PM Modi Indonesia Visit: ଏହି ଦେଶରେ ୯୦% ମୁସଲିମ୍‌, ପୂଜା ପାଉଛନ୍ତି ରାମ-କୃଷ୍ଣ; ମାନ୍ୟତା ପାଇଛି ରାମାୟଣ-ମହାଭାରତ !

ନୂଆଦିଲ୍ଲୀ, ୬।୭: ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜର ତିନି ଦେଶ ଗସ୍ତର ପ୍ରଥମ ପର୍ଯ୍ୟାୟରେ ଇଣ୍ଡୋନେସିଆରେ ପହଞ୍ଚିବେ । ଏହି ଗସ୍ତ ଦୁଇ ଦେଶ ମଧ୍ୟରେ ଆର୍ଥିକ, ପ୍ରତିରକ୍ଷା ଏବଂ ସାଂସ୍କୃତିକ ସମ୍ପର୍କକୁ ଅଧିକ ମଜଭୁତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି କୁହାଯାଉଛି । ତେବେ ଏହା ବ୍ୟତୀତ ଆଉ ଏକ ବିଶେଷ କାରଣ ରହିଛି, ଯାହା ଭାରତ ଓ ଇଣ୍ଡୋନେସିଆକୁ ସାଂସ୍କୃତିକ ଭାବେ ପରସ୍ପରର ଅତି ନିକଟତର କରେ । ସମସ୍ତେ ଜାଣନ୍ତି ଯେ ଇଣ୍ଡୋନେସିଆ ହେଉଛି ବିଶ୍ୱର ସବୁଠାରୁ ବଡ଼ ମୁସଲିମ୍ ବହୁଳ ଦେଶ, କିନ୍ତୁ ଏଠାରେ କାହିଁ କେଉଁ କାଳରୁ ହିନ୍ଦୁ ଲୋକ ବସବାସ କରୁଛନ୍ତି । ସବୁଠାରୁ ଖାସ୍ କଥା ହେଉଛି, ଇଣ୍ଡୋନେସିଆର 'ବାଲି' ଦ୍ୱୀପରେ ହିନ୍ଦୁମାନେ ସଂଖ୍ୟାଗରିଷ୍ଠ ଏବଂ ସେମାନେ ସେଠାରେ ଅତ୍ୟନ୍ତ ଶାନ୍ତି ଓ ସ୍ୱାଧୀନତାର ସହ ନିଜ ଜୀବନ ଅତିବାହିତ କରୁଛନ୍ତି ।

ଭାରତ ଏବଂ ଇଣ୍ଡୋନେସିଆ ମଧ୍ୟରେ ସମ୍ପର୍କ ନୂଆ ନୁହେଁ । ଯୀଶୁଖ୍ରୀଷ୍ଟଙ୍କ ଜନ୍ମ ପୂର୍ବରୁ ଅର୍ଥାତ୍ ପ୍ରାଚୀନ କାଳରୁ ହିଁ ଭାରତୀୟ ବ୍ୟବସାୟୀ ଏବଂ ନାବିକମାନେ ସେଠାକୁ ଯାତାୟାତ କରୁଥିଲେ । ଏହି କାରଣରୁ ସେଠାରେ ହିନ୍ଦୁ ଏବଂ ବୌଦ୍ଧ ଧର୍ମର ଗଭୀର ପ୍ରଭାବ ପଡ଼ିଥିଲା । ପ୍ରାଚୀନ ସମୟରେ ସେଠାରେ ଶ୍ରୀବିଜୟା, ମଜାପହିତ ଏବଂ ଗଜାହ ମଧା ଭଳି ସାମ୍ରାଜ୍ୟ ଗଢ଼ିଉଠିଥିଲା, ଯାହାଙ୍କ ନାମ ଏବଂ ସଂସ୍କୃତିରେ ଭାରତୀୟ ସ୍ପର୍ଶ ସ୍ପଷ୍ଟ ବାରି ହୋଇପଡ଼େ । ଏପରିକି ଇଣ୍ଡୋନେସିଆର ସରକାରୀ ଭାଷା ‘ବହାସା ଇଣ୍ଡୋନେସିଆରେ ମଧ୍ୟ ଅନେକ ସଂସ୍କୃତ ଶବ୍ଦ ରହିଛି, ଯାହା ଏହି ସମ୍ପର୍କକୁ ଆହୁରି ନିବିଡ଼ କରିଥାଏ ।

ଇଣ୍ଡୋନେସିଆର ନାଗରିକମାନେ ମହାଭାରତ ଏବଂ ରାମାୟଣକୁ ନିଜର ଗ୍ରନ୍ଥ ଓ ସଂସ୍କୃତିର ଏକ ଅଂଶ ବୋଲି ମାନନ୍ତି । ସେମାନଙ୍କର ବିଭିନ୍ନ ଉତ୍ସବ, ପାରମ୍ପରିକ ନୃତ୍ୟ ଏବଂ କଣ୍ଢେଇ ନାଚରେ ଅର୍ଜୁନ, ହନୁମାନ, କୌରବ ଏବଂ ଶ୍ରୀରାମଙ୍କ ଭଳି ଚରିତ୍ର ଦେଖିବାକୁ ମିଳନ୍ତି । ଇଣ୍ଡୋନେସିଆରେ ଏହି ଗ୍ରନ୍ଥଗୁଡ଼ିକର ନାମ ନେଲେ ସେଠାକାର ଲୋକେ ଏହାକୁ ନିଜର ବୋଲି କହିଥାନ୍ତି । କାହାଣୀରେ ସାମାନ୍ୟ ପରିବର୍ତ୍ତନ ଥାଇପାରେ, କିନ୍ତୁ ଏହାର ମୂଳ ଚରିତ୍ର ଓ ବିଷୟବସ୍ତୁ ସମାନ ରହିଛି । ଭାରତ ଭଳି ସେଠାରେ ମଧ୍ୟ ଦଶହରା ପୂର୍ବରୁ ରାମଲୀଳା ଆୟୋଜନ କରାଯାଏ, ଯେଉଁଠି କଳାକାରମାନେ ରାମାୟଣର ଚରିତ୍ର ଅନୁଯାୟୀ ବେଶଭୂଷା ହୋଇ ଅଭିନୟ କରନ୍ତି । ଆଶ୍ଚର୍ଯ୍ୟର କଥା ହେଉଛି, ଏହି ରାମଲୀଳାରେ ଉଭୟ ହିନ୍ଦୁ ଏବଂ ମୁସଲିମ୍ କଳାକାର ଏକାଠି ଅଭିନୟ କରିଥାନ୍ତି ।

ଏହା ବି ପଢ଼ନ୍ତୁ... Ram Mandir Donation Theft: ରାମ ମନ୍ଦିର ପାଇଁ କାଶୀ ବିଶ୍ୱନାଥ ମଡେଲ୍‌ ! ୪୪ ବର୍ଷ ତଳର ଗୋଟିଏ ଚୋରି ବଦଳାଇ ଦେଇଥିଲା ସବୁକିଛି...  

ଇଣ୍ଡୋନେସିଆର ସବୁଠାରୁ ଆକର୍ଷଣୀୟ ସ୍ଥାନ ହେଉଛି ବାଲି ଦ୍ୱୀପ, ଯେଉଁଠାରେ ହିନ୍ଦୁମାନେ ସଂଖ୍ୟାଗରିଷ୍ଠ । ଭାରତରୁ ପ୍ରତିବର୍ଷ ବିପୁଳ ସଂଖ୍ୟାରେ ପର୍ଯ୍ୟଟକ ଏଠାକୁ ବୁଲିବାକୁ ଯାଆନ୍ତି । ବିବିସିର ଏକ ରିପୋର୍ଟ ଅନୁଯାୟୀ, ଏଠାକାର ହିନ୍ଦୁ ଧର୍ମ ପାଳନ ଶୈଳୀ ଭାରତଠାରୁ ସାମାନ୍ୟ ଭିନ୍ନ ହୋଇପାରେ, କିନ୍ତୁ ସେମାନଙ୍କର ମନ୍ଦିର, ପର୍ବପର୍ବାଣୀ ଏବଂ ପରମ୍ପରା ସମ୍ପୂର୍ଣ୍ଣ ଭାବେ ଭାରତୀୟ ସଂସ୍କୃତି ସହ ଜଡ଼ିତ । ଏହି ଦେଶରେ ବିଶ୍ୱର ସବୁଠାରୁ ବଡ଼ ବୌଦ୍ଧ ସ୍ତୁପ ‘ବୋରୋବୁଦୁର’ ଏବଂ ପ୍ରସିଦ୍ଧ ‘ପ୍ରାମ୍ବନନ୍’ ହିନ୍ଦୁ ମନ୍ଦିର କମ୍ପ୍ଲେକ୍ସ ଭଳି ସ୍ମାରକୀ ରହିଛି, ଯାହା ଏହାର ପ୍ରାଚୀନ ଐତିହ୍ୟର ପ୍ରମାଣ ଦିଏ ।

ସମଗ୍ର ଇଣ୍ଡୋନେସିଆରେ ହିନ୍ଦୁମାନେ ସଂଖ୍ୟାଲଘୁ ଅଟନ୍ତି । ମୋଟ୍ ଜନସଂଖ୍ୟାର ପ୍ରାୟ ୧.୭% ରୁ ୨% ଲୋକ ହିନ୍ଦୁ, କିନ୍ତୁ ସେମାନଙ୍କୁ ସମ୍ପୂର୍ଣ୍ଣ ଧାର୍ମିକ ସ୍ୱାଧୀନତା ମିଳିଛି । ବାଲିରେ ହିନ୍ଦୁମାନେ ବହୁସଂଖ୍ୟାରେ ଥିବାରୁ ସେଠାରେ ସମସ୍ତ ହିନ୍ଦୁ ପରମ୍ପରା ଧୁମଧାମରେ ପାଳନ କରାଯାଏ । ସେଠାକାର ସରକାର ମଧ୍ୟ ଏହି ସାଂସ୍କୃତିକ ଐତିହ୍ୟକୁ ସଂରକ୍ଷଣ ଦେଉଛନ୍ତି । ଏପରିକି ସରକାରୀ ସ୍ତରରେ ମଧ୍ୟ ମହାଭାରତ ଓ ରାମାୟଣ ଉପରେ ଆଧାରିତ କାର୍ଯ୍ୟକ୍ରମ ଆୟୋଜିତ ହୋଇଥାଏ । ଯଦିଓ ବିଗତ କିଛି ବର୍ଷ ହେବ ସେଠାରେ ଚରମପନ୍ଥୀ ଚିନ୍ତାଧାରା ସାମାନ୍ୟ ବୃଦ୍ଧି ପାଇଛି, ତଥାପି ବାଲି ଭଳି ଅଞ୍ଚଳରେ ସାଂସ୍କୃତିକ ସଦ୍ଭାବନା ଆଜି ବି ଅତୁଟ ରହିଛି । ଇଣ୍ଡୋନେସିଆର ସରକାରୀ ଦର୍ଶନ ‘ପଞ୍ଚ ସିଲା’ ମଧ୍ୟ ବିବିଧତା ମଧ୍ୟରେ ଏକତା ଉପରେ ଆଧାରିତ, ଯାହା ଭାରତର ମୂଳ ମନ୍ତ୍ର ସହ ସମାନ । ଇଣ୍ଡୋନେସିଆ ଭଳି ଏକ ମୁସଲିମ୍ ବହୁଳ ଦେଶରେ ହିନ୍ଦୁ ଗ୍ରନ୍ଥ ଏବଂ ମୂର୍ତ୍ତି ପ୍ରତି ଥିବା ଏହି ସମ୍ମାନ ପ୍ରମାଣ କରେ ଯେ ଭାରତୀୟ ସଂସ୍କୃତିର ପ୍ରଭାବ କେତେ ବ୍ୟାପକ ଥିଲା । ପ୍ରଧାନମନ୍ତ୍ରୀ ମୋଦୀଙ୍କ ଏହି ଗସ୍ତ ଦ୍ୱାରା ଦୁଇ ଦେଶ ମଧ୍ୟରେ କେବଳ ଆର୍ଥିକ ଭାଗିଦାରୀ ବୃଦ୍ଧି ପାଇବ ନାହିଁ, ବରଂ ଏହି ସାଝା ସାଂସ୍କୃତିକ ସମ୍ପର୍କ ଆହୁରି ସୁଦୃଢ଼ ହେବ ବୋଲି ଆଶା କରାଯାଉଛି ।