ଅଙ୍ଗ ନଦୀ ବନ୍ୟା ପାଣି ଘେରରେ ଦିଗଶିରା ଗ୍ରାମ, ବ୍ରିଜରେ କାମ କରୁଥିବା ବେଳେ ଫସିଥିବା ୨୦ ଶ୍ରମିକ ଉଦ୍ଧାର
ଡୁଙ୍ଗୁରିପାଲି, ୨୯।୭(ଦୀନବନ୍ଧୁ ସୁନା): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକ ଅନ୍ତର୍ଗତ ଦିଗଶିରା ଗ୍ରାମ ବର୍ତ୍ତମାନ ଅଙ୍ଗ ନଦୀର ବନ୍ୟା ପାଣି ଘେରରେ ରହିଛି। ଉପରମୁଣ୍ଡରେ ଲଘୁଚାପ ଜନିତ ପ୍ରବଳ ବର୍ଷା ଯୋଗୁ ଅଙ୍ଗ ନଦୀରେ ବନ୍ୟାଜଳ ଆସି ଦୁଇ କୂଳ ଉଛୁଳି ପ୍ରବାହିତ ହେଉଛି। ନଦୀର ଜଳସ୍ତର ବୃଦ୍ଧି ପାଇବାରୁ ଗ୍ରାମର ନଦୀ ପାର୍ଶ୍ୱବର୍ତ୍ତୀ ଆଡିବନ୍ଧା ତଳପଟୁ ବନ୍ୟା ପାଣି ଗ୍ରାମ ଭତରକୁ ପ୍ରବେଶ କରି ବ୍ୟାପକ ଜଳମଗ୍ନ ପରିସ୍ଥିତି ସୃଷ୍ଟି କରିଛି।
ଗ୍ରାମର ତଳପଥେଇ ପଡ଼ା, ଧନୁଯାତ୍ରା ପଡ଼ିଆ ଏବଂ ଲେଞ୍ଜୀପଡ଼ାରେ ଥିବା ତିନୋଟି ଅଙ୍ଗନୱାଡ଼ି କେନ୍ଦ୍ର ପାଣି ଘେରରେ ରହିଛି। ଏହାଛଡ଼ା ଗଣ୍ଡାପଡ଼ା ଉପରମୁଣ୍ଡ ପଡ଼ା ମଧ୍ୟ ବନ୍ୟାଜଳ ଦ୍ୱାରା ପ୍ରଭାବିତ ହୋଇଛି। ଗତ ଦୁଇ ଦିନ ହେବ ଗ୍ରାମରେ ବିଦ୍ୟୁତ୍ ସରବରାହ ସମ୍ପୂର୍ଣ୍ଣ ବନ୍ଦ ରହିଛି।
ଅଙ୍ଗ ନଦୀରେ ଚାଲିଥିବା ବ୍ରିଜ୍ ନିର୍ମାଣ କାର୍ଯ୍ୟରେ ନିୟୋଜିତ ଥିବା ୨୦ ଜଣ ଶ୍ରମିକ ହଠାତ୍ ବନ୍ୟା ପାଣି ବଢ଼ିଯିବାରୁ ନଦୀ ଖଣ୍ଡିରେ ଫସି ରହିଥିଲେ। ଖବର ପାଇ ଡୁଙ୍ଗୁରିପାଲି ଅଗ୍ନୀଶମ ଭାରପ୍ରାପ୍ତ ଅଧିକାରୀ ରଶ୍ମିରଂଜନ ବାରିକ ଓ ତାଙ୍କ ଟିମ୍ ତତ୍ପରତା ପ୍ରକାଶ କରି ଘଟଣାସ୍ଥଳରେ ପହଞ୍ଚିଥିଲେ ଏବଂ ସମସ୍ତ ୨୦ ଜଣ ଶ୍ରମିକଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ଉଦ୍ଧାର ହୋଇଥିବା ଶ୍ରମିକମାନଙ୍କୁ ସ୍ଥାନୀୟ ବହୁମୁଖୀ ବନ୍ୟା ଆଶ୍ରୟସ୍ଥଳୀରେ ସୁରକ୍ଷିତ ଭାବେ ରଖାଯାଇଛି।
ସ୍ଥିତି ଅନୁଧ୍ୟାନ ପାଇଁ ରାମପୁର ଅତିରିକ୍ତ ତହସିଲଦାର ରୋହିତ କୁମାର ବାଗଙ୍କ ନିର୍ଦ୍ଦେଶ କ୍ରମେ ଚେରୁପାଲି ରାଜସ୍ୱ ନିରୀକ୍ଷକ (RI) ପ୍ରଭୃତି ଘଟଣାସ୍ଥଳ ପରିଦର୍ଶନ କରିଛନ୍ତି। ପଥେଇ ତଳିପଡ଼ାର ପ୍ରଭାବିତ ଦୁଇଟି ପରିବାରକୁ ପ୍ରଶାସନ ପକ୍ଷରୁ ପଲିଥିନ ଯୋଗାଯାଇଥିବା ଅତିରିକ୍ତ ତହସିଲଦାର ସୂଚନା ଦେଇଛନ୍ତି। ତେବେ ଉପରମୁଣ୍ଡରେ ଆଗକୁ ଆହୁରି ବର୍ଷା ହେଲେ ଦିଗଶିରା ଗ୍ରାମ ଅଧିକ କ୍ଷତିଗ୍ରସ୍ତ ହେବା ଆଶଙ୍କା ରହିଛି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
