ସାରା ରାଜ୍ୟରେ ବର୍ଷା ବିତ୍ପାତ: ବଦଳିଗଲା ସ୍ମାର୍ଟସିଟି ଭୁବନେଶ୍ୱରର ଚିତ୍ର
ଭୁବନେଶ୍ୱର,୬ା୭(ବନ୍ଦନା ସେଠୀ): ରାଜ୍ୟରେ ଲଘୁଚାପଜନିତ ମୌସୁମୀ ବର୍ଷା ସାଧାରଣ ଜୀବନଯାତ୍ରାକୁ ଗୁରୁତର ପ୍ରଭାବିତ କରିଛି। ତିନିଦିନର ଲଗାଣ ବର୍ଷାରେ ବିଭିନ୍ନ ଜିଲାରେ ବ୍ୟାପକ କ୍ଷୟକ୍ଷତି ହୋଇଛି। ବହୁ ସ୍ଥାନରେ ଯୋଗାଯୋଗ ବିଚ୍ଛିନ୍ନ ହୋଇଥିବାବେଳେ କେତେକ ସ୍ଥାନରେ ଜୀବନ ହାନିର ସୂଚନା ମିଳିଛି। ବିଶେଷକରି ପ୍ରବଳ ବର୍ଷା ଯୋଗୁ ପଶ୍ଚିମ ଓ ଦକ୍ଷିଣ ଓଡ଼ିଶା ସ୍ଥିତି ବିଗିଡିବାରେ ଲାଗିଛି। ବଲାଙ୍ଗୀର ଜିଲା ପୁଇଁତଳା ଥାନା ପଥର୍ଲା ଗ୍ରାମପଞ୍ଚାୟତ ଅନ୍ତର୍ଗତ ଲୁହୁରେନ୍ପାଲି ଗାଁରେ ରବିବାର ଘରେ ଶୋଇଥିବା ଜଣେ ବୃଦ୍ଧ ଦମ୍ପତିଙ୍କ ଉପରେ ମାଟିକାନ୍ଥ ପଡିଯାଇଥିଲା। ଫଳରେ ଘଟଣାସ୍ଥଳରେ ବୃଦ୍ଧ ଗଣ୍ଡାରାମ କୁମ୍ଭାରଙ୍କ ମୃତ୍ୟୁ ହୋଇଥିବାବେଳେ ସ୍ତ୍ରୀ ଲକ୍ଷ୍ମୀ କୁମ୍ଭାର ଗୁରୁତର ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି। ସେହିପରି ଖପ୍ରାଖୋଲ ବ୍ଲକ୍ ଲାଠୋର ଅଞ୍ଚଳରେ ଲଗାଣ ବର୍ଷା ଯୋଗୁ ହରିଶଙ୍କର ରୋଡ୍ ରେଳଷ୍ଟେଶନ ନିକଟ ଝଲିଆଲିଟି ଫାଟକଠାରେ ନବନିର୍ମିତ ଭୂତଳ ପୋଲ ଭିତରେ ୭ଫୁଟର ପାଣି ଜମି ରହିଥିଲା।
ରେଳ ଧାରଣାରୁ ମାଟି ଧସିଯିବା ଫଳରେ ଯାତାୟାତ ବାଧାପ୍ରାପ୍ତ ହୋଇଥିଲା। ଲାଠୋର ବନ୍ଧିଆ ଯୋରରେ ପାଣି ପ୍ରବାହିତ ହେଉଥିବାରୁ ଲାଠୋର-ଖପ୍ରାଖୋଲ ରାସ୍ତା ବିଚ୍ଛିନ୍ନ ହୋଇପଡିଛି। ରାୟଗଡ଼ା ଜିଲା ପାର୍ତାପୁର ଗ୍ରାମ ନିକଟରେ ମୁଖ୍ୟ ରାସ୍ତା ଉପରେ ବିରାଟ ଗଛ ଉପୁଡି ପଡିବାରୁ ଓଡ଼ିଶା-ଆନ୍ଧ୍ର ରାସ୍ତାରେ କିଛି ଘଣ୍ଟା ପାଇଁ ଯାତାୟାତ ଠପ୍ ହୋଇଯାଇଥିଲା। ଉଭୟ ପାର୍ଶ୍ୱରେ ଯାନବାହନ ଅଟକି ରହିଥିଲା। କୋରାପୁଟ ଜିଲା ନନ୍ଦପୁର ବ୍ଲକ୍ ଖୀର୍ଜୀ ପଞ୍ଚାୟତରେ ସମେଳା-ଯୋଗୀପୁଟ ବ୍ରିଜ୍ର ୨ପାର୍ଶ୍ୱ ଧସିଯିବାରୁ ଏଠାରେ ଯାତାୟାତ ବିଚ୍ଛିନ୍ନ ହୋଇଯାଇଛି। ସେହିପରି କୋରାପୁଟରେ ରବିବାର ପ୍ରବଳ ବର୍ଷା ହୋଇଥିବାବେଳେ ବିଭିନ୍ନ ଅଞ୍ଚଳରେ ୭ଟି ଘର ଭାଙ୍ଗିଥିବା ସୂଚନା ରହିଛି। କେବଳ ଉପାନ୍ତ ଜିଲା ନୁହେଁ ଖୋର୍ଦ୍ଧା, କଟକ ସମେତ ସ୍ମାର୍ଟସିଟି ଭୁବନେଶ୍ୱରରେ ମଧ୍ୟ ଲଗାଣ ବର୍ଷା ପାଇଁ ଚିତ୍ର ବଦଳିଯାଇଛି। ତଳି ଅଞ୍ଚଳରେ ରହିଥିବା ଜନବସତିରେ ବର୍ଷା ଓ ଡ୍ରେନ୍ ପାଣି ଚାଲୁଥିବାବେଳେ କେତେକ ସ୍ଥାନରେ ଘର ଭିତରେ ପାଣି ପଶିଥିବା ସୂଚନା ମିଳିଛି।
