୩ ଜିଲାର ସୀମାରେ ପହଞ୍ଚିଲେ ଭାଜପାର ନେତା, ବିଧାୟକ ଉଦଘାଟନ କଲେ …
ଦାରିଙ୍ଗବାଡି,୨୯।୬(ଅରୁଣ ସାହୁ): କନ୍ଧମାଳ ଜିଲା ଭାଜପା ସଂଗଠନକୁ ସୁଦୃଢ଼ କରିବା ପାଇଁ ନେତା ଏବଂ କର୍ମୀମାନେ ଅଣ୍ଟା ଭିଡିଛନ୍ତି । ସମସ୍ତ ବୁଥ ସ୍ତରରେ କର୍ମୀମାନେ ପ୍ରତେକ ମୁହୂର୍ତ୍ତରେ ଲୋକଙ୍କ ସହ ଯୋଡିହେବା ଓ ଗାଁ ଗାଁରେ ଶକ୍ତିକେନ୍ଦ୍ର ଗୁଡିକରେ ଲୋକଙ୍କୁ ଏକାଠି କରି ସେମାନଙ୍କ ମୌଳିକ ସମସ୍ୟା ଓ ଗାଁର ବିକାଶ ପାଇଁ ଆଲୋଚନା କରୁଛନ୍ତି । ନୂତନ ସଦସ୍ୟଙ୍କୁ ନିଜ ଦଳରେ ସାମିଲ କରେଇବା ଭଳି କାର୍ଯ୍ୟ କରୁଥିବା ଦେଖିବାକୁ ମିଳୁଛି ।
ଏହି କ୍ରମରେ ଜିଲାର ଓ ଦାରିଙ୍ଗବାଡି ବ୍ଲକର ଶେଷ ସୀମା ଯେଉଁଠି ୩ ଜିଲା ତଥା କନ୍ଧମାଳ, ଗଞ୍ଜାମ ଓ ଗଜପତି ସୀମାରେ ରହିଥିବା ଦାରିଙ୍ଗବାଡି ବ୍ଲକ କାଟିଙ୍ଗିଆ ପଞ୍ଚାୟତର ଦୁର୍ଗମ ତିଆରିଗାଁରେ ଭାଜପାର ଫୁଲବାଣୀ ବିଧାୟକ ଉମା ଚରଣ ମଲିକ ମୁଖ୍ୟ ଅତିଥିଭାବେ ଯୋଗ ଦେଇ ପୌରାଣିକ ନାଟକ ରାମାୟଣ ମଞ୍ଚକୁ ଉଦଘାଟନ କରିଛନ୍ତି । ତାଙ୍କ ସହ ଅନ୍ୟ ଅତିଥିଙ୍କ ମଧ୍ୟରେ ସ୍ୱତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷ ମାନଗୋବିନ୍ଦ ପ୍ରଧାନ, ଦଳର ଜିଲା ସଭାପତି ପଣ୍ଡିତ ବିଶିମାଝି, ଜିଲା ସାଧାରଣ ସମ୍ପାଦକ ସୁକାନ୍ତ ସାହୁଙ୍କ ସମେତ ଅନ୍ୟ ମଣ୍ଡଳ କର୍ମକର୍ତ୍ତା ପହଞ୍ଚି ଉକ୍ତ ଉଦଘାଟନୀ ଉତ୍ସବକୁ ପ୍ରୋତ୍ସାହନ କରିଥିଲେ । ଏହି ଦୁର୍ଗମ ତିଆରିଗାଁରେ ପୂର୍ବରୁ କୌଣସି ନେତା ମନ୍ତ୍ରୀଙ୍କ ପାଦ ପଡୁନଥିବା ବେଳେ ଏବେ ଭାଜପା ଜିଲା ଓ ବ୍ଲକର ଶେଷ ସୀମାରୁ ନିଜ ଅକ୍ତିଆର ଓ ପଞ୍ଚାୟତ ନିର୍ବାଚନ ପୂର୍ବରୁ ରଣନୀତି ପ୍ରସ୍ତୁତ କରୁଥିବା ଆଲୋଚନା ଜୋର ଧରିଛି ।
