ବିଦେଶରେ ଅ-ତିଥିରେ ରଥଯାତ୍ରା କରୁଛି ଇସ୍କନ ; ପୁଣି ଥରେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଲେ ଗଜପତି

ନନ୍ଦିଘୋଷ ବ୍ୟୁରୋ : ମାନୁନି, ଭାଙ୍ଗିଚାଲିଛି ଜଗନ୍ନାଥ ସଂସ୍କୃତିର ଅନନ୍ୟ ପରମ୍ପରା । ବିଦେଶରେ ଅ-ତିଥିରେ ରଥଯାତ୍ରା କରି ଶାସ୍ତ୍ରୀୟ ଧର୍ମଗ୍ରନ୍ଥ ଦ୍ବାରା ପ୍ରଣୀତ ବିଧି ବିଧାନକୁ ଲଗାତାର କୁଠାରାଘାତ କରିଚାଲିଛି ଇସ୍କନ ସଂସ୍ଥା । ଇସ୍କନର ଏପରି ମନମାନି ବିରୋଧରେ ଅସନ୍ତୋଷ ପ୍ରକାଶ କରି ପୁଣି ଥରେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଛନ୍ତି ଗଜପତି ମହାରାଜା ଦିବ୍ୟସିଂହ ଦେବ । ପୂର୍ବରୁ ଗତ ଏପ୍ରିଲ ୨୦ ତାରିଖରେ ଗଜପତି ଚିଠି ଲେଖି ରାଷ୍ଟ୍ରପତିଙ୍କୁ ଜଣାଇଥିଲେ । ତା’ ପୂର୍ବରୁ ଗତବର୍ଷ ଅକ୍ଟୋବର ୨୪ ତାରିଖରେ  ପ୍ରଧାନମନ୍ତ୍ରୀଙ୍କୁ ଚିଠି ଲେଖି ଇସ୍କନର ମନମାନି ରୋକିବାକୁ ଆବଶ୍ୟକ ପଦକ୍ଷେପ ନେବା ପାଇଁ ଅନୁରୋଧ କରିଥିଲେ ଗଜପତି । ହେଲେ ଇସ୍କନର ଏଭଳି ମନମାନି ବିରୋଧରେ କିଛି ଅଙ୍କୁଶ ନ ଲାଗିବାରୁ ବାଧ୍ୟ ହୋଇ ପୁଣି ଥରେ ଚିଠି ଲେଖିଛନ୍ତି । ଚିଠିରେ ଉଲ୍ଲେଖ କରିଛନ୍ତି କି, ଇସ୍କନ ସଂସ୍ଥା ଏହା ଭିତରେ ଆମେରିକା, ଇଉରୋପର ୧୧୪ଟି ସ୍ଥାନରେ ଅ-ତିଥିରେ ରଥଯାତ୍ରା କରି ଶାସ୍ତ୍ରୀୟ ବିଧାନକୁ ଉଲଂଘନ କରିଆସୁଛି । ଗତ ଦୁଇ ଦଶନ୍ଧି ଧରି ଇସ୍କନ ପକ୍ଷରୁ ବିଦେଶରେ ଏପରି ଅଦିନିଆ ରଥଯାତ୍ରା କରାଯାଉଛି । ବିଦେଶରେ ରହୁଥିବା ଅଗଣିତ ପ୍ରବାସୀ ଓଡ଼ିଆ ଓ ହିନ୍ଦୁ ସମାଜ ପକ୍ଷରୁ ଏ ନେଇ ପ୍ରତିବାଦ କରାଗଲେ ବି ଇସ୍କନ କର୍ତ୍ତୃପକ୍ଷ କିଛି ବି କର୍ଣ୍ଣପାତ କରୁନାହାନ୍ତି । ଇସ୍କନର ଅଦିନିଆ ରଥଯାତ୍ରା ନେଇ ସନାତନ ଧର୍ମର ସର୍ବୋଚ୍ଚ ଗୁରୁ ଶଙ୍କରାଚାର୍ଯ୍ୟଙ୍କର ମତାମତ ନିଆଯାଇଥିଲା । ଶଙ୍କରାଚାର୍ଯ୍ୟ ଅ-ତିଥିରେ ସ୍ନାନଯାତ୍ରା ଓ ରଥଯାତ୍ରାକୁ ପରମ୍ପରା ଓ ଧର୍ମ ବିରୋଧୀ ବୋଲି ମତ ଦେଇଥିଲେ । ଏ ବାବଦରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ବିଶେଷଜ୍ଞଙ୍କ ସହ ଆଲୋଚନା କରି ଏକାଧିକ ଥର ଇସ୍କନ କର୍ତ୍ତୃପକ୍ଷଙ୍କୁ ଜଣାଇ ଦିଆଗଲା । ମାୟାପୁରୀ ସ୍ଥିତ ଇସ୍କନ କର୍ତ୍ତୃପକ୍ଷ ମଧ୍ୟ ଅ-ତିଥିରେ ମହାପ୍ରଭୁଙ୍କ କୌଣସି କାର୍ଯ୍ୟ କରିବେନି ବୋଲି ପ୍ରତିଶ୍ରୁତି ବି ଦେଇଥିଲେ । ହେଲେ ତଥାପି ବିଦେଶରେ ମହାପ୍ରଭୁଙ୍କ ଅଦିନରେ ସ୍ନାନଯାତ୍ରା ଓ ରଥଯାତ୍ରା ବର୍ଷ ତମାମ କରି ପରମ୍ପରା ଭାଙ୍ଗୁଛି ଇସ୍କନ । ତୁରନ୍ତ ଏ ଦିଗରେ ଆବଶ୍ୟକ ପଦକ୍ଷେପ ନେବାକୁ ଗଜପତି ଚିଠିରେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କୁ ଜଣାଇଛନ୍ତି । ଗଜପତି ନିଜେ କେତେକ ପରିଚାଳନା କମିଟି ସଦସ୍ଯଙ୍କ ସହ ରାଷ୍ଟ୍ରପତି ଭବନରେ ରାଷ୍ଟ୍ରପତିଙ୍କୁ ଭେଟି ଆଲୋଚନା କରିବାକୁ ସମୟ ମାଗିଛନ୍ତି । ଏହାସହିତ ପବିତ୍ର ସ୍ନାନଯାତ୍ରା ଓ ରଥଯାତ୍ରା ପାଇଁ ଉଭୟଙ୍କୁ ଶୁଭେଚ୍ଛା ଜଣାଇଛନ୍ତି ଗଜପତି ।