ଦିଲ୍ଲୀବାସୀଙ୍କ ପାଇଁ ବଡ଼ ଖବର: ୨୫ଟି ପ୍ରମୁଖ ରାସ୍ତାରୁ ହଟିବ ଟ୍ରାଫିକ ସିଗନାଲ୍!
ବ୍ୟୁରୋ : ଦିଲ୍ଲୀରେ ଯାତ୍ରା ହେବ ଆହୁରି ସହଜ ଏବଂ ସରଳ ! ଗାଡ଼ି ଚାଳକମାନଙ୍କୁ ଟ୍ରାଫିକ ଜାମ୍ରୁ ମୁକ୍ତି ଦେବା ପାଇଁ ସରକାର ଏବଂ ଟ୍ରାଫିକ ପୋଲିସ ମିଳିତ ଭାବେ ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି।
ରାଜଧାନୀର ୨୫ଟି ବ୍ୟସ୍ତବହୁଳ ରାସ୍ତାରୁ ଟ୍ରାଫିକ ସିଗନାଲ୍ (ରେଡ୍ ଲାଇଟ୍) ହଟାଇବା ପାଇଁ ପ୍ରସ୍ତୁତି ଚାଲିଛି। ଏହି ଯୋଜନାକୁ ଦିଲ୍ଲୀ ଟ୍ରାଫିକ ପୋଲିସ ପକ୍ଷରୁ ବୈଷୟିକ ମଞ୍ଜୁରୀ (Technical Approval) ମଧ୍ୟ ମିଳିସାରିଛି।
ଏହି ନୂଆ ବ୍ୟବସ୍ଥାରେ ଗାଡ଼ିଗୁଡ଼ିକ ବିନା କୌଣସି ବାଧାରେ ସିଧା ଆଗକୁ ଯାଇପାରିବେ। ଯଦି କାହାକୁ ଅନ୍ୟ ପାର୍ଶ୍ୱକୁ ଯିବାର ଥାଏ, ତେବେ ସେ ଆଗରେ ଥିବା ସ୍ପେଶାଲ ‘ୟୁ-ଟର୍ଣ୍ଣ’ (U-Turn) ସାହାଯ୍ୟରେ ନିଜ ରାସ୍ତାକୁ ଫେରିପାରିବେ। ଏହାଦ୍ୱାରା ଛକଗୁଡ଼ିକରେ ରେଡ୍ ଲାଇଟ୍ର ଆବଶ୍ୟକତା ପଡ଼ିବ ନାହିଁ।
ବର୍ତ୍ତମାନ ଦିଲ୍ଲୀର କିଛି ରାସ୍ତାରେ ମାତ୍ର ୨ କିଲୋମିଟର ଭିତରେ ଅନେକ ଟ୍ରାଫିକ ସିଗନାଲ ରହିଛି। ଗାଡ଼ିଗୁଡ଼ିକୁ ବାରମ୍ବାର ଅଟକିବାକୁ ପଡ଼ୁଥିବାରୁ ଜାମ୍ ସମସ୍ୟା ଉପୁଜୁଛି। ନୂଆ ଯୋଜନା ଏହି ସମସ୍ୟାକୁ ସମ୍ପୂର୍ଣ୍ଣ ଦୂର କରିବ।
ଏହି ସବୁ ପ୍ରମୁଖ ରାସ୍ତାରେ ହେବ ବଦଳ
-
ନଜଫଗଡ଼ ରୋଡ୍
-
ଜିଟି ରୋଡ୍ (GT Road)
-
ଆଉଟର ରିଙ୍ଗ ରୋଡ୍
-
ମଥୁରା ରୋଡ୍
-
ଆଇଟିଓ (ITO) କରିଡର
-
ଏୟାରପୋର୍ଟ ସହ ଜଡ଼ିତ ମୁଖ୍ୟ ରାସ୍ତା
ଲୋକଙ୍କୁ କଣ ମିଳିବ ଫାଇଦା?
ସମୟ ବଞ୍ଚିବ: ଟ୍ରାଫିକ ସିଗନାଲରେ ଆଉ ଅପେକ୍ଷା କରିବାକୁ ପଡ଼ିବ ନାହିଁ, ଯାତ୍ରା ଶୀଘ୍ର ଶେଷ ହେବ।
ଇନ୍ଧନ ସଞ୍ଚୟ: ଗାଡ଼ି ବାରମ୍ବାର ଷ୍ଟାର୍ଟ ଓ ବନ୍ଦ ନହେବା ଫଳରେ ପେଟ୍ରୋଲ-ଡିଜେଲ ଖର୍ଚ୍ଚ କମିବ।
ପ୍ରଦୂଷଣରୁ ମୁକ୍ତି: ଜାମ୍ କମିଲେ ଗାଡ଼ିରୁ ନିର୍ଗତ ହେଉଥିବା ଧୂଆଁ କମିବ, ଯାହା ପ୍ରଦୂଷଣ ହ୍ରାସ କରିବାରେ ସାହାଯ୍ୟ କରିବ।
ଏହି ଯୋଜନାକୁ ପର୍ଯ୍ୟାୟକ୍ରମେ (Phase-wise) ଲାଗୁ କରାଯିବ। ବର୍ତ୍ତମାନ ପବ୍ଲିକ ୱର୍କସ ଡିପାର୍ଟମେଣ୍ଟ (PWD) ଏବଂ ଟ୍ରାଫିକ ପୋଲିସ ମିଳିତ ଭାବେ ସୁରକ୍ଷା ଯାଞ୍ଚ ଓ ସର୍ଭେ କରୁଛନ୍ତି, ଯେପରି ଯାତ୍ରୀମାନେ ସୁରକ୍ଷିତ ଭାବେ ଯାତାୟାତ କରିପାରିବେ।
