କେନ୍ଦ୍ର ସରକାରଙ୍କ ବଡ଼ ନିଷ୍ପତ୍ତି, ପୁଣି କମିଲା ଉଜ୍ଜ୍ୱଳା ସବସିଡ୍ ଗ୍ୟାସ୍ ସଂଖ୍ୟା, ଏବେ ୯ ବଦଳରେ ମିଳିବ ୪…

ନୂଆଦିଲ୍ଲୀ: କେନ୍ଦ୍ର ସରକାର ଆଜି (ସୋମବାର) ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା (PMUY) ଅଧୀନରେ ହିତାଧିକାରୀ ମାନଙ୍କ ପାଇଁ ଉପଲବ୍ଧ ସବସିଡିଯୁକ୍ତ ରୋଷେଇ ଗ୍ୟାସ ସିଲିଣ୍ଡର ସଂଖ୍ୟାକୁ ବହୁ ପରିମାଣରେ ହ୍ରାସ କରିଛନ୍ତି।ଏହି ଯୋଜନା ଅଧୀନରେ ହିତାଧିକାରୀ ମାନେ ବର୍ତ୍ତମାନ ବାର୍ଷିକ କେବଳ ଚାରୋଟି ସବସିଡିଯୁକ୍ତ LPG ସିଲିଣ୍ଡର ପାଇବେ, ଯାହା ପୂର୍ବରୁ ୯ ଟି ଥିଲା।

ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟର ଅତିରିକ୍ତ ସଚିବ ପ୍ରବୀଣ ମଲ ଖାନୁଜା କହିଛନ୍ତି ଯେ ଉଜ୍ଜ୍ୱଳା ହିତାଧିକାରୀଙ୍କ ହାରାହାରି ବାର୍ଷିକ ବ୍ୟବହାରକୁ ଧ୍ୟାନରେ ରଖି ଏହି ନିଷ୍ପତ୍ତି ନିଆଯାଇଛି। ସରକାର ବିଶ୍ୱାସ କରନ୍ତି ଯେ ଅଧିକାଂଶ ହିତାଧିକାରୀ ପ୍ରତିବର୍ଷ ପ୍ରାୟ ଏତେ ପରିମାଣର ଗ୍ୟାସ ବ୍ୟବହାର କରନ୍ତି ।

ପୂର୍ବରୁ ବାର୍ଷିକ ୧୨ଟି ସବସିଡିଯୁକ୍ତ LPG ସିଲିଣ୍ଡର ଯୋଗାଇ ଦିଆଯାଉଥିଲା…

ଏଠାରେ ଉଲ୍ଲେଖନୀୟ ଯେ ମେ ୨୦୧୬ ରେ ଆରମ୍ଭ ହୋଇଥିବା ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା ଅଧୀନରେ, ହିତାଧିକାରୀ ମାନଙ୍କୁ ପ୍ରାରମ୍ଭରେ ପ୍ରତିବର୍ଷ ୧୨ଟି ସବସିଡିଯୁକ୍ତ ୧୪.୨ କିଲୋଗ୍ରାମ LPG ସିଲିଣ୍ଡର ଯୋଗାଇ ଦିଆଯାଉଥିଲା। ଗତ ବର୍ଷ ଏହି ସଂଖ୍ୟା ୯ କୁ ହ୍ରାସ ପାଇଥିଲା ଏବଂ ଏବେ ଏହାକୁ ଆହୁରି ହ୍ରାସ କରି ୪ କୁ ରଖାଯାଇଛି। ମେ ୨୦୨୨ ରେ ସରକାର ସ୍ୱଚ୍ଛ ଇନ୍ଧନକୁ ପ୍ରୋତ୍ସାହିତ କରିବା ଏବଂ ରୋଷେଇ ଗ୍ୟାସକୁ ସୁଲଭ କରିବା ପାଇଁ ପ୍ରତି ୧୪.୨ କିଲୋଗ୍ରାମ ଏଲପିଜି ସିଲିଣ୍ଡର ପାଇଁ ୨୦୦ ଟଙ୍କାର ସବସିଡି ଆରମ୍ଭ କରିଥିଲେ। ସିଲିଣ୍ଡର କିଣିବା ପରେ ଏହି ପରିମାଣ ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ସ୍ଥାନାନ୍ତରିତ ହୁଏ। ଅକ୍ଟୋବର ୨୦୨୩ ରେ ଏହି ସବସିଡି ପ୍ରତି ସିଲିଣ୍ଡର ପାଇଁ ୩ଶହକୁ ବୃଦ୍ଧି କରାଯାଇଥିଲା। ୫ କିଲୋଗ୍ରାମ ସିଲିଣ୍ଡର ପାଇଁ ଏକ ଆନୁପାତିକ ଲାଭ ମଧ୍ୟ ପ୍ରଦାନ କରାଯାଏ।

ଉଜ୍ଜ୍ୱଳା ହିତାଧିକାରୀ ମାନେ କେତେ ଟଙ୍କାରେ ଏକ ସିଲିଣ୍ଡର ପାଆନ୍ତି ?

ଏହି ନିଷ୍ପତ୍ତି ଏପରି ସମୟରେ ଆସିଛି ଯେତେବେଳେ ରୋଷେଇ ଗ୍ୟାସର ମୂଲ୍ୟ ନିରନ୍ତର ବୃଦ୍ଧି ପାଉଛି। ଦିଲ୍ଲୀରେ ୧୪.୨ କିଲୋଗ୍ରାମ ଘରୋଇ ଏଲପିଜି ସିଲିଣ୍ଡରର ମୂଲ୍ୟ ଗତ ତିନି ମାସରେ ଦୁଇଥର ବୃଦ୍ଧି ପାଇଛି, ଯାହା ମୋଟ ୮୯ ଟଙ୍କା ବୃଦ୍ଧି ପାଇଛି। ଜୁନ ୭ ରେ ସଦ୍ୟତମ ବୃଦ୍ଧି ପରେ, ଏହାର ମୂଲ୍ୟ ପ୍ରତି ସିଲିଣ୍ଡର ପାଇଁ ୯୪୨ ଟଙ୍କାରେ ପହଞ୍ଚିଛି। ତଥାପି, ୩ ଶହ ଟଙ୍କା ସବସିଡି ପାଇବା ପରେ, ଉଜ୍ଜ୍ୱଳା ହିତାଧିକାରୀ ମାନେ ଏହି ସିଲିଣ୍ଡର ୬୪୨ ଟଙ୍କାରେ ପାଆନ୍ତି ।

ଏହା ସହ ପଢନ୍ତୁ : 'ତୁରନ୍ତ ଗୁଳିମାଡ଼ ବନ୍ଦ କର,' ଉଚ୍ଚ ଉତ୍ତେଜନା ମଧ୍ୟରେ ଇରାନ ଏବଂ ଇସ୍ରାଏଲକୁ ଡୋନାଲ୍ଡ ଟ୍ରମ୍ପଙ୍କ କଡ଼ା ଚେତାବନୀ…​​​​​​​