ହାଇକୋର୍ଟଙ୍କ ବଡ଼ ରାୟ; ପତ୍ନୀ ସ୍ଵାମୀଙ୍କ ସମ୍ପତ୍ତି ନୁହନ୍ତି, ମନୋମାଳିନ୍ୟ…
କଟକ,୨୫।୬(ପ୍ରଭୁକଲ୍ୟାଣ ପାଲ): ଓଡ଼ିଶା ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ମାମଲାର ଶୁଣାଣି କରି କହିଛନ୍ତି ଯେ ‘ ପତ୍ନୀ ସ୍ଵାମୀଙ୍କ ସମ୍ପତ୍ତି ନୁହନ୍ତି’। ବୈବାହିକ ମନୋମାଳିନ୍ୟ ଯୋଗୁ ଘର ଛାଡ଼ି ଯାଇଥିବା ପତ୍ନୀଙ୍କୁ ଫେରାଇ ଆଣିବା ପାଇଁ ହେବିଅସ୍ କର୍ପସ ଆବେଦନ କରିଥିବା ସ୍ଵାମୀଙ୍କ ଉପରେ ୫୦,୦୦୦ ଟଙ୍କା ଜରିମାନା କରିଛନ୍ତି ହାଇକୋର୍ଟ। ପତ୍ନୀ ନିଖୋଜ ଥିବା ଦର୍ଶାଇ ହାଇକୋର୍ଟରେ ହେବୟସ କର୍ପସ ପିଟିସନ ଦାୟର କରିଥିବା ସ୍ବାମୀ ୫୦ ହଜାର ଟଙ୍କା ତଣ୍ଡ ଗଣିବେ। ନିଖୋଜ ପତ୍ନୀଙ୍କ ଉଦ୍ଧାର ପାଇଁ ସ୍ବାମୀ ଦାୟର କରିଥିବା ମାମଲା ହାଇକୋର୍ଟରେ ଶୁଣାଣି ବେଳେ ସ୍ପଷ୍ଟ ହୋଇଥିଲା ଯେ ପତ୍ନୀ ନିଜ ଇଚ୍ଛାରେ ସ୍ବାମୀଙ୍କ ଘର ଛାଡ଼ି ଚାଲିଯାଇଛନ୍ତି।
କୋର୍ଟ କହିଛନ୍ତି ଯେ, ବ୍ୟକ୍ତିଗତ ପ୍ରତିଶୋଧ ନେବା କିମ୍ବା ଅନ୍ୟ ପକ୍ଷକୁ ଚାପରେ ରଖିବା ପାଇଁ ହେବିୟସ କର୍ପସ ଆବେଦନ ଦାଖଲ କରିବାର ପ୍ରବଣତା ବଢ଼ୁଛି । ମାମଲାରେ ସ୍ୱାମୀ ଅଭିଯୋଗ କରିଥିଲେ ଯେ ତାଙ୍କ ପତ୍ନୀଙ୍କୁ ଅପହରଣ କରାଯାଇଛି। କିନ୍ତୁ ଆବେଦନ ସହ ଦାଖଲ ହୋଇଥିବା ଦସ୍ତାବେଜରୁ ଜଣାପଡ଼ିଥିଲା ଯେ ବୈବାହିକ ଅସମ୍ମତି କାରଣରୁ ପତ୍ନୀ ସ୍ୱଇଚ୍ଛାରେ ଘର ଛାଡ଼ିଥିଲେ। କୋର୍ଟ ସ୍ପଷ୍ଟ କରିଛନ୍ତି ଯେ ଜଣେ ପ୍ରାପ୍ତବୟସ୍କ ମହିଳା ନିଜ ଜୀବନ ବିଷୟରେ ସ୍ୱତନ୍ତ୍ର ନିଷ୍ପତ୍ତି ନେବାକୁ ସକ୍ଷମ। ତାଙ୍କୁ ସ୍ୱାମୀଙ୍କ ସମ୍ପତ୍ତି ଭଳି ବ୍ୟବହାର କରାଯାଇପାରିବ ନାହିଁ । ଯଦି ପତ୍ନୀ ନିର୍ଯାତନା କିମ୍ବା ଵୈବାହିକ ବିବାଦ କାରଣରୁ ଅଲଗା ରହିବାକୁ ନିଷ୍ପତ୍ତି ନେଇଛନ୍ତି, ତେବେ ତାଙ୍କୁ ଘରକୁ ଆଣିବା ପାଇଁ ହେବିୟସ କର୍ପସ ମାମଲା ବ୍ୟବହାର କରାଯାଇପାରିବ ନାହିଁ ।ରାଜ୍ୟ ସରକାରଙ୍କ ପକ୍ଷରୁ ଏଜିଏ ଦେବାଶିଷ ତ୍ରିପାଠୀ ମାମଲା ପରିଚାଳନା କରୁଥିଲେ।
