ଗନ୍ଧର୍ବ କଳା ସମ୍ମାନ ପାଇଲେ ଗୌରୀ ଶଙ୍କର ଦୁର୍ଗା: କଳାହାଣ୍ଡି ପାଇଁ ପୁଣି ଆଣିଲେ ଗୌରବ

ଭବାନୀପାଟଣା,୨୪।୭(ଉତ୍ତମ କୁମାର ଦାଶ): କଳାହାଣ୍ଡି ମାଟିର ଜଣାଶୁଣା ଲୋକ ବାଦ୍ୟ କଳାକାର ତଥା ଓଡିଶା ସଙ୍ଗୀତ ନାଟକ ଏକାଡେମୀ ଯୁବ ପୁରସ୍କାର ପ୍ରାପ୍ତ ପ୍ରତିଭା ଗୌରୀ ଶଙ୍କର ଦୁର୍ଗା ଚଳିତ ବର୍ଷର ଗନ୍ଧର୍ବ କଳା”ସମ୍ମାନରେ ସମ୍ମାନିତ ହୋଇଛନ୍ତି। ଶୁକ୍ରବାର ଭୁବନେଶ୍ୱରର ଭଞ୍ଜ କଳା ମଣ୍ଡପଠାରେ ଓଡ଼ିଆ କଳାକାରଙ୍କ ସ୍ୱର ପକ୍ଷରୁ ଆୟୋଜିତ ସ୍ଵର୍ଣ୍ଣ କ୍ଷେତ୍ର ଦିବସ ଅବସରରେ ତାଙ୍କୁ ଏହି ସମ୍ମାନରେ ସମ୍ମାନିତ କରାଯାଇଛି।ଯାହାକୁ ନେଇଁ କଳାହାଣ୍ଡି ଜିଲାରେ ଖୁସିର ଲହରୀ ଖେଳିଯାଇଛି। ଏହାପୂର୍ବରୁ କଳାକାର ଦୁର୍ଗା ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟ ପକ୍ଷରୁ ଜାତୀୟ ଯୁବ କଳାକାର ବୃତ୍ତି ସମ୍ମାନ ମଧ୍ୟ ପାଇଛନ୍ତି । ସେହିପରି ଅନ୍ତର୍ଜାତୀୟ ସ୍ତରରେ ରୁଷିଆ,ଲଣ୍ଡନ,ଦୁବାଇ ସମେତ ରାଜ୍ୟ ଓ ଜାତୀୟ ସ୍ତରରେ ଶତାଧିକ ମଞ୍ଚରେ ବାଦ୍ୟ ପରିବେଷଣ କରି ଦର୍ଶକଙ୍କ ନିକଟତର ହେବା ସହ ଜିଲା ପାଇଁ ମଧ୍ୟ ଗୌରବ ଆଣିଛନ୍ତି।
ଏହି ସମ୍ମାନ ପାଇବା ପରେ ଜିଲାର ବିଭିନ୍ନ ସାଂସ୍କୃତିକ ଅନୁଷ୍ଠାନ ତଥା ଜିଲା ସଂସ୍କୃତି ଅଧିକାରୀ ବିବେକାନନ୍ଦ ମହାନନ୍ଦ, ଗୁରୁ ଜୟନ୍ତ କୁମାର ବେହେରା, ଶାନ୍ତନୁ କୁମାର ବେହେରା, ସତ୍ୟ ନାରାୟଣ ସିଂହ, ଅକ୍ଷୟ କୁମାର ଦାସ, ଗୁରୁ ଧ୍ୟାନନନ୍ଦ ପଣ୍ଡା, ଗୁରୁ ଚିନ୍ତୁ ପ୍ରସାଦ ନାଏକ,ଗୁରୁ ଦେବେଶ କୁମାର ସିଂ,ଗୁରୁ ପ୍ରଦୀପ କୁମାର ସିଂ, ପିତା ଦାଶରଥି ଦୁର୍ଗା ଏବଂ ମାତା ଦ୍ରୋପଦୀ ଦୁର୍ଗା ପ୍ରମୁଖ ଶୁଭେଚ୍ଛା ବାର୍ତ୍ତା ଜଣାଇଛନ୍ତି।