‘ଆପଣଙ୍କ ମୁହଁ ଖୋଲୁନାହିଁ, କିଏ ସିଲ୍ କରିଦେଇଛି…’, ଶାହାଙ୍କୁ ଖାର୍ଗେଙ୍କ କଡ଼ା ଟାର୍ଗେଟ
ନୂଆଦିଲ୍ଲୀ,୩୦।୭: ରାଜ୍ୟ ସଭାରେ ପେପର ଲିକ୍ ପ୍ରସଙ୍ଗକୁ ନେଇ ଆଲୋଚନା ସମୟରେ ମଲ୍ଲିକାର୍ଜୁନ ଖାର୍ଗେ କେନ୍ଦ୍ର ସରକାର ଏବଂ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ କଡ଼ା ସମାଲୋଚନା କରିଛନ୍ତି । ଗୁରୁବାର ଦିନ ଉଚ୍ଚ ସଦନରେ ବକ୍ତବ୍ୟ ଦେଇ ଖାର୍ଗେ କହିଛନ୍ତି, “ଯେଉଁମାନେ ପ୍ରଶ୍ନପତ୍ର ଚୋରି କରିଥିଲେ ସେମାନେ ଖସି ଚାଲିଯାଉଛନ୍ତି ଏବଂ ଯେଉଁମାନେ କଠିନ ପରିଶ୍ରମ କରୁନ୍ତି ସେମାନେ ପରିଣାମ ଭୋଗୁଛନ୍ତି। ଏହା କି ପ୍ରକାରର ନ୍ୟାୟ?” ସେ ପ୍ରଶ୍ନ କରିଥିଲେ ଯେ ପେପର ଲିକ୍ ଯୋଗୁଁ କେତେ ନିରୀହ ଛାତ୍ରଙ୍କ ଭବିଷ୍ୟତ ପ୍ରଭାବିତ ହୋଇଥିଲା, କେତେ ଲୋକ ଆହତ ହୋଇଥିଲେ ଏବଂ କେତେ ଅଭିଭାବକ ଦୁଃଖରେ ପଡ଼ିଥିଲେ। ସେ ଅମିତ ଶାହାଙ୍କୁ ପଚାରିଥିଲେ ଯେ ସେ କାହିଁକି କିଛି କହୁନାହାନ୍ତି । ପାଟି କେହି ବନ୍ଦ କରିଦେଇଛି କି ବୋଲି ପ୍ରଶ୍ନ କରିଥିଲେ ।
ଖାର୍ଗେ ମନ୍ତବ୍ୟ ଦେଇଥିଲେ ଯେ ନୂତନ ବିଲ୍ କେବଳ ସଂଖ୍ୟା ପରିବର୍ତ୍ତନ କରେ କିନ୍ତୁ ମୂଳ ସମସ୍ୟାର ସମାଧାନ କରିବାରେ ବିଫଳ ହୁଏ। ସେ ଦୃଢ଼ ଭାବରେ କହିଥିଲେ ଯେ ପ୍ରକୃତ ଆବଶ୍ୟକତା ହେଉଛି ପରୀକ୍ଷା ବ୍ୟବସ୍ଥାକୁ ଏପରି ଭାବରେ ମଜବୁତ କରିବା ଯାହା ଦ୍ୱାରା ପ୍ରଥମରୁ ପେପର ଲିକ୍ ନହୁଏ। ସେ ସରକାରଙ୍କୁ ପ୍ରଶ୍ନ କରିଥିଲେ ଯେ ୨୦୨୪ରେ ଏହି ପଦକ୍ଷେପ କାହିଁକି ନିଆଯାଇ ନଥିଲା। ତାଙ୍କ ଅନୁସାରେ, ସେହି ସମୟରେ ଲୋକ ସଭା ନିର୍ବାଚନ ପାଖେଇ ଆସୁଥିଲା, ଏବଂ ସରକାର ରାଜନୈତିକ କାରଣରୁ ଏପରି ପଦକ୍ଷେପ ନେବାକୁ ଚାହୁଁ ନଥିଲେ।
ରାଜ୍ୟ ସଭାରେ ଆଲୋଚନା ବେଳେ ମଲ୍ଲିକାର୍ଜୁନ ଖାର୍ଗ ରାହୁଲ ଗାନ୍ଧୀଙ୍କ ଭାରତ ଯୋଡ଼ୋ ନ୍ୟାୟ ଯାତ୍ରା ନେଇ ଉଲ୍ଲେଖ କରିଥିଲେ । ଏହି ଯାତ୍ରା ସମୟରେ ରାହୁଲ ଗାନ୍ଧୀ ଲଗାତାର ପେପର ଲିକ୍ ଏବଂ ଯୁବକଙ୍କ ସମସ୍ୟା ଉଠାଇ ଆସୁଥିଲେ। ସେ ଅଭିଯୋଗ କରିଥିଲେ ଯେ, ବିରୋଧୀ ଦଳକୁ ଶ୍ରେୟ ମିଳିବା ଭୟରେ ସରକାର ସେତେବେଳେ କୌଣସି ପଦକ୍ଷେପ ନେଇନଥିଲେ। ପରୀକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପରିବର୍ତ୍ତେ ସରକାର ଏଭଳି ଏକ ଆଇନ ଆଣିଥିଲେ, ଯାହାକୁ ଦୁଇ ବର୍ଷ ମଧ୍ୟରେ ସଂଶୋଧନ କରିବାକୁ ପଡ଼ିଛି । ତାଙ୍କ ମତରେ, ଏହି ବିଧେୟକ ସମସ୍ୟାର ସମାଧାନ ନୁହେଁ, ବରଂ ବର୍ତ୍ତମାନର ପରିସ୍ଥିତିକୁ ଶାନ୍ତ କରିବାର ଏକ ପ୍ରୟାସ। ଯୁବକଙ୍କ ବ୍ୟାପକ ବିରୋଧ ପରେ ସରକାର ବୁଝିପାରିଲେ ଯେ, ଆନ୍ଦୋଳନ ଆହୁରି ବଢ଼ିଲେ ରାଜନୈତିକ କ୍ଷତି ସହିବାକୁ ପଡ଼ିପାରେ । ସେହି କାରଣରୁ ସରକାର ଛାତ୍ରୀଛାତ୍ରଙ୍କ କିଛି ଦାବି ମାନିବାକୁ ବାଧ୍ୟ ହୋଇଥିବା ଅଭିଯୋଗ ସେ କରିଥିଲେ।
ଖାର୍ଗେ କହିଛନ୍ତି, CJPର ଆନ୍ଦୋଳନ ଏବଂ ବଢ଼ୁଥିବା ଚାପ ଯୋଗୁଁ ସରକାର ଧର୍ମେନ୍ଦ୍ର ପ୍ରଧାନଙ୍କୁ ଶିକ୍ଷାମନ୍ତ୍ରୀ ପଦରୁ ହଟାଇଛନ୍ତି। ସେ ଅଭିଯୋଗ କରିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ସରକାର ଏବଂ ପଦବୀ ବଞ୍ଚାଇବା ପାଇଁ ଏହି ପଦକ୍ଷେପ ନେଇଛନ୍ତି।।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
