ଦଧିବାମନ ଜୀଉଙ୍କ ଚତୁର୍ଦ୍ଧା ମୂର୍ତ୍ତିଙ୍କ ଦେବସ୍ନାନ ପୂର୍ଣ୍ଣିମା ନୀତି ସମ୍ପନ୍ନ
ପାଟଣା, ୨୯।୬ (ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ ଅନ୍ତର୍ଗତ ରାଜନଗରସ୍ଥିତ ପ୍ରାଚୀନ ଶ୍ରୀଶ୍ରୀ ଦଧିବାମନ ଜୀଉ ମନ୍ଦିରରେ ସୋମବାର ପବିତ୍ର ଦେବସ୍ନାନ ପୂର୍ଣ୍ଣିମା ମହୋତ୍ସବ ଭକ୍ତିଭାବ ଓ ପାରମ୍ପରିକ ରୀତିନୀତି ଅନୁଯାୟୀ ଅନୁଷ୍ଠିତ ହୋଇଯାଇଛି। ମନ୍ଦିର ପରିସରସ୍ଥ ସ୍ନାନବେଦୀରେ ଚତୁର୍ଦ୍ଧା ମୂର୍ତ୍ତିଙ୍କ ଦିବ୍ୟ ସ୍ନାନ ନୀତି ସମ୍ପନ୍ନ ହୋଇଥିଲା।
ଏହି ଅବସରରେ ମନ୍ଦିର ପରିସରରେ ଥିବା ପବିତ୍ର କୂଅରୁ ସଂଗୃହୀତ ୧୦୮ ପୂର୍ଣ୍ଣକୁମ୍ଭ ଜଳରେ ମହାପ୍ରଭୁଙ୍କ ମହାସ୍ନାନ ନୀତି ସମ୍ପନ୍ନ କରାଯାଇଥିଲା। ସମସ୍ତ ନୀତିକାନ୍ତି ଶାସ୍ତ୍ରବିଧି ଅନୁଯାୟୀ ମନ୍ଦିରର ସେବାୟତମାନେ ନିଷ୍ଠାର ସହ ସମ୍ପାଦନ କରିଥିଲେ।
ଦେବସ୍ନାନ ନୀତିରେ ବ୍ରହ୍ମା ଭାବେ ପ୍ରଦୀପ କୁମାର ମିଶ୍ର, ପରିଛା ଦୁର୍ଯ୍ୟୋଧନ ମିଶ୍ର, ଠାକୁରଙ୍କ ପହଣ୍ଡିଆ ବ୍ରାହ୍ମଣ ସତ୍ୟନାରାୟଣ ମିଶ୍ର, ମନରଞ୍ଜନ ମିଶ୍ର, ଅକ୍ଷୟ ନାରାୟଣ ମିଶ୍ର, ମୃତ୍ୟୁଞ୍ଜୟ ପାଣି, ଘନଶ୍ୟାମ ମିଶ୍ର, ଜଗନ୍ନାଥ ପଣ୍ଡା, ଶଶୀରଞ୍ଜନ ମିଶ୍ର, ସେବାୟତ ଗୋପୀନାଥ ପଣ୍ଡା, ମାଳି ସେବକ ପର୍ଶୁରାମ ରଣା, ତନ୍ତୀ ସେବକ ମଦନମୋହନ ବେହେରା, ରଜକ ସେବକ ପ୍ରଫୁଲ୍ଲ ସେଠୀ, ଛତ୍ରଧାରୀ ହେମରଞ୍ଜନ ନାୟକ ଓ ଅର୍ଜୁନଚରଣ ବେହେରା ପ୍ରମୁଖ ବିଭିନ୍ନ ସେବାରେ ନିୟୋଜିତ ଥିଲେ। ଏହାସହ ୨୨ ନିଯୋଗର ସେବାୟତମାନେ ମଧ୍ୟ ଠାକୁରଙ୍କ ସମସ୍ତ ନୀତିକାନ୍ତିରେ ସହଯୋଗ କରିଥିଲେ।
ପବିତ୍ର ଦେବସ୍ନାନ ପୂର୍ଣ୍ଣିମା ଅବସରରେ ସ୍ନାନମଣ୍ଡପରେ ବିରାଜମାନ ଚତୁର୍ଦ୍ଧା ମୂର୍ତ୍ତିଙ୍କ ଦର୍ଶନ ପାଇଁ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଥିଲା। ଭକ୍ତମାନେ ମହାପ୍ରଭୁଙ୍କ ଦିବ୍ୟ ସ୍ନାନ ଦର୍ଶନ କରି ଆଶୀର୍ବାଦ ଲାଭ କରିବା ସହ ଧନ୍ୟ ଅନୁଭବ କରିଥିଲେ।
କୀର୍ତ୍ତନ, ଘଣ୍ଟ, ଶଙ୍ଖଧ୍ୱନି, ହୁଳହୁଳି ଓ ବିଭିନ୍ନ ବାଦ୍ୟର ଧ୍ୱନିରେ ସମଗ୍ର ମନ୍ଦିର ପରିସର ଭକ୍ତିମୟ ପରିବେଶରେ ଉଛୁଳି ଉଠିଥିଲା। ଶେଷରେ ଉପସ୍ଥିତ ଶ୍ରଦ୍ଧାଳୁମାନଙ୍କୁ ଶୀତଳ ଭୋଗ ବଣ୍ଟନ କରାଯାଇଥିଲା। ପବିତ୍ର ଦେବସ୍ନାନ ପୂର୍ଣ୍ଣିମା ଉତ୍ସବକୁ ନେଇ ସମଗ୍ର ରାଜନଗର ଅଞ୍ଚଳ ଭକ୍ତି ଓ ଉତ୍ସବର ପରିବେଶରେ ମୁଖରିତ ହୋଇଉଠିଥିଲା।
