Amarnath Yatra 2026: ଆରମ୍ଭ ହେଲା ଅମରନାଥ ଯାତ୍ରା; ୫୭ ଦିନ ଧରି ଚାଲିବ, ବାବା ବର୍ଫାନୀଙ୍କ ଦର୍ଶନ ପାଇଁ ବାହାରିଲା ପ୍ରଥମ ଦଳ
ଜମ୍ମୁ/ଶ୍ରୀନଗର, ୨।୭: ଜମ୍ମୁ-କାଶ୍ମୀରରେ ପବିତ୍ର ଓ ପ୍ରତିଷ୍ଠିତ ବାବା ଅମରନାଥ ଯାତ୍ରା ଆନୁଷ୍ଠାନିକ ଭାବେ ଆରମ୍ଭ ହୋଇଯାଇଛି । ଗୁରୁବାର ସକାଳେ ଜମ୍ମୁରୁ ଶ୍ରଦ୍ଧାଳୁଙ୍କ ପ୍ରଥମ ଦଳ ଶ୍ରୀନଗର ଅଭିମୁଖେ ଯାତ୍ରା କରିଛି । କଡ଼ା ସୁରକ୍ଷା ମଧ୍ୟରେ ଏହି ଜଥା ଆଜି ସନ୍ଧ୍ୟାରେ ଶ୍ରୀନଗରରେ ପହଞ୍ଚିବ । ଚଳିତ ବର୍ଷ ଯାତ୍ରାରେ ପ୍ରଥମ ଥର ପାଇଁ ବାବାଙ୍କ ଦର୍ଶନ କରିବାକୁ ଆସିଥିବା ଯୁବ ଶ୍ରଦ୍ଧାଳୁଙ୍କ ସଂଖ୍ୟା ବେଶ୍ ଅଧିକ ରହିଛି । ଗୁରୁବାର ସକାଳ ପ୍ରାୟ ୫ଟା ସମୟରେ ଜମ୍ମୁ-କାଶ୍ମୀରର ଉପ-ରାଜ୍ୟପାଳ ମନୋଜ ସିହ୍ନା ଅମରନାଥ ଯାତ୍ରୀଙ୍କ ପ୍ରଥମ ଦଳକୁ ପତାକା ଦେଖାଇ ଏହି ଯାତ୍ରାର ଶୁଭାରମ୍ଭ କରିଥିଲେ । ଏହି ସମୟରେ ସମଗ୍ର ଅଞ୍ଚଳ 'ବମ୍ ବମ୍ ଭୋଲେ' ଏବଂ 'ହର ହର ମହାଦେବ' ଧ୍ୱନିରେ ପ୍ରକମ୍ପିତ ହୋଇଉଠିଥିଲା । ଦେଶର କୋଣ-ଅନୁକୋଣରୁ ଆସିଥିବା ଶ୍ରଦ୍ଧାଳୁଙ୍କ ମଧ୍ୟରେ ଅଦ୍ଭୁତ ଉତ୍ସାହ ଦେଖିବାକୁ ମିଳିଥିଲା । ବିଶେଷ କରି ରାଜସ୍ଥାନରୁ ଆସିଥିବା ଯୁବ ଶ୍ରଦ୍ଧାଳୁଙ୍କ ଜୋସ୍ ବେଶ୍ ହାଇ ଥିଲା, ଯେଉଁମାନଙ୍କ ମଧ୍ୟରୁ ଅଧିକାଂଶ ପ୍ରଥମ ଥର ପାଇଁ ବାବା ବର୍ଫାନୀଙ୍କ ଦର୍ଶନ କରିବାକୁ ଯାଉଛନ୍ତି ।
"ଆମେ ଗୋଟିଏ ବର୍ଷ ହେବ ଏହି ଦିନକୁ ଅପେକ୍ଷା କରିଥିଲୁ । ଯେତେବେଳେ ରେଜିଷ୍ଟ୍ରେସନ ଆରମ୍ଭ ହେଲା, ଆମେ ପ୍ରଥମେ ନାମ ପଞ୍ଜିକରଣ କରିଥିଲୁ ଯେମିତି ପ୍ରଥମ ଦଳରେ ହିଁ ବାବାଙ୍କ ଦର୍ଶନ କରିପାରିବୁ । ଯଦି ବାବା ଡାକିଛନ୍ତି ଏବଂ ସେନା ଆମ ସୁରକ୍ଷାରେ ଅଛି, ତେବେ କୌଣସି ଭୟ ନାହିଁ ।" ବୋଲି ଶ୍ରଦ୍ଧାଳୁ କହିଛନ୍ତି । ଯାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି କେନ୍ଦ୍ର ସରକାର ଏବଂ ଜମ୍ମୁ-କାଶ୍ମୀର ପ୍ରଶାସନ ବ୍ୟାପକ ବ୍ୟବସ୍ଥା କରିଛନ୍ତି । ପ୍ରାୟ ୭୦,୦୦୦ରୁ ଅଧିକ ଅତିରିକ୍ତ କେନ୍ଦ୍ରୀୟ ସୁରକ୍ଷା ବଳ ଜମ୍ମୁ-କାଶ୍ମୀରରେ ମୁତୟନ ହୋଇଛନ୍ତି । CRPF ଯବାନ ଏବଂ କୋବ୍ରା କମାଣ୍ଡୋମାନେ ଶ୍ରଦ୍ଧାଳୁଙ୍କ ଗାଡ଼ି ସହ ରହିଛନ୍ତି । ଯେତେବେଳେ ଅମରନାଥ ଯାତ୍ରୀଙ୍କ ଦଳ ଜାତୀୟ ରାଜପଥ ଦେଇ ଗତି କରୁଛି, ସେତେବେଳେ ସୁରକ୍ଷା ଦୃଷ୍ଟିରୁ ଅନ୍ୟ ସାଧାରଣ ଗାଡ଼ି ଚଳାଚଳକୁ ସମ୍ପୂର୍ଣ୍ଣ ବନ୍ଦ ରଖାଯାଉଛି । ପ୍ରଥମ ଦଳର ଏହି ଶ୍ରଦ୍ଧାଳୁମାନେ ବାଲଟାଲ ଏବଂ ପହଲଗାମ ବେସ୍ କ୍ୟାମ୍ପରେ ପହଞ୍ଚିବା ପରେ, ଶୁକ୍ରବାର ସକାଳୁ ପବିତ୍ର ଶିବଲିଙ୍ଗଙ୍କ ଦର୍ଶନ ପାଇଁ ଆଗକୁ ଯାତ୍ରା ଆରମ୍ଭ କରିବେ ।
ଏହା ବି ପଢ଼ନ୍ତୁ... ବଢିଲା ବୈଦେଶିକ ସଚିବ ବିକ୍ରମ ମିଶ୍ରୀଙ୍କ କାର୍ଯ୍ୟକାଳ,୧ ବର୍ଷ ବୃଦ୍ଧି କଲେ କେନ୍ଦ୍ର ସରକାର…
ଅମରନାଥ ଯାତ୍ରାକୁ ନେଇ ବିଜେପି ପକ୍ଷରୁ ଏକ ବଡ଼ ଦାବି କରାଯାଇଛି । ଜମ୍ମୁ-କାଶ୍ମୀର ବିଜେପିର ବିରୋଧୀ ଦଳ ନେତା ସୁନୀଲ ଶର୍ମା ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ଚଳିତ ବର୍ଷର ଅମରନାଥ ଯାତ୍ରା ପୂର୍ବର ସମସ୍ତ ରେକର୍ଡ ଭାଙ୍ଗିବ । ଶ୍ରଦ୍ଧାଳୁମାନେ ଅତୀତର ପହଲଗାମ ଆକ୍ରମଣ ଭଳି ଘଟଣାକୁ ଭୁଲି କେବଳ ନିଜର ଶ୍ରଦ୍ଧା ଓ ବିଶ୍ୱାସ ସହ ବାବାଙ୍କ ଦର୍ଶନ ପାଇଁ ଆଗେଇ ଆସିଛନ୍ତି । ସେ ଆହୁରି କହିଛନ୍ତି, "ବୁଧବାର ମହାଆରତୀରେ ଯେଉଁ ଜନସମୁଦ୍ର ଏବଂ ଉତ୍ସାହ ଦେଖିବାକୁ ମିଳିଥିଲା, ସେହି ସମାନ ଉତ୍ସାହ ଆଜି ମଧ୍ୟ ରହିଛି । ଶ୍ରଦ୍ଧାଳୁଙ୍କ ମନରେ କୌଣସି ଡର ବା ଭୟ ନାହିଁ ଏବଂ ସେମାନଙ୍କର ସୁରକ୍ଷା ବଳ ଉପରେ ପୂର୍ଣ୍ଣ ଭରସା ଅଛି । ଏହି ଯାତ୍ରାରେ ପାଣିପାଗ ଏବଂ ଭୌଗୋଳିକ ପରିସ୍ଥିତି ଭଳି ଅନେକ ଆହ୍ୱାନ ରହିଛି, କିନ୍ତୁ ମହାଦେବଙ୍କ କୃପାରୁ ସବୁ କିଛି ଶାନ୍ତିପୂର୍ଣ୍ଣ ଭାବେ ସମ୍ପନ୍ନ ହେବ ।"
