ଆଗକୁ ପଞ୍ଚାୟତ ଓ ପୌର ନିର୍ବାଚନ: ଭାଜପା ସାମିଲ ହେଲେ ଗୁଡାରି ବ୍ଲକ ଅଧ୍ୟକ୍ଷ, ସମୀକରଣ ଉପରେ…
ଗୁଡାରି, ୧୭।୭ (ପ୍ରମୋଦ କୁମାର ପତି): ରାୟଗଡ଼ା ଜିଲା ଗୁଡାରି ବ୍ଲକ ଅଧ୍ୟକ୍ଷ ବିଶ୍ୱନାଥ ଶବର ଶୁକ୍ରବାର ବିଧିବଦ୍ଧ ଭାବେ ଭାରତୀୟ ଜନତା ପାର୍ଟି (ଭାଜପା)ରେ ସାମିଲ ହୋଇଛନ୍ତି।
ଭୁବନେଶ୍ୱରରେ ଆୟୋଜିତ ଏକ ସ୍ୱତନ୍ତ୍ର ମିଶ୍ରଣ ପର୍ବରେ ଭାଜପାର ରାଜ୍ୟ ସଭାପତି ମନମୋହନ ସାମଲ, ଉପମୁଖ୍ୟମନ୍ତ୍ରୀ କେ. ଭି. ସିଂହଦେଓ, ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଏବଂ ଜିଲା ସଭାପତି ଗୋପୀ ଆନନ୍ଦଙ୍କ ଉପସ୍ଥିତିରେ ବିଶ୍ୱନାଥ ଶବର ଭାଜପାରେ ଯୋଗଦେଇଥିଲେ। ଦଳୀୟ ନେତୃବୃନ୍ଦ ତାଙ୍କୁ ଉତ୍ତରୀୟ ଓ ଦଳୀୟ ଟୋପି ପିନ୍ଧାଇ ସ୍ୱାଗତ ଜଣାଇଥିଲେ।
ଦଳରେ ଯୋଗଦେବା ପରେ ବିଶ୍ୱନାଥ ଶବର କହିଥିଲେ ଯେ, ସେ ଭାଜପାର ନୀତି ଓ ଆଦର୍ଶକୁ ଅନୁସରଣ କରି ଦଳର ସାଙ୍ଗଠନିକ ସୁଦୃଢ଼ତା ପାଇଁ କାର୍ଯ୍ୟ କରିବେ।
ବିଶ୍ୱନାଥ ଶବରଙ୍କ ସହ ମଧୁବନ ସରପଞ୍ଚ ବଂଶୀ ଶବର, ସମିତି ସଭ୍ୟା ରଶ୍ମିତା ଶବର, କରଲାଘାଟି ସରପଞ୍ଚ କୌଶଲ୍ୟା ମାମ୍ବଲକା ଏବଂ ଏମ୍.କେ. ରାଇ ପଞ୍ଚାୟତର ସମିତି ସଭ୍ୟ ଅର୍ଜୁନ ଶବର ମଧ୍ୟ ବିଧିବଦ୍ଧ ଭାବେ ଭାଜପାରେ ସାମିଲ ହୋଇଛନ୍ତି।
ଏହି ମିଶ୍ରଣ ପର୍ବରେ ଗୁଡାରି ବ୍ଲକ ଭାଜପା ସଭାପତି ଅନନ୍ତ ଦେଓ ଓ ନଗର ସଭାପତି ଜଗଦୀଶ ନାୟକଙ୍କ ସମେତ ବହୁ ଦଳୀୟ କର୍ମୀ ଓ ନେତା ଉପସ୍ଥିତ ଥିଲେ।
ଆଗକୁ ପଞ୍ଚାୟତ ଓ ପୌର ନିର୍ବାଚନ ଥିବା ବେଳେ ଏହି ମିଶ୍ରଣ ଗୁଡାରି ବ୍ଲକର ରାଜନୈତିକ ସମୀକରଣ ଉପରେ କିଭଳି ପ୍ରଭାବ ପକାଇବ, ତାହା ଦେଖିବାକୁ ବାକି ରହିଛି ବୋଲି ସ୍ଥାନୀୟ ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
