୩୫ଟି ପୌରାଂଚଳ ଅଧ୍ୟକ୍ଷ ପଦବୀ ସଂରକ୍ଷଣ ନେଇ ଚିଠା ବିଜ୍ଞପ୍ତି ପ୍ରକାଶ
ଭୁବନେଶ୍ୱର : ନୂତନ ଗଠିତ ୨୯ଟି ଏନଏସି ଓ ୬ଟି ମ୍ୟୁନିସପାଲଟିରେ ଅଧ୍ୟକ୍ଷ ପଦବୀ ସଂରକ୍ଷଣ ପାଇଁ ରାଜ୍ୟ ସରକାରଙ୍କ ପକ୍ଷରୁ ଚିଠା ବିଜ୍ଞପ୍ତି ପ୍ରକାଶ ପାଇଛି। ଓଡ଼ିଶା ମ୍ୟୁନିସପାଲଟି ଆକ୍ଟ-୧୯୫୦ ଓ ଓଡ଼ିଶା ମ୍ୟୁନିସପାଲଟି ରୁଲସ-୧୯୯୪ର ବିଭିନ୍ନ ପ୍ରାବଧାନ ଆଧାରରେ ଏହି ଚିଠା ବିଜ୍ଞପ୍ତି ଜାରି କରି ୧୫ଦିନ ସୁଦ୍ଧା ଆପତ୍ତି-ଅଭିଯୋଗ ଓ ମତାମତ ଲୋଡ଼ିଛନ୍ତି ରାଜ୍ୟ ସରକାର। ନିର୍ଦ୍ଧାରିତ ସମୟସୀମା ମଧ୍ୟରେ ରାଜ୍ୟ ପୌର ପ୍ରଶାସନର ନିର୍ଦ୍ଦେଶକଙ୍କ କାର୍ଯ୍ୟାଳୟରେ ଦାଖଲ ହୋଇଥିବା ସମସ୍ତ ଆପତ୍ତି ଓ ପରାମର୍ଶକୁ ବିଚାରକୁ ନେବା ପରେ ହିଁ ସରକାର ସଂରକ୍ଷଣ ବ୍ୟବସ୍ଥାକୁ ଚୂଡ଼ାନ୍ତ ରୂପ ଦେବେ ବୋଲି ରାଜ୍ୟ ଗୃହନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ଜାରି ବିଜ୍ଞପ୍ତିରେ ଦର୍ଶାଯାଇଛିପ୍ରକାଶିତ ବିଜ୍ଞପ୍ତି ଅନୁସାରେ, ରାଜ୍ୟ ସରକାର ଓଡ଼ିଶା ମ୍ୟୁନିସପାଲଟି ଆକ୍ଟ-୧୯୫୦ର ଧାରା ୪୭(୩) ଓ (୪) ଏବଂ ଓଡ଼ିଶା ମ୍ୟୁନିସପାଲଟି(ୱାର୍ଡ ସୀମା ନିର୍ଦ୍ଧାରଣ, ଆସନ ସଂରକ୍ଷଣ ଓ ନିର୍ବାଚନ ପରିଚାଳନା) ରୁଲସ-୧୯୯୪ର ନିୟମ ୬୭(୫) ର ପ୍ରାବଧାନ ଆଧାରରେ ସଂରକ୍ଷଣ ବ୍ୟବସ୍ଥା କରାଯାଇଛି। ଗତବର୍ଷ ଏହି ସମସ୍ତ ଏନଏସି ଓ ମ୍ୟୁନିସପାଲଟି ଗଠନ ନିମନ୍ତେ ରାଜ୍ୟ ସରକାର ବିଧିବଦ୍ଧ ବିଜ୍ଞପ୍ତି ପ୍ରକାଶ କରିଥିଲେ। ଏହି ପ୍ରସ୍ତାବିତ ସଂରକ୍ଷଣରେ ଅନୁସୂଚିତ ଜାତି (ମହିଳା) ବର୍ଗ ପାଇଁ ୧୧ଟି ଏନଏଏସି ଯଥା- ପାତ୍ରପୁର, ସାଲେପୁର, ବିଷମକଟକ, ଜଗନ୍ନାଥପ୍ରସାଦ, ତିହିଡ଼ି, ସୋହେଲା,ବୀରମହାରାଜପୁର, ନରସିଂହପୁର, ନର୍ଲା, ସିମୁଳିଆ ଓ ବଡ଼ମ୍ବା ଏନଏସିର ଅଧ୍ୟକ୍ଷ ପଦବୀକୁ ସଂରକ୍ଷିତ ରଖିବାକୁ ପ୍ରସ୍ତାବ ଦିଆଯାଇଛି।ସେହିପରି ୬ଟି ଏନଏଏସି ଓ ଗୋଟିଏ ମ୍ୟୁନିସପାଲଟିର ଅଧ୍ୟକ୍ଷ ପଦବୀକୁ ଅନୁସୂଚିତ ଜାତ ବର୍ଗ ପାଇଁ ସଂରକ୍ଷିତ ରଖାଯାଇଛି। ସେଗୁଡ଼ିକ ହେଲା ଲୋଇସିଂହା, ଧୁଷୁରୀ, ପାଳଲହଡ଼ା, ଯଶୀପୁର, ବସ୍ତା, ଟାଙ୍ଗୀ ଏନଏଏସି ସମେତ ଛତ୍ରପୁର ମ୍ୟୁନିସପାଲଟି। ଏହି ପୌରାଚଳଗୁଡ଼ିକର ଅଧ୍ୟକ୍ଷ ପଦବୀକୁ ଅନୁସୂଚିତ ଜାତି ବର୍ଗ ପାଇଁ ସଂରକ୍ଷିତ ରହିଛି।
ଅନୁସୂଚିତ ଜନଜାତି(ମହିଳା) ବର୍ଗଙ୍କ ପାଇଁ ୭ଟି ଏନଏଏସି ଓ ଅନୁସୂଚିତ ଜନଜାତି ବର୍ଗ ପାଇଁ ୪ଟି ଏନଏଏସିର ଅଧ୍ୟକ୍ଷ ପଦବୀକୁ ସଂରକ୍ଷିତ ରଖାଯାଇଛି। ଅନୁସୂଚିତ ଜନଜାତି(ମହିଳା)ଙ୍କ ପାଇଁ ଯେଉଁ ୭ଟି ଏନଏଏସିର ଅଧ୍ୟକ୍ଷ ପଦବୀକୁ ସଂରକ୍ଷିତ ରଖାଯାଇଛି ସେଗୁଡ଼ିକ ହେଲା ଚିତ୍ରଡ଼ା,ବାଙ୍ଗିରିପୋଷି, କପ୍ତିପଦା, ବେତନଟୀ, ବାମଡ଼ା, ରେଙ୍ଗାଲି ଓ ବୋରିଗୁମ୍ମା। ସେହିପରି ରାସଗୋବିନ୍ଦପୁର, ଗନ୍ଦିଁଆ, ଜୟପାଟଣା ଓ ଚଣ୍ଡିଖୋଲ ଏନଏସିର ଅଧ୍ୟକ୍ଷ ପଦବୀକୁ ଅନୁସୂଚିତ ଜନଜାତି ବର୍ଗ ପାଇଁ ପ୍ରସ୍ତାବିତ କରାଯାଇଛି। ଏସବୁ ବ୍ୟତୀତ ବୌଦ୍ଧଗଡ଼, ଆସିକା, ଭଞ୍ଜନଗର ଓ କବିସୂର୍ଯ୍ୟନଗର ମ୍ୟୁନିସିପାଲିଟିର ଅଧ୍ୟକ୍ଷ ପଦବୀକୁ କେବଳ ମହିଳାମାନଙ୍କ ପାଇଁ ସଂରକ୍ଷିତ ରଖାଯାଇଥିବାବେଳେ ପୋଲସରା ମ୍ୟୁନିସପାଲଟି ଓ ଓଡ଼ଗାଁ ଏନଏସି କୁ ସାଧାରଣ ବା ଅଣସଂରକ୍ଷିତ ବର୍ଗରେ ରଖାଯାଇଛି।ଓଡିଶା ପୌର ପ୍ରଶାସନର ନିର୍ଦ୍ଦେଶକଙ୍କ ଦ୍ୱାରା ଜାରି ଏହି ସରକାରୀ ଚିଠିର ନକଲକୁ ରାଜ୍ୟ ନିର୍ବାଚନ ଆୟୋଗଙ୍କ ସଚିବ, ସମସ୍ତ ଆରଡିସି, ଜିଲ୍ଲାପାଳ ଓ ପୌର ସଂସ୍ଥାର ନିର୍ବାହୀ ଅଧିକାରୀମାନଙ୍କ ନିକଟକୁ ପଠାଯାଇଛି। ସାଧାରଣ ଲୋକଙ୍କ ଅବଗତି ନିମନ୍ତେ ଏହି ସରକାରୀ ବିଜ୍ଞପ୍ତିକୁ ସମ୍ପୃକ୍ତ ପୌର ସଂସ୍ଥା ଓ ଜିଲ୍ଲାପାଳଙ୍କ କାର୍ଯ୍ୟାଳୟର ନୋଟିସ୍ ବୋର୍ଡରେ ପ୍ରଦର୍ଶନ କରିବାକୁ କୁହାଯାଇଛି।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ SAMAYA - ସମୟ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
