ଗାଁ ଗାଁ ବୁଲି ଡବଲ୍‌ ଇଞ୍ଜିନ ସରକାରର ସଫଳତା ବାଣ୍ଟୁଛନ୍ତି ଭାଜପା କର୍ମୀ: ବୁଦ୍ଧିଜୀବୀଙ୍କୁ ସାକ୍ଷାତ କଲେ ମାନଗୋବିନ୍ଦ

ଦାରିଙ୍ଗବାଡି, ୨୯।୬ (ଅରୁଣ ସାହୁ):ରାଜ୍ୟ ସରକାରଙ୍କ ୨ ବର୍ଷ ଓ କେନ୍ଦ୍ର ସରକାରଙ୍କ ୧୨ ବର୍ଷ ପୂର୍ତ୍ତି ଅବସରରେ ଭାଜପା ଉଭୟ ସରକାରଙ୍କ ସଫଳତା ଓ କାର୍ଯ୍ୟଧାରା ସମ୍ପର୍କରେ ଗାଁ ଗାଁ ରେ ଲୋକଙ୍କୁ ଭେଟି ଓ ସଭା ମାଧ୍ୟମରେ ଲୋକଙ୍କୁ ଜଣାଉଛନ୍ତି। ଏହି କ୍ରମରେ ବିକାଶର ଧାରା ଓଡିଶା ସାରା ପାଳନ କରାଯାଇ ସରକାରଙ୍କ ୨ ବର୍ଷ ଶାସନ ମଧ୍ୟରେ କରାଯାଇଥିବା ବିକାଶ ଓ ଆଗକୁ କରାଯାଇଥିବା ଯୋଜନା ବିଶେଷ କରି କୃଷି କ୍ଷେତ୍ରରେ ପିଏମ କିଶାନ, ସିଏମ କିଷାନ, ଫସଲ ବୀମା, ଗାଁକୁ ପକ୍କା ରାସ୍ତା, ପିଇବା ପାଣି, ସ୍ବଚ୍ଛତା ଆଦି ସମ୍ପର୍କରେ ଲୋକଙ୍କୁ ସରକାରଙ୍କ ଯୋଜନା ସମ୍ପର୍କରେ ଅବଗତ କରାଯାଉଛି।
ସୋମବାର ଦାରିଙ୍ଗବାଡି ଅଞ୍ଚଳରେ ଭାଜପାର ବରିଷ୍ଠ ନେତା ତଥା ସ୍ବତନ୍ତ୍ର ଉନ୍ନୟନ ପରିଷଦ (କନ୍ଧମାଳ)ର ଅଧ୍ୟକ୍ଷ ମାନଗୋବିନ୍ଦ ପ୍ରଧାନ, ଭାଜପାର ଜିଲା ସାଧାରଣ ସମ୍ପାଦକ ସୁକାନ୍ତ ସାହୁ ପ୍ରମୁଖ ବୁଦ୍ଧିଜୀବୀ ତଥା ବରିଷ୍ଠ ନାଗରିକ ସଂଘର ସମ୍ପାଦକ ପତିତପାବନ ରାଉତ, ପୂର୍ବତନ ପ୍ରଧାନ ଶିକ୍ଷକ ଯୁଧିଷ୍ଠିର ପ୍ରଧାନ, ପୂର୍ବତନ ସେନା କର୍ମଚାରୀ କୈଳାଶ ଚନ୍ଦ୍ର ସାହୁଙ୍କୁ ଭେଟି ସରକାରଙ୍କ ବିକାଶର ଧାରା ଓଡିଶା ସାରା ସମ୍ପର୍କରେ ଅବଗତ କରାଇଛନ୍ତି । ଏଥିସହ ଅଞ୍ଚଳରେ ଆହୁରି କ’ଣ ସବୁ ସରକାରଙ୍କ ଦ୍ୱାରା କରାଯିବା ଆବଶ୍ୟକ ସେ ସମ୍ପର୍କରେ ବୁଦ୍ଧିଜୀବୀଙ୍କଠାରୁ ମତ ସଂଗ୍ରହ କରିଛନ୍ତି। ଅଧ୍ୟକ୍ଷଙ୍କ ସହ ଦାରିଙ୍ଗବାଡି ମଣ୍ଡଳ ସଭାପତି ମିଟୁ ସାହୁ, ମଣ୍ଡଳ ସାଧାରଣ ସମ୍ପାଦକ ରଞ୍ଜନ ସାହୁ, ମଣ୍ଡଳ ଉପସଭାପତି ସୁବାଷ ସାହୁ, ମଣ୍ଡଳ କାର୍ଯ୍ୟକାରିଣୀ ସଦସ୍ୟ ଦିଲୀପ ସାହୁ, ଦାରିଙ୍ଗବାଡି ଶକ୍ତିକେନ୍ଦ୍ର ପ୍ରମୁଖ ପ୍ରମୋଦ ସାହୁ ଉପସ୍ଥିତ ରହିଥିଲେ।