RJD, BJP ନା କଂଗ୍ରେସ; କାହା ସହ ମେଣ୍ଟ କରିବେ ପ୍ରଶାନ୍ତ କିଶୋର? ନିଜେ କଲେ ବଡ଼ ଖୁଲାସା
ପାଟନା,୪।୮: ଜନ ସୁରାଜ ପାର୍ଟିର ସଂସ୍ଥାପକ ପ୍ରଶାନ୍ତ କିଶୋର କୌଣସି ରାଜନୈତିକ ଦଳ ସହ ମେଣ୍ଟ କରିବାର ସମ୍ଭାବନାକୁ ଖଣ୍ଡନ କରି କହିଛନ୍ତି ଯେ, ବାଙ୍କିପୁର ବିଧାନସଭା ଉପନିର୍ବାଚନରେ ତାଙ୍କ ବିଜୟ ଭାରତୀୟ ଜନତା ପାର୍ଟି (ଭାଜପା), କଂଗ୍ରେସ ଏବଂ ରାଷ୍ଟ୍ରୀୟ ଜନତା ଦଳ (ଆରଜେଡି) ଭଳି ଦଳଗୁଡ଼ିକର ଅସନ୍ତୁଷ୍ଟ ସମର୍ଥକଙ୍କ ସହଯୋଗ ଯୋଗୁ ସମ୍ଭବ ହୋଇଛି। ଭାଜପା ପ୍ରାର୍ଥୀ ନୀରଜ କୁମାର ସିହ୍ନାଙ୍କୁ ୧୯ ହଜାରରୁ ଅଧିକ ଭୋଟରେ ପରାସ୍ତ କରିବା ପରେ ପ୍ରଶାନ୍ତ କିଶୋର ଖବରଦାତାମାନଙ୍କ ସହ ଆଲୋଚନା ବେଳେ ଏହି କଥା କହିଥିଲେ।
୧୯୯୫ରୁ ବାଙ୍କିପୁର ବିଧାନସଭା ଆସନରେ ଭାଜପା କ୍ରମାଗତ ଭାବେ ବିଜୟ ହାସଲ କରିଆସୁଥିଲା। ସେ ଏବେ ଏକାକୀ ନିର୍ବାଚନ ଲଢ଼ିବାର ନୀତି ଉପରେ ପୁନର୍ବିଚାର କରିବେ କି ନାହିଁ ବୋଲି ପଚରାଯିବାରୁ ପ୍ରଶାନ୍ତ କିଶୋର କହିଥିଲେ,
“ଆମେ କାହା ସହ ମେଣ୍ଟ କରିବୁ ନାହିଁ। ଆମର ମେଣ୍ଟ କେବଳ ବିହାରର ଜନତାଙ୍କ ସହ ହେବ। ଆପଣମାନେ ଦେଖିଛନ୍ତି, ବାଙ୍କିପୁରର ଜନତା ପାରମ୍ପରିକ ରାଜନୈତିକ ଦଳଗୁଡ଼ିକୁ ଛାଡ଼ି ଆମକୁ ସମର୍ଥନ କରିଛନ୍ତି।”
ପ୍ରଶାନ୍ତ କିଶୋର କହିଛନ୍ତି, “ମୁଁ ସାଧାରଣ ନାଗରିକଙ୍କ ସହ ସେହି ଲୋକମାନଙ୍କୁ ମଧ୍ୟ କୃତଜ୍ଞତା ଜଣାଇବାକୁ ଚାହୁଁଛି, ଯେଉଁମାନେ ଜନ ସୁରାଜର ସଦସ୍ୟ ନ ହୋଇ ମଧ୍ୟ ଆମକୁ ସହଯୋଗ କରିଛନ୍ତି। ଏଭଳି ଲୋକ ଭାଜପା, ଆରଜେଡି ଏବଂ କଂଗ୍ରେସ ସମେତ ସମସ୍ତ ଦଳରେ ଥିଲେ।”
ଉଲ୍ଲେଖଯୋଗ୍ୟ ଯେ, ଗତବର୍ଷ ହୋଇଥିବା ବିହାର ବିଧାନସଭା ନିର୍ବାଚନରେ ଜନ ସୁରାଜ ପାର୍ଟି ଗୋଟିଏ ମଧ୍ୟ ଆସନ ଜିତିପାରି ନଥିଲା। ଏପରି ସ୍ଥିତିରେ ବାଙ୍କିପୁର ଉପନିର୍ବାଚନରେ ମିଳିଥିବା ଏହି ବିଜୟକୁ ନବଗଠିତ ଦଳ ପାଇଁ ଏକ ବଡ଼ ସଫଳତା ବୋଲି ଧରାଯାଉଛି। ପ୍ରଶାନ୍ତ କିଶୋର ଲଗାତାର ଏହି ଉପନିର୍ବାଚନକୁ ଭାଜପା ନେତୃତ୍ୱାଧୀନ ବିହାର ସରକାର ବିରୋଧରେ ଏକ ‘ଜନମତ ସଂଗ୍ରହ’ ବୋଲି କହିଆସୁଥିଲେ।
Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
