଆ କନେକ୍ସନ୍ ନେବା ସମୟରେ ଗ୍ରାହକଙ୍କୁ ନିଜ ନାଁରେ ପୂର୍ବରୁ ଥିବା ମୋବାଇଲ୍ ନମ୍ବର ସମ୍ପର୍କରେ ସୂଚନା ଦେବାକୁ ପଡ଼ିବ। ଅନ୍ୟ ଟେଲିକମ୍ କମ୍ପାନୀରୁ କିମ୍ବା ଅନ୍ୟ ଟେଲିକମ୍ ସର୍କଲ୍‌ରୁ ନିଆଯାଇଥିବା ସିମ୍ ମଧ୍ୟ ଏଥିରେ ସାମିଲ ହେବ। ଯଦି ଯାଞ୍ଚ ପରେ ଜଣାପଡ଼େ ଯେ ଆପଣ ଅନୁମୋଦିତ ସୀମା ପୂରଣ କରିସାରିଛନ୍ତି, ତେବେ ଆଉ ନୂଆ ସିମ୍ ଦିଆଯିବ ନାହିଁ।