କୋଟି କୋଟି ଗ୍ରାହକଙ୍କୁ ବଡ଼ ଉପହାର! ଜୁଲାଇ ମାସରୁ କମିବ ବିଜୁଳି ଦର
ନୂଆଦିଲ୍ଲୀ,୩୦।୬: ଉତ୍ତର ପ୍ରଦେଶର କୋଟି କୋଟି ବିଦ୍ୟୁତ ଗ୍ରାହକଙ୍କ ପାଇଁ ଜୁଲାଇ ମାସ ବଡ଼ ଆଶ୍ୱସ୍ତି ନେଇ ଆସୁଛି। ଯଦି ଆପଣ ମଧ୍ୟ ପ୍ରତିମାସରେ ମହଙ୍ଗା ବିଜୁଳି ବିଲ୍ ଯୋଗୁଁ ଚିନ୍ତିତ ରହୁଛନ୍ତି, ତେବେ ଆପଣଙ୍କ ପାଇଁ ଏକ ଭଲ ଖବର ରହିଛି। ଜୁଲାଇ ମାସରେ ଉତ୍ତର ପ୍ରଦେଶରେ ବିଦ୍ୟୁତ ଦର ୪.୪୩ ପ୍ରତିଶତ ପର୍ଯ୍ୟନ୍ତ ଶସ୍ତା ହେବାକୁ ଯାଉଛି। ଏହାର ସିଧାସଳଖ ଅର୍ଥ ହେଉଛି ଏହି ମାସରେ ଆପଣଙ୍କ ବିଜୁଳି ବିଲ୍ କମିଯିବ। ଗତ ୧୫ ମାସ ମଧ୍ୟରେ ରାଜ୍ୟର ଗ୍ରାହକଙ୍କୁ ମିଳିବାକୁ ଥିବା ଏହା ସବୁଠାରୁ ବଡ଼ ମାସିକ ଆଶ୍ୱସ୍ତି।
ସାଧାରଣତଃ ଗ୍ରୀଷ୍ମ ଋତୁରେ ବିଦ୍ୟୁତ ଚାହିଦା ବଢିବା ଯୋଗୁଁ ଦର ବୃଦ୍ଧି ହେବାର ଆଶଙ୍କା ଥାଏ, କିନ୍ତୁ ଫ୍ୟୁଏଲ୍ ସରଚାର୍ଜରେ ୪.୪୩% ର ଏହି ହ୍ରାସ ଗ୍ରାହକଙ୍କ ପାଇଁ କୌଣସି ବଡ଼ ଆଶ୍ୱସ୍ତିରୁ କମ୍ ନୁହେଁ। ଗ୍ରାହକମାନେ ଜୁଲାଇ ମାସର ବିଲିଂ ଚକ୍ରରେ ଏହି ପରିବର୍ତ୍ତନ ସ୍ପଷ୍ଟ ଭାବେ ଦେଖିବାକୁ ପାଇବେ।
ଉତ୍ତର ପ୍ରଦେଶ ପାୱାର କର୍ପୋରେସନ୍ ଲିମିଟେଡ୍ (UPPCL), ଉତ୍ତର ପ୍ରଦେଶ ବିଦ୍ୟୁତ ନିୟାମକ ଆୟୋଗ (UPERC) ର ନିର୍ଦ୍ଦେଶ ପରେ ଜୁଲାଇ ମାସ ପାଇଁ ଏକ ନୂତନ ସଂଶୋଧିତ ଆଦେଶ ଜାରି କରିଛି। ପ୍ରକୃତରେ, ‘ଫ୍ୟୁଏଲ୍ ଆଣ୍ଡ ପାୱାର ପର୍ଚେଜ୍ ଆଡଜଷ୍ଟମେଣ୍ଟ ସରଚାର୍ଜ’ (FPPAS) ଅର୍ଥାତ୍ ଇନ୍ଧନ ଅଧିଭାର ଶୁଳ୍କର ଦର ଏଥର ମାଇନସ୍ (ନେଗେଟିଭ୍) କୁ ଚାଲିଯାଇଛି। ଏପ୍ରିଲ୍ ୨୦୬ ରେ ବିଦ୍ୟୁତ କ୍ରୟର ଯେଉଁ ପ୍ରକୃତ ଖର୍ଚ୍ଚ ହୋଇଥିଲା, ସେହି ଆଧାରରେ ଏହି ଗଣନା କରାଯାଇଛି। ଏପ୍ରିଲ୍ ମାସରେ ଏହି ଗଣନା ମାଇନସ୍ ୪.୪୩ ପ୍ରତିଶତ ରେକର୍ଡ କରାଯାଇଥିଲା, ଯାହାର ସିଧାସଳଖ ଲାଭ ଏବେ ଜୁଲାଇ ବିଲ୍ରେ ଗ୍ରାହକଙ୍କୁ ମିଳିବାକୁ ଯାଉଛି।
ରାଜ୍ୟର ସମସ୍ତ ଶ୍ରେଣୀର ଗ୍ରାହକ (ଘରୋଇ, ବ୍ୟବସାୟିକ ଏବଂ ଗ୍ରାମୀଣ)ଙ୍କୁ ମୋଟ ମିଶାଇ ପ୍ରାୟ ୩୫୮.୩୧ କୋଟି ଟଙ୍କାର ସିଧାସଳଖ ଲାଭ ମିଳିବ। ଏହାପୂର୍ବରୁ ଗ୍ରାହକଙ୍କୁ ମାର୍ଚ୍ଚ ୨୦୬ ର ବିଲ୍ରେ ୨.୪୨ ପ୍ରତିଶତର ଆଶ୍ୱସ୍ତି ମିଳିଥିଲା, କିନ୍ତୁ ଏଥରର ଆଶ୍ୱସ୍ତି ତା’ଠାରୁ ଅନେକ ଗୁଣା ବଡ଼।
