ପଞ୍ଚାୟତ, ପୌର ନିର୍ବାଚନ ପାଇଁ ଗୁରୁମନ୍ତ୍ର ଦେଲେ ନୀତିନ ନବୀନ: ଏବେଠୁ ରଣନୀତି ପ୍ରସ୍ତୁତ, ଆଗକୁ…

ଜଟଣୀ,୧୮।୫: ଖୋର୍ଦ୍ଧା ଜିଲା ଜଟଣୀରେ ଆୟୋଜିତ ପ୍ରଶିକ୍ଷଣ ଶିବିରରେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନ କାର୍ଯ୍ୟକର୍ତ୍ତାଙ୍କୁ ୫ଟି ଗୁରୁମନ୍ତ୍ର ଦେଇ ସଂଗଠନକୁ ଆହୁରି ସୁଦୃଢ କରିବାକୁ ଆହ୍ୱାନ ଦେଇଛନ୍ତିା

ଶିବିରରେ ନୀତିନ ନବୀନ ଉଦ୍ବୋଧନଦେଇ କହିଥିଲେ ଯେ, ଆଜିର ଯୁବପିଢ଼ୀ, ବିଶେଷକରି ‘ଜେନ୍‌ ଜି’ ମନୋଭାବରେ ସକାରାତ୍ମକତା ରହିବା ଆବଶ୍ୟକ। ନେଗେଟିଭିଟିକୁ ଛାଡ଼ି ଦେଶ ଗଠନରେ ସକ୍ରିୟ ଭାଗ ନେବାକୁ ସେ ଆହ୍ୱାନ କରିଥିଲେ।

ସେ ତାଙ୍କ ୫ଟି ମୁଖ୍ୟ ଗୁରୁମନ୍ତ୍ର ମଧ୍ୟରେ ପ୍ରଥମେ ରାଷ୍ଟ୍ର ପ୍ରତି ସମର୍ପଣକୁ ଗୁରୁତ୍ୱ ଦେଇ କହିଥିଲେ ଯେ, ପ୍ରତ୍ୟେକ କାର୍ଯ୍ୟକର୍ତ୍ତା ଦେଶର ହିତକୁ ସର୍ବୋପରି ରଖିବା ଉଚିତ। ଦ୍ୱିତୀୟତଃ, ଗଣତନ୍ତ୍ରରେ ସକ୍ରିୟ ଭାଗିଦାରୀ ହେବାକୁ ଉଲ୍ଲେଖ କରି ସେ କହିଥିଲେ ଯେ, ଲୋକମାନେ କେବଳ ଦର୍ଶକ ନୁହେଁ, ବରଂ ସହଭାଗୀ ହେବା ଦରକାର।

ତୃତୀୟ ଗୁରୁମନ୍ତ୍ରରେ ସେ ଚେତାବନୀ ଦେଇ କହିଥିଲେ ଯେ, ଦେଶର ଗଣତନ୍ତ୍ରରେ ଅନୁପ୍ରବେଶକାରୀଙ୍କୁ ସ୍ଥାନ ମିଳିବା ଉଚିତ ନୁହେଁ। ଚତୁର୍ଥ ଭାବେ, ସେ ପ୍ରଧା ନମନ୍ତ୍ରୀ ନରେନ୍ଦ୍ର ମୋଦିଙ୍କ ଉଦାହରଣ ଦେଇ କହିଥିଲେ ଯେ, ଦଳୀୟ ମତଭେଦକୁ ପଛରେରଖି ବିକାଶ ଦିଗରେ କାମ କରିବା ଆବଶ୍ୟକ।

ଶେଷ ଗୁରୁମନ୍ତ୍ରରେ ନୀତିନ ନବୀନ ସଂଗଠନକୁ ତଳସ୍ତରରୁ ମଜବୁତ କରିବାକୁ ଜୋର ଦେଇଥିଲେ। ଗ୍ରାସରୁଟ୍‌ ଲେଭେଲରେ କାର୍ଯ୍ୟକର୍ତ୍ତାଙ୍କ ସକ୍ରିୟତା ଓ ଏକତା ଦଳକୁ ଶକ୍ତିଶାଳୀ କରିବ ବୋଲି ସେ କହିଥିଲେ।

ଏହି ପ୍ରଶିକ୍ଷଣ ଶିବିରରେ ରାଜ୍ୟର ଅନେକ ବରିଷ୍ଠ ନେତା ଓ କାର୍ଯ୍ୟକର୍ତ୍ତା ଉପସ୍ଥିତ ଥିଲେ। ଶିବିରଟି ଆଗାମୀ ନିର୍ବାଚନ ପାଇଁ ଦଳୀୟ ରଣନୀତିକୁ ଆହୁରି ମଜବୁତ କରିବାରେ ଗୁରୁତ୍ୱପୂର୍ଣ୍ଣ ବୋଲି ଚର୍ଚ୍ଚା ହେଉଛି।

The post ପଞ୍ଚାୟତ, ପୌର ନିର୍ବାଚନ ପାଇଁ ଗୁରୁମନ୍ତ୍ର ଦେଲେ ନୀତିନ ନବୀନ: ଏବେଠୁ ରଣନୀତି ପ୍ରସ୍ତୁତ, ଆଗକୁ… appeared first on Dharitri Odia News.