Lokesh Kanagaraj puts LCU exit rumours to rest: LCUକୁ ନେଇ ସମସ୍ତ ଗୁଜବ ଶେଷ: 'କୈଥୀ ୨', 'ବିକ୍ରମ ୨' ଓ 'ରୋଲେକ୍ସ' ନିଶ୍ଚିତ କଲେ ଲୋକେଶ କନକରାଜ

LCUକୁ ନେଇ ଚାଲିଥିବା ଗୁଜବକୁ ଖଣ୍ଡନ। ତାମିଲ ସିନେମାର ଚର୍ଚ୍ଚିତ ନିର୍ଦ୍ଦେଶକ ଲୋକେଶ କନକରାଜ ତାଙ୍କ ଲୋକେଶ ସିନେମାଟିକ୍ ୟୁନିଭର୍ସ (LCU)କୁ ନେଇ ଚାଲିଥିବା ସମସ୍ତ ଗୁଜବରେ ପୂର୍ଣ୍ଣବିରାମ ଲଗାଇଛନ୍ତି। LCU ବନ୍ଦ ହେବା କିମ୍ବା ସେ ଏହି ୟୁନିଭର୍ସରୁ ବାହାରିଯିବେ ବୋଲି ଚାଲିଥିବା ଖବରକୁ ସେ ସିଧାସଳଖ ଖଣ୍ଡନ କରିଛନ୍ତି। ସେହିପରି ସ୍ପଷ୍ଟ କରିଛନ୍ତି ଯେ 'କୈଥୀ ୨', 'ବିକ୍ରମ ୨', 'ରୋଲେକ୍ସ' ଏବଂ 'ବେଞ୍ଜ' ଭଳି ପ୍ରକଳ୍ପ ଏବେ ବି ତାଙ୍କ ଯୋଜନାର ଅଂଶ ରହିଛି।

'କୈଥୀ', 'ବିକ୍ରମ' ଏବଂ 'ଲିଓ' ପରି ସୁପରହିଟ୍ ଚଳଚ୍ଚିତ୍ର ମାଧ୍ୟମରେ ଲୋକେଶ କନକରାଜ ତାମିଲ ସିନେମାରେ ଏକ ନୂଆ ସିନେମାଟିକ୍ ୟୁନିଭର୍ସ ଗଢ଼ିଛନ୍ତି। ଏହି ଫ୍ରାଞ୍ଚାଇଜର ଭବିଷ୍ୟତକୁ ନେଇ ନିକଟରେ ବିଭିନ୍ନ ଗୁଜବ ସାମ୍ନାକୁ ଆସିଥିଲା। ଏଥିରେ ଦାବି କରାଯାଉଥିଲା ଯେ ଲୋକେଶ LCUରୁ ଦୂରେଇ ଯାଉଛନ୍ତି।ତେବେ ଏକ ସାର୍ବଜନୀନ କାର୍ଯ୍ୟକ୍ରମରେ ସେ ଏହି ସମସ୍ତ ଚର୍ଚ୍ଚାକୁ ଭିତ୍ତିହୀନ ବୋଲି କହିଛନ୍ତି।

ଏକ ସାକ୍ଷାତକାରରେ ଲୋକେଶ କହିଥିଲେ, "LCU ବନ୍ଦ ହୋଇଯାଇଛି ବୋଲି ଅନେକ ଚର୍ଚ୍ଚା ହେଉଛି। ପରିସ୍ଥିତି ପଡ଼ିଲେ ମୁଁ G Squadକୁ ବନ୍ଦ କରିପାରେ, କିନ୍ତୁ LCUକୁ କେବେ ବି ବନ୍ଦ କରିପାରିବି ନାହିଁ।"

ସେ ଆହୁରି କହିଥିଲେ ଯେ 'LCU' ନାମଟି ତାଙ୍କର ନୁହେଁ। ପ୍ରଶଂସକମାନେ ସୋସିଆଲ୍ ମିଡିଆରେ ଏହି ନାମ ଦେଇଥିଲେ ଏବଂ ପରେ ସେ ଏହାକୁ ଗ୍ରହଣ କରିଥିଲେ। 
ଲୋକେଶ କନକରାଜ ସ୍ପଷ୍ଟ କରିଛନ୍ତି ଯେ ତାଙ୍କର ବହୁ ପ୍ରତୀକ୍ଷିତ LCU ପ୍ରକଳ୍ପଗୁଡ଼ିକ ଯଥାରୀତି ଆଗକୁ ବଢ଼ିବ।

'କୈଥୀ ୨', 'ବିକ୍ରମ ୨' ଏବଂ ସ୍ୱତନ୍ତ୍ର 'ରୋଲେକ୍ସ' ଫିଲ୍ମ ମୋର ପ୍ରତିବଦ୍ଧତା। LCU ବନ୍ଦ ହୋଇନାହିଁ। ଏହା ନିଶ୍ଚିତ ଭାବେ ଜାରି ରହିବ।ସେ ଆହୁରି ଜଣାଇଛନ୍ତି ଯେ ଅଲ୍ଲୁ ଅର୍ଜୁନଙ୍କ ଫିଲ୍ମର କାମ ଶେଷ ହେବା ପରେ ସେ ପୁଣି LCU ପ୍ରକଳ୍ପଗୁଡ଼ିକ ଉପରେ କାମ ଆରମ୍ଭ କରିବେ।

ଲୋକେଶଙ୍କ କହିବା ଅନୁଯାୟୀ, ତାଙ୍କ ପ୍ରଯୋଜନା ସଂସ୍ଥା ଅଧୀନରେ ନିର୍ମାଣ ହେଉଥିବା 'ବେଞ୍ଜ' ମଧ୍ୟ LCUର ଏକ ଅଂଶ। ଏହା ପରେ LCUକୁ ନେଇ ଚାଲିଥିବା ସମସ୍ତ ସନ୍ଦେହ ପ୍ରାୟତଃ ଦୂର ହୋଇଯାଇଛି।

ବର୍ତ୍ତମାନ ଲୋକେଶ କନକରାଜ ଅରୁଣ ମାଥେଶ୍ୱରନଙ୍କ ନିର୍ଦ୍ଦେଶିତ 'DC' ଫିଲ୍ମରେ ଅଭିନୟ କରିବାକୁ ପ୍ରସ୍ତୁତ ହେଉଛନ୍ତି। ଏହା ସହିତ ସେ ଅଲ୍ଲୁ ଅର୍ଜୁନଙ୍କ ବହୁ ପ୍ରତୀକ୍ଷିତ ଆକ୍ସନ୍ ଫିଲ୍ମର ନିର୍ଦ୍ଦେଶନା ମଧ୍ୟ ଦେବେ।

ଏହି  ପ୍ରୋଜେକ୍ଟ ଗୁଡ଼ିକ ଶେଷ ହେବା ପରେ ସେ 'କୈଥୀ ୨', 'ବିକ୍ରମ ୨', 'ରୋଲେକ୍ସ' ଏବଂ 'ବେଞ୍ଜ' ଭଳି LCU ଫିଲ୍ମଗୁଡ଼ିକର କାମ ଆରମ୍ଭ କରିବେ।
ଲୋକେଶଙ୍କ ଏହି ଘୋଷଣା ପରେ LCUର ପରବର୍ତ୍ତୀ ଆକ୍ସନ ଫ୍ରାଞ୍ଚାଇଜର ପର୍ଯ୍ୟାୟ ପାଇଁ ଉତ୍କଣ୍ଠାର ସହ ଅପେକ୍ଷା କରିଥିବା ପ୍ରଶଂସକଙ୍କ ଉତ୍ସାହ ପୁଣିଥରେ ବଢ଼ିଯାଇଛି।