ଶିକ୍ଷା ବିଭାଗର ଅଧିକାରୀଙ୍କ ବିରୋଧରେ ଲାଞ୍ଚ ଅଭିଯୋଗ

ରାଞ୍ଚି: ଝାଡ଼ଖଣ୍ଡର ପାଲାମୁରେ ଜଣେ ସରକାରୀ ସ୍କୁଲ ଶିକ୍ଷୟିତ୍ରୀଙ୍କୁ ଛୁଟି ମିଳିବାରେ ବିଳମ୍ବକୁ ନେଇ ବିବାଦ ଉଠିଛି। ତାଙ୍କର ଶିଶୁ ମୃତ ଜନ୍ମ ହେବା ପରେ ଶିକ୍ଷା ବିଭାଗର ଅଧିକାରୀଙ୍କ ବିରୋଧରେ ଲାଞ୍ଚ ଅଭିଯୋଗ ଆସିଛି। ଜିଲ୍ଲା ପ୍ରଶାସନ ତଦନ୍ତ ନିର୍ଦ୍ଦେଶ ଦେଇଥିବା ବେଳେ ଲାଞ୍ଚ ଅଭିଯୋଗକୁ ଖଣ୍ଡନ କରିଛି।

ସୂଚନାଯୋଗ୍ୟ, ଚୈନପୁରର କସ୍ତୁରବା ଗାନ୍ଧୀ ସିଏମ୍ ଏକ୍ସଲେନ୍ସ ସ୍କୁଲରେ ଡେପୁଟେସନରେ ଥିବା ତରହାସିର ପ୍ଲସ୍ ଟୁ ହାଇସ୍କୁଲର ଶିକ୍ଷୟିତ୍ରୀ ଭାରତୀ ପାଣ୍ଡେ ଜୁଲାଇ ୩ ତାରିଖରେ ଶିଶୁ ଯତ୍ନ ଛୁଟି (ସିସିଏଲ୍) ପାଇଁ ଆବେଦନ କରିଥିଲେ। ହଜାରିବାଗରେ ନିଯୁକ୍ତ ତାଙ୍କ ପୁଲିସ ଅଧିକାରୀ ସ୍ୱାମୀ ମୁକେଶ କୁମାର ତିୱାରୀ ଅଭିଯୋଗ କରିଛନ୍ତି ଯେ, ଜିଲ୍ଲା ଶିକ୍ଷା ବିଭାଗର କର୍ମଚାରୀମାନେ ଆବେଦନ ପ୍ରକ୍ରିୟାକରଣ ପାଇଁ ପ୍ରାୟ ୫୦,୦୦୦ ଟଙ୍କା ଲାଞ୍ଚ ଦାବି କରିଥିଲେ, ଯାହା ଫଳରେ ତାଙ୍କ ସ୍ତ୍ରୀ ଗର୍ଭଧାରଣର ଶେଷ ସପ୍ତାହରେ ଯାତ୍ରା ଜାରି ରଖିବାକୁ ବାଧ୍ୟ ହୋଇଥିଲେ।
ଜୁଲାଇ ୨୫ ତାରିଖରେ ତାଙ୍କୁ ମେଦିନୀନଗରର ସୋନା ନର୍ସିଂ ହୋମରେ ଭର୍ତ୍ତି କରାଯାଇଥିଲା, ଯେଉଁଠାରେ ଡାକ୍ତରମାନେ ଘୋଷଣା କରିଥିଲେ ଯେ ଗର୍ଭରେ ଭ୍ରୁଣଟି ମରିଯାଇଛି। ତିୱାରୀ କହିଛନ୍ତି, ମୋ ପତ୍ନୀଙ୍କର ଦୁଇଟି ଶିଶୁ ଅଛନ୍ତି। ତେଶୁ ମାତୃତ୍ବକାଳୀନ ଛୁଟି ମିଳି ନଥାନ୍ତା, ସେଥିପାଇଁ ସେ ସିସିଏଲ ମାଗି ଥିଲେ। କିନ୍ତୁ ଜିଲ୍ଲା ଶିକ୍ଷା ବିଭାଗ ଅଧିକାରୀ ଛୁଟି ଆବେଦନ ମଞ୍ଜୁର କରିବାକୁ ତାଙ୍କୁ ପ୍ରଥମେ ୩୦,୦୦୦ ଟଙ୍କା ଓ ପରେ ୫୦,୦୦୦ ଟଙ୍କା ମାଗିଥିଲେ ବୋଲି ତିୱାରୀ ଅଭିଯୋଗ କରିଛନ୍ତି।