ନିର୍ମାଣ ସୌଧ ଘେରିଲେ କଣ୍ଟ୍ରାକ୍ଟର୍ ; ଘଣ୍ଟ ବଜାଇ ଅଭିନବ ପ୍ରତିବାଦ କରିଛି ନିଖିଳ ଓଡିଶା ଠିକାଦାର ମହାସଂଘ

ଭୁବନେଶ୍ୱର: ରାଜଧାନୀ ଭୁବନେଶ୍ୱରସ୍ଥିତ ‘ନିର୍ମାଣ ସୌଧ’ ସାମ୍ନାରେ କଣ୍ଟ୍ରାକ୍ଟର ବା ଠିକାଦାରମାନଙ୍କର ଗର୍ଜନ। ୮ ଦଫା ଦାବି ନେଇ ଘଣ୍ଟ ବଜାଇ ଏକ ଅଭିନବ ପ୍ରତିବାଦ କରିଛି ନିଖିଳ ଓଡିଶା ଠିକାଦାର ମହାସଂଘ। ୫ ଲକ୍ଷ ଟଙ୍କାର ‘ସର୍ଟ ଟେଣ୍ଡର’ ପ୍ରକ୍ରିୟାକୁ ଉଚ୍ଛେଦ କରିବା ସହ ବିଭିନ୍ନ ଦାବି ନେଇ ମହାସଂଘ ପକ୍ଷରୁ ଏହି ଆନ୍ଦୋଳନ ଓ ଧାରଣା ଚାଲିଛି।

ଗତ ଜୁଲାଇ ୧ ତାରିଖରୁ ଆରମ୍ଭ ହୋଇଥିବା ଏହି ଆନ୍ଦୋଳନ ଆଜି ୬ଷ୍ଠ ଦିନରେ ପହଞ୍ଚିଛି। ତେବେ ଅଭିଯୋଗ ଅନୁଯାୟୀ, ଦୀର୍ଘ ୬ ଦିନ ବିତିଯାଇଥିଲେ ମଧ୍ୟ ସରକାରଙ୍କ ପକ୍ଷରୁ କୌଣସି ଆଲୋଚନା କରାଯାଇ ନାହିଁ। ପୂର୍ବ ଆନ୍ଦୋଳନ ସମୟରେ ସରକାର ଦେଇଥିବା ପ୍ରତିଶ୍ରୁତି ମଧ୍ୟ ଏପର୍ଯ୍ୟନ୍ତ ପୂରଣ ହୋଇନଥିବା ମହାସଂଘ କହିଛି।

ଠିକାଦାର ମହାସଂଘର ସଭାପତି ଅନିଲ କୁମାର ମହାଳିକଙ୍କ ସଂଯୋଜନାରେ ଏହି ବୃହତ ଆନ୍ଦୋଳନ ଚାଲିଛି। ଏଥିରେ ରାଜ୍ୟର ବିଭିନ୍ନ ଜିଲ୍ଲାରୁ ଶତାଧିକ ଠିକାଦାର ସାମିଲ ହୋଇ ସରକାରଙ୍କ ନୀତି ବିରୋଧରେ ସ୍ୱର ଉତ୍ତୋଳନ କରିଛନ୍ତି।

ମହାସଂଘର ମୁଖ୍ୟ ଦାବି:
. ୫ ଲକ୍ଷ ଟଙ୍କାର ‘ସର୍ଟ ଟେଣ୍ଡର’ ପ୍ରକ୍ରିୟାକୁ ସମ୍ପୂର୍ଣ୍ଣ ଉଚ୍ଛେଦ କରାଯାଉ।
. ଓଡ଼ିଶାର ଠିକାଦାରଙ୍କୁ ବାଦ୍ ଦେଇ ବାହାର ରାଜ୍ୟର କଣ୍ଟ୍ରାକ୍ଟରଙ୍କୁ କାମ ଦେବା ବନ୍ଦ ହେଉ।
. ଠିକାଦାରମାନଙ୍କର ଦୀର୍ଘ ଦିନର ବକେୟା ପ୍ରାପ୍ୟ ତୁରନ୍ତ ପ୍ରଦାନ କରାଯାଉ।
. ଅନ୍ୟାନ୍ୟ ୮ ଦଫା ସମ୍ବଳିତ ଦାବିପତ୍ର ତୁରନ୍ତ ପୂରଣ ହେଉ।