ବଡ଼ଦେଉଳରେ ଦତ୍ତ ମହାପାତ୍ର-କମାଣ୍ଡର ଠେଲାପେଲା, ସେବକଙ୍କୁ ସେବାରୁ ନିଲମ୍ବନ କଲା ଶ୍ରୀମନ୍ଦିର ପ୍ରଶାସନ, ସିଂହଦ୍ୱାର ଥାନାରେ ଏତଲା
ପୁରୀ, ୧୬/୦୭: ବଡ଼ଦେଉଳ ଭିତରେ ଦତ୍ତ ମହାପାତ୍ର-କମାଣ୍ଡର ମୁହାଁମୁହିଁ । ବନକଲାଗି ଚାଲିଥିବା ବେଳେ ଶ୍ରୀଜଗନ୍ନାଥ ମନ୍ଦିର କମାଣ୍ଡର ଓ ପୂର୍ବତନ ନୀତି ପ୍ରଶାସକ ବଡ଼ଦେଉଳ ଭିତରକୁ ଆସିବାକୁ ବିରୋଧ କରି ଏହି ତୁମୁଳକାଣ୍ଡ ଘଟିଛି । ବନକଲାଗି ମହାପ୍ରଭୁଙ୍କ ଗୁପ୍ତ ନୀତି ହୋଇଥିବାରୁ ପ୍ରାଶାସନିକ ଅଧିକାରୀଙ୍କୁ ବିରୋଧ କରିଥିଲେ ପାଳିଆ ଦତ୍ତ ସେବକ ରଶ୍ମିରଞ୍ଜନ ଦତ୍ତ ମହାପାତ୍ର । ଉଭୟ ପକ୍ଷ ମଧ୍ୟରେ ପ୍ରଥମେ ଯୁକ୍ତିତର୍କ ଓ ପରେ ଠେଲାପେଲା ହୋଇଥିଲା । ଘଟଣାରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ବିଶୃଙ୍ଖଳା ସୃଷ୍ଟି କରିଥିବା ଅଭିଯୋଗରେ ରଶ୍ମିରଞ୍ଜନଙ୍କୁ ସେବାରୁ ନିଲମ୍ବନ କରାଯାଇଛି । ଅନ୍ୟପଟେ ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସିଂହଦ୍ୱାର ଥାନାରେ ଏନେଇ ଏତଲା ମଧ୍ୟ ଦିଆଯାଇଛି ।
ଅଧିକ ପଢ଼ନ୍ତୁ :- Rath Security: ଘୋଷଯାତ୍ରା ପାଇଁ ପୁରୀରେ ପୁଲିସ ଛାଉଣି; ୧୯ ଜଣ ଆଇପିଏସ୍, ୧୩ ହଜାର ପୁଲିସ ନିୟୋଜିତ, ଜଗିଛନ୍ତି NSG କମାଣ୍ଡୋ
ଶ୍ରୀମନ୍ଦିର ପ୍ରଶାସନ ପ୍ରେସ୍ ବାର୍ତ୍ତାରେ ଜଣାଇଛି ଯେ ଶ୍ରୀମନ୍ଦିରରେ ନୀତି ସମ୍ପାଦନରେ ଶୃଙ୍ଖଳା ରକ୍ଷା ପ୍ରତି ଶ୍ରୀଜଗନ୍ନାଥ ମନ୍ଦିର ପ୍ରଶାସନ ସର୍ବଦା ସର୍ବୋଚ୍ଚ ଗୁରୁତ୍ୱ ଦେଇଆସୁଛି । ବୁଧବାର ଉଭାପର୍ବରେ ନୀତିକାନ୍ତି ପାଳନ ସମୟରେ ଦତ୍ତ ମହାପାତ୍ର ସେବାୟତ ରଶ୍ମିରଞ୍ଜନ ଦତ୍ତ ମହାପାତ୍ର ବିଶୃଙ୍ଖଳ ଆଚରଣ ପ୍ରଦର୍ଶନ କରିଥିଲେ । ଏଥିପାଇଁ ଶ୍ରୀମନ୍ଦିର କମାଣ୍ଡରଙ୍କ ରିପୋର୍ଟ ଆଧାରରେ ମୁଖ୍ୟ ପ୍ରଶାସକ ସଂପୃକ୍ତ ସେବାୟତଙ୍କୁ ଅନ୍ୟାଦେଶ ପର୍ଯ୍ୟନ୍ତ ଶ୍ରୀମନ୍ଦିର ସେବାରୁ ନିଲମ୍ବନ କରିଛନ୍ତି । ସେହିପରି ରଥଯାତ୍ରା ନିମନ୍ତେ ମହାପ୍ରଭୁଙ୍କ ସମସ୍ତ ନୀତିକାନ୍ତି ସମୟାନୁବତ୍ତିର୍ତା, ଶୃଙ୍ଖଳା ଏବଂ ଭକ୍ତିଭାବର ସହ ସମ୍ପାଦିତ ହୋଇଚାଲିବ ବୋଲି ମୁଖ୍ୟ ପ୍ରଶାସକ ସୂଚନା ଦେଇଛନ୍ତି ।
ସୂଚନା ଥାଉକି, ମଙ୍ଗଳବାର ରାତି ପ୍ରାୟ ସାଢ଼େ ୪ଟାରେ ଦତ୍ତ ମହାପାତ୍ର ବନକଲାଗି ନିମନ୍ତେ ବଡ଼ଦେଉଳରେ ପ୍ରବେଶ କରିଥିଲେ । ବନକଲାଗି ସାରି ସକାଳ ୯ଟାରେ ବାହାରିଥିଲେ । ପରେ ମହାପ୍ରଭୁଙ୍କ ମଙ୍ଗଳଆଳତି ଓ ଅନ୍ୟାନ୍ୟ ନୀତି ହୋଇଥିଲା ।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ PRAMEYA - ପ୍ରମେୟ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
