ସମଣା ଘାଟରୁ ଉଠୁନି ଗୋଟେ ମୁଠା ବାଲି; ତଥାପି ପୋଲିସ,ପ୍ରଶାସନ, ମୁଖ୍ୟମନ୍ତ୍ରୀଙ୍କୁ ମିଛ ଟାର୍ଗେଟ: ପ୍ରତିବାଦରେ ଗର୍ଜିଲେ…

ହାଟଡିହୀ,୧୦।୭(ଶୁଭକାନ୍ତ ନାୟକ): କେନ୍ଦୁଝର ଜିଲା ହାଟଡିହୀ ତହସିଲ ଅଧୀନସ୍ଥ ସମଣା ବାଲିଘାଟକୁ ନେଇ ଚାଲିଥିବା ଇଚ୍ଛାକୃତ ଅପପ୍ରଚାର ଓ ଷଡ଼ଯନ୍ତ୍ର ବିରୋଧରେ ଗ୍ରାମବାସୀ ସ୍ୱର ଉତ୍ତୋଳନ କରିଛନ୍ତି। ଘାଟରୁ ବାଲି ଉତ୍ତୋଳନ ସମ୍ପୂର୍ଣ୍ଣ ବନ୍ଦ ଥିବା ସତ୍ତ୍ୱେ କିଛି କୁଚକ୍ରୀ ଗୋଷ୍ଠୀ ମୁଖ୍ୟମନ୍ତ୍ରୀ, ପୋଲିସ ଓ ଜିଲା ପ୍ରଶାସନ ସମେତ ସମଗ୍ର ଗାଁକୁ ମିଛରେ ବଦନାମ କରୁଥିବା ଅଭିଯୋଗ ହୋଇଛି। ଶୁକ୍ରବାର ଦିନ ମଧୁସୁଦନ ଦାଶ, ବିଭୁ କାଣ୍ଡି, ରବୀନ୍ଦ୍ର ପ୍ରଧାନ, ବୁଲା ଜେନା, ରମେଶ କାଣ୍ଡି, ସୁଶାନ୍ତ କାଣ୍ଡି, ପାଗଳ କାଣ୍ଡି, ଟୁଟୁ ଦଳେଇ, କହ୍ନେଇ ବେହେରା, ଗୌରହରୀ ସାହୁ, ରଞ୍ଜନ କାଣ୍ଡି, କୃଷ୍ଣ କାଣ୍ଡି, ନାରଣ କାଣ୍ଡି ଓ ଉମାକାନ୍ତ ବେହେରାଙ୍କ ସମେତ ୫୦ରୁ ଅଧିକ ଗ୍ରାମବାସୀ ଏକାଠି ହୋଇ ଏହି ଷଡ଼ଯନ୍ତ୍ରର ତୀବ୍ର ନିନ୍ଦା ଓ ପ୍ରତିବାଦ କରିଛନ୍ତି।

ଗ୍ରାମବାସୀଙ୍କ କହିବା ଅନୁଯାୟୀ ଗତ ୧୦-୧୨ ବର୍ଷ ପୂର୍ବେ ଏହି ବାଲିଘାଟକୁ ନେଇ ବଡ଼ଧରଣର ସଂଘର୍ଷ ଓ ହଣାକଟା ହୋଇଥିଲା, ଯେଉଁଥିରେ ଜଣେ ସରପଞ୍ଚଙ୍କ ଜୀବନ ଯାଇଥିଲା। ସେହି ଦିନଠାରୁ ସମଣା ଘାଟରୁ ବାଲି ଉଠାଣ ସମ୍ପୂର୍ଣ୍ଣ ରୂପେ ବନ୍ଦ ରହିଛି। କିନ୍ତୁ ନଦୀର ଅପର ପାର୍ଶ୍ୱରେ ଚାଲୁଥିବା ଅନ୍ୟ ଘାଟର ବାଲିକୁ ସମଣା ଘାଟର ବୋଲି କହି ଭ୍ରମାତ୍ମକ ପ୍ରଚାର କରାଯାଉଛି। ଏହା ସହିତ ସମଣାଠାରୁ କିଛି ଦୂରରେ ଥିବା ଏକ ବୈଧ ଲିଜ୍ ଘାଟରୁ ବାଲି ପରିବହନ କରୁଥିବା ଗାଡ଼ିଗୁଡ଼ିକ ସମଣା ଗାଁ ରାସ୍ତା ଦେଇ ଯାଉଥିବାରୁ, ତାକୁ ମଧ୍ୟ ସମଣାରୁ ବାଲି ଚୋରି ବୋଲି ମିଥ୍ୟା ରୂପ ଦିଆଯାଉଛି।

ଆମ ଗାଁର ନାଁ ଖରାପ କରି ସରକାରଙ୍କୁ ମିଛରେ ଫସାଇବାର ଏକ ବଡ଼ ଷଡ଼ଯନ୍ତ୍ର ଚାଲିଛି ବୋଲି ଗ୍ରାମବାସୀ ପ୍ରକାଶ କରିଛନ୍ତି। ସମଣାରୁ ଗୋଟେ ମୁଠା ବାଲି ମଧ୍ୟ ଉଠୁନାହିଁ, ତଥାପି ମୁଖ୍ୟମନ୍ତ୍ରୀ, ପୋଲିସ ଓ ପ୍ରଶାସନକୁ ଟାର୍ଗେଟ୍ କରାଯାଉଛି। ତୁରନ୍ତ ଏହି ମିଥ୍ୟା ଅପପ୍ରଚାର ବନ୍ଦ କରିବା ସହ ପ୍ରଶାସନ ପକ୍ଷରୁ ସଠିକ୍ ତଥ୍ୟ ସରଜମିନ ଯାଞ୍ଚ କରାଯାଇ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ଓ ଉତ୍ତେଜନା ପ୍ରକାଶ ପାଇଥିବା ବେଳେ ପ୍ରଶାସନ ଏହା ଉପରେ କି ପଦକ୍ଷେପ ନେଉଛି, ତାହା ଉପରେ ଏବେ ସମସ୍ତଙ୍କ ନଜର ରହିଛି।