ମୋସାଦ ଦ୍ବାରା ପାକିସ୍ତାନ ସେନାମୁଖ୍ୟଙ୍କୁ ମାରିବାକୁ ଯୋଜନା ହୋଇଥିବା ବ୍ରାଜିଲ ସାମ୍ବାଦିକଙ୍କ ଦାବି
ଇସଲାମାବାଦ: ବ୍ରାଜିଲୀୟ ସାମ୍ବାଦିକ ତଥା ଭୂ-ରଣନୈତିକ ବିଶେଷଜ୍ଞ ପେପେ ଏସ୍କୋବାର ଦାବି କରିଛନ୍ତି ଯେ, ଇସ୍ରାଏଲୀ ଗୁଇନ୍ଦା ସଂସ୍ଥା ମୋସାଦ ଇରାନ ଶାନ୍ତି ଆଲୋଚନା ପାଇଁ ସ୍ୱିଜରଲାଣ୍ଡର ଜେନେଭାରେ ଥିବା ସମୟରେ ପାକିସ୍ତାନର ସାମରିକ ମୁଖ୍ୟ ଫିଲ୍ଡ ମାର୍ଶାଲ ଅସୀମ ମୁନିର ଓ ସମଗ୍ର ପ୍ରତିନିଧିମଣ୍ଡଳକୁ ହତ୍ୟା କରିବାକୁ ଷଡ଼ଯନ୍ତ୍ର କରିଥିଲା। ତେବେ ଏହି ଚାଞ୍ଚଲ୍ୟକର ଦାବିକୁ ପାକିସ୍ତାନୀ ସାମ୍ବାଦିକ ପ୍ରତ୍ୟାଖ୍ୟାନ କରିଛନ୍ତି। ଆମେରିକା ଓ ଇରାନ ମଧ୍ୟରେ ପାକିସ୍ତାନ ମଧ୍ୟସ୍ଥିର ଭୂମିକା ଗ୍ରହଣ କରିଥିବାବେଳେ ପ୍ରାରମ୍ଭିକ ଚୁକ୍ତିନାମାକୁ ଇସଲାମାବାଦ ବୁଝାମଣାପତ୍ର ନାମ ଦିଆଯାଇଛି। ଇସଲାମାବାଦ ବୁଝାମଣାପତ୍ର ଉପରେ ଅଧିକ ଆଲୋଚନା ଜେନେଭାରେ ହୋଇଥିଲା। ଆମେରିକା ଉପରାଷ୍ଟ୍ରପତି ଜେଡି ଭାନ୍ସଙ୍କ ସମେତ ଉଚ୍ଚ ପଦସ୍ଥ ଅଧିକାରୀମାନେ ଏହି ଆଲୋଚନାରେ ଯୋଗ ଦେଇଥିଲେ। ଅସୀମ ମୁନିରଙ୍କୁ ହତ୍ୟା କରିବା ପାଇଁ ମୋସାଦର ଷଡ଼ଯନ୍ତ୍ରର ଏହି ଚାଞ୍ଚଲ୍ୟକର ଦାବି ସମ୍ପର୍କରେ ଏସ୍କୋବାର ରାଜନୈତିକ ସମୀକ୍ଷକ ଓ ଇଣ୍ଟରନେଟ୍ ବ୍ୟକ୍ତିତ୍ୱ ମାରିଓ ନୱଫାଲଙ୍କ ଦ୍ୱାରା ଆୟୋଜିତ ଏକ ପଡକାଷ୍ଟ ସମୟରେ କରିଥିଲେ। ଏସ୍କୋବାର୍ ଦାବି କରିଥିଲେ ଯେ, ପାକିସ୍ତାନୀ ସାମରିକ ଗୁଇନ୍ଦା ସଂସ୍ଥା ସ୍ୱିଜରଲ୍ୟାଣ୍ଡରେ ଉଚ୍ଚସ୍ତରୀୟ ଆଲୋଚନା ସମୟରେ ମୁନିର ଓ ସମ୍ଭାବ୍ୟ ପାକିସ୍ତାନୀ ପ୍ରତିନିଧିମଣ୍ଡଳର ଅନ୍ୟ ସଦସ୍ୟମାନଙ୍କୁ ହତ୍ୟା କରିବାକୁ ମୋସାଦ ପ୍ରସ୍ତୁତ କରୁଥିବା ଅତି ବିଶ୍ୱସନୀୟ ସୂଚନା ପାଇଥିଲା। ଇସ୍ରାଏଲୀ ନେତାମାନେ ଇରାନ-ଆମେରିକା ଶାନ୍ତି ଚୁକ୍ତିନାମାକୁ ସମାଲୋଚନା କରି କହିଛନ୍ତି ଯେ, ଏହାକୁ ଗୁପ୍ତ ରଖାଯାଇ ନଥିଲା। ଲେବାନନରେ ଇସ୍ରାଏଲର ସାମରିକ ଆକ୍ରମଣ ମଧ୍ୟ ଏହି ଚୁକ୍ତିନାମାକୁ ଭାଙ୍ଗିବାକୁ ଧମକ ଦେଇଥିଲା।
