ପୁଣି ମୁହାଁମୁହିଁ ହେଲେ ଆମେରିକା-ଇରାନ: ବଡ଼ ଆକ୍ରମଣ କଲା ଓ୍ବାଶିଂଟନ୍‌

ତେହରାନ,୨୭।୬:ଆମେରିକା ଏବଂ ଇରାନ ମଧ୍ୟରେ ଉତ୍ତେଜନା ପୁଣି ଥରେ ବୃଦ୍ଧି ପାଇବା ଆରମ୍ଭ କରିଛି। ଆମେରିକା ଇରାନୀ କ୍ଷେପଣାସ୍ତ୍ର ଏବଂ ଡ୍ରୋନ ସ୍ଥାନଗୁଡ଼ିକୁ ଟାର୍ଗେଟ କରିଥିଲା। ହର୍ମୁଜ ପ୍ରଣାଳୀରେ ଏକ ମାଲବାହୀ ଜାହାଜ ଉପରେ ଡ୍ରୋନ ଆକ୍ରମଣର ଜବାବରେ ଏହି ଆକ୍ରମଣ କରାଯାଇଥିଲା। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, ଏହି ଆକ୍ରମଣ ଯୁଦ୍ଧବିରତିର ଉଲ୍ଲଂଘନ।

ପ୍ରତିଶୋଧମୂଳକ ଆକ୍ରମଣର କିଛି ସମୟ ପୂର୍ବରୁ, ଟ୍ରମ୍ପ ହ୍ବାଇଟ ହାଉସରେ କହିଥିଲେ, ଇରାନ ଅସ୍ତ୍ର ବିରତି ଉଲ୍ଲଂଘନ କରିଛି। ମୁଁ ଏହି ଘଟଣା ପସନ୍ଦ କରୁନାହିଁ। ସେମାନେ ଚାରୋଟି ଆକ୍ରମଣ କରିଛନ୍ତି।
ସୂଚନାଯୋଗ୍ୟ,ଓମାନ ନିକଟରେ ଏକ ଜାହାଜ ଉପରେ ଆକ୍ରମଣ ଘଟଣା ପରେ ଷ୍ଟ୍ରେଟ୍‌ ଅଫ୍‌ ହର୍ମୁଜ୍‌ରେ ଜାହାଜ ଚଳାଚଳ ନିୟନ୍ତ୍ରଣ ଅଧିକାରକୁ ଇରାନ ଶୁକ୍ରବାର ପୁଣି ଦୋହରାଇଛି। ଆମେରିକାର ପକ୍ଷ ନେଉଥିବା ଉପସାଗରୀୟ ଦେଶଗୁଡ଼ିକୁ ତେହରାନ୍‌ ଚେତାବନୀ ଦେଇଛି। ବିଶ୍ୱର ଅନ୍ୟତମ ଗୁରୁତ୍ୱପୂର୍ଣ୍ଣ ସାମୁଦ୍ରିକ ପଥ ଷ୍ଟ୍ରେଟ୍‌ ଅଫ୍‌ ହର୍ମୁଜ୍‌ରେ ଜାହାଜ ଚଳାଚଳ ନିୟନ୍ତ୍ରଣ ଓ ଟିକସ ଲଗାଇବାକୁ ନେଇ ଭୂରାଜନୈତିକ ବିବାଦ ବଢ଼ିଛି। ହର୍ମୁଜ୍‌ ଦେଇ ସୁରକ୍ଷିତ ଜାହାଜ ଚଳାଚଳ ଅସ୍ପଷ୍ଟ ବ୍ୟବସ୍ଥା ଓ ସମାନ୍ତରାଳ ମାର୍ଗରେ ସୁନିଶ୍ଚିତ ହୋଇପାରିବ ନାହିଁ। ଇରାନକୁ ନ ପଚାରି ଯଦି ଅନ୍ୟ କୌଣସି ଦେଶ ବା ସଂସ୍ଥା ଅଲଗା ମାର୍ଗ ତିଆରି କରେ, ତେବେ ସେହି ବାଟ ଦେଇ ଯାଉଥିବା ଜାହାଜଗୁଡ଼ିକର ସୁରକ୍ଷା ଦାୟିତ୍ୱ ଇରାନ ନେବ ନାହିଁ। ଇରାନ କେବଳ ନିଜ ଦ୍ୱାରା ନିର୍ଦ୍ଧାରିତ ମାର୍ଗକୁ ମାନ୍ୟତା ଦେବ ବୋଲି ଏହାର ବହିର୍ବ୍ୟାପାର ଉପମନ୍ତ୍ରୀ କାଜେମ୍‌ ଘରିବାବାଦି କହିଛନ୍ତି।
ଇରାନ ଓ ଆମେରିକା ମଧ୍ୟରେ ବୁଝାମଣା ପରେ ଇନ୍ଧନ ପରିବହନ ନେଇ ହର୍ମୁଜ୍‌ ଷ୍ଟ୍ରେଟ୍‌ ସ୍ବାଭାବିକ ହୋଇଥିଲା। ଜାହାଜ ଚଳାଚଳ ସ୍ବାଭାବିକ ହେବା ସହିତ ଗୁରୁବାର ସୁଦ୍ଧା ଦ୍ୱିଗୁଣିତ ହୋଇଛି। ଫେବୃଆରୀ ଶେଷ ଭାଗରେ ଇରାନ-ଆମେରିକା ସଂଘର୍ଷ ଆରମ୍ଭ ହେବା ପୂର୍ବରୁ ଏହି ପଥରେ ଦିନକୁ ଯେତିକି ସଂଖ୍ୟାରେ ଜାହାଜ ଚଳାଚଳ କରୁଥିଲା ଏବେ ତାହାର ପୁନରାବୃତ୍ତି ଘଟିଛି। ୧୫୦ରୁ ଅଧିକ ଜାହାଜ ଏହି ପ୍ରବେଶ ପଥ ବାହାରେ ଲଙ୍ଗର ପକାଇ ରହିଥିବା ବେଳେ ବହୁ ସଂଖ୍ୟକ ଜାହାଜ ସେଠାରୁ ପ୍ରସ୍ଥାନ କରୁଥିବା ଜାହାଜ ଟ୍ରାକିଂ ତଥ୍ୟରୁ ଜଣାପଡ଼ିଛି ।