ସାଧାରଣ ପାସ୍ପୋର୍ଟ ଫି’ ୨୫୦୦ ଟଙ୍କାକୁ ବୃଦ୍ଧି, ତତ୍କାଳ ପାଇଁ ଦେବାକୁ ପଡ଼ିବ ୫ ହଜାର
ନୂଆଦିଲ୍ଲୀ,୨୬ା୬(ପି.ଟି.): କେନ୍ଦ୍ର ସରକାର ଦେଶରେ ପାସ୍ପୋର୍ଟ ପ୍ରସ୍ତୁତି ଏବଂ ଏହାର ନବୀକରଣ (ରି-ଇସ୍ୟୁ) ଫି’ରେ ବଡ଼ଧରଣର ବୃଦ୍ଧି କରିଛନ୍ତି । ୧୯୮୦ ମସିହାର ‘ପାସ୍ପୋର୍ଟ ନିୟମାବଳୀ’ରେ ସଂଶୋଧନ କରାଯାଇ ଏହି ନୂତନ ଶୁଳ୍କ ବ୍ୟବସ୍ଥା ଲାଗୁ କରାଯାଇଛି। କେନ୍ଦ୍ର ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ଗୁରୁବାର ପ୍ରକାଶିତ ସରକାରୀ ବିଜ୍ଞପ୍ତି ଅନୁଯାୟୀ, ଆସନ୍ତା ଜୁଲାଇ ୧ରୁ ଏହି ନୂଆ ନିୟମ ଦେଶରେ କାର୍ଯ୍ୟକାରୀ ହେବ। ଏଣିକି ସାଧାରଣ ୩୬ ପୃଷ୍ଠା ବିଶିଷ୍ଟ ନୂତନ ପାସ୍ପୋର୍ଟ ପାଇଁ ଆବେଦନକାରୀଙ୍କୁ ପୂର୍ବର ୧୫୦୦ ଟଙ୍କା ବଦଳରେ ୨୫୦୦ ଟଙ୍କା ଦେବାକୁ ପଡ଼ିବ।
ମନ୍ତ୍ରଣାଳୟର ସୂଚନା ଅନୁଯାୟୀ, ୧୯୬୭ ମସିହାର ‘ପାସ୍ପୋର୍ଟ ଆକ୍ଟ’ର ଧାରା ୨୪ ଅନୁସାରେ କରାଯାଇଥିବା ଏହି ସଂଶୋଧନରେ ପାସ୍ପୋର୍ଟର ପୃଷ୍ଠା ସଂଖ୍ୟା ଏବଂ ଆବେଦନର ଜରୁରିକାଳୀନ ଆବଶ୍ୟକତା (ତତ୍କାଳ) ଭିତ୍ତିରେ ସ୍ବତନ୍ତ୍ର ଶୁଳ୍କ ଧାର୍ଯ୍ୟ ହୋଇଛି। ୩୬ ପୃଷ୍ଠା ବିଶିଷ୍ଟ ପାସ୍ପୋର୍ଟ (ନୂତନ ଏବଂ ନବୀକରଣ)ର ତତ୍କାଳ ଆବେଦନ ପାଇଁ ପୂର୍ବ ଶୁଳ୍କ ୩,୫୦୦ ଟଙ୍କା ବଦଳରେ ଏବେ ୫,୦୦୦ ଟଙ୍କା ଦେବାକୁ ହେବ। ସେହିପରି ୬୦ ପୃଷ୍ଠା ବିଶିଷ୍ଟ ପାସ୍ପୋର୍ଟ (ଜମ୍ବୋ ପାସ୍ପୋର୍ଟ)ର ସାଧାରଣ ଆବେଦନ ପାଇଁ ପୂର୍ବରୁ ୨,୦୦୦ ଟଙ୍କା ଥିବା ବେଳେ ବର୍ତ୍ତମାନ ଏହା ୩,୫୦୦ ଟଙ୍କା ହୋଇଛି। ଏହାର ତତ୍କାଳ ଆବେଦନ ପାଇଁ ପୂର୍ବ ଶୁଳ୍କ ୪,୦୦୦ ଟଙ୍କା ଥିବା ବେଳେ ଏହାକୁ ବୃଦ୍ଧି କରାଯାଇ ୬,୦୦୦ ଟଙ୍କା ଧାର୍ଯ୍ୟ କରାଯାଇଛି। ସରକାର ନିଜର ବିଜ୍ଞପ୍ତିରେ ପୁରୁଣା ‘ଚତୁର୍ଥ ସୂଚୀ’ ବଦଳରେ ଏକ ନୂତନ ବ୍ୟବସ୍ଥା ସାମିଲ କରିଛନ୍ତି। ଏହି ନୂତନ ସୂଚୀରେ ଆବେଦନକାରୀଙ୍କୁ ଦୁଇଟି ମୁଖ୍ୟ ଉପ-ବର୍ଗରେ ବିଭକ୍ତ କରାଯାଇଛି। ପ୍ରଥମ ବର୍ଗରେ ୧୮ ବର୍ଷ ବା ତା’ଠାରୁ ଅଧିକ ବୟସ୍କ ନାଗରିକ ଏବଂ ୧୫ରୁ ୧୮ ବର୍ଷ ବୟସ ମଧ୍ୟରେ ଥିବା ସେହି ନାବାଳକମାନଙ୍କୁ ରଖାଯାଇଛି ଯେଉଁମାନେ ବୟସ୍କ ସମାନ ଅବଧି ପାଇଁ ଆବେଦନ କରୁଛନ୍ତି। ଦ୍ୱିତୀୟ ବର୍ଗରେ କେବଳ ୧୮ ବର୍ଷରୁ କମ୍ ବୟସର ନାବାଳକ ଆବେଦନକାରୀମାନଙ୍କୁ ସାମିଲ କରାଯାଇଛି। ଜୁନ ୨୦ ତାରିଖରେ ମନ୍ତ୍ରଣାଳୟ ଦ୍ୱାରା ପ୍ରସ୍ତୁତ ହୋଇଥିବା ଏହି ନିୟମ ଜୁଲାଇ ୧ରୁ ଦେଶର ସମସ୍ତ ପାସ୍ପୋର୍ଟ ସେବା କେନ୍ଦ୍ରରେ କଡ଼ାକଡ଼ି ଭାବେ କାର୍ଯ୍ୟକାରୀ ହେବ ।
