ମହାକାଶର ଗାର୍ଡେନ

ମହାକାଶରେ ଭାସମାନ ଅବସ୍ଥାରେ ଥିବା ଏକ କୁନି ବଗିଚା ଏବେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି, ଯାହାର ଝଲକ ମହାକାଶଚାରୀ ସୋଫି ଆଡେନୋଟ୍ ଆନ୍ତର୍ଜାତୀୟ ମହାକାଶ ଷ୍ଟେସନରୁ ସେୟାର କରିଛନ୍ତି । କଲମ୍ବସରୁ ନିକଟରେ ଆସିଥିବା ଟାଇମଲାପ୍ସ ଭିଡିଓରେ ଦେଖାଯାଉଥିବା ଗୋଲାପି ରଙ୍ଗର ଆଲୋକ ପ୍ରକୃତରେ ମହାକାଶ ଷ୍ଟେସନର ପନିପରିବା ଉତ୍ପାଦନ ପ୍ରଣାଳୀ ‘ଭେଜି’ରୁ ବାହାରୁଛି, ଯେଉଁଥିରୁ ନିର୍ଗତ ମାଜେଣ୍ଟା-ଗୋଲାପି ଆଲୋକ ଗଛର ବୃଦ୍ଧି ପାଇଁ ସବୁଠାରୁ ଉପଯୁକ୍ତ ଅଟେ । ‘ଏକ୍ସପେଡିସନ ୭୪’ ସମୟରେ ଏହି ସ୍ପେସ୍ ଗାର୍ଡେନରେ ‘ଭେଜ-୦୬’ ନାମକ ଏକ ପରୀକ୍ଷଣ କରାଯାଇଥିଲା, ଯାହାର ମୁଖ୍ୟ ଉଦ୍ଦେଶ୍ୟ ଥିଲା ଶୂନ୍ୟ ମାଧ୍ୟାକର୍ଷଣ ବଳରେ ଆଲଫାଲଫା ଗଛ ଏବଂ ଉପକାରୀ ବ୍ୟାକ୍ଟେରିଆ ମିଶି ବାୟୁମଣ୍ଡଳରୁ କିଭଳି ନାଇଟ୍ରୋଜେନ୍ ଗ୍ରହଣ କରି ପୋଷକ ତତ୍ତ୍ୱରେ ପରିଣତ କରୁଛନ୍ତି । ତାହା ଅଧ୍ୟୟନ କରିବା ଏବଂ ପୃଥିବୀରେ ଗଛକୁ ସିଧା ଠିଆ ହେବାରେ ସାହାଯ୍ୟ କରୁଥିବା ‘ଲିଗ୍ନିନ୍’ ନାମକ ପଦାର୍ଥ ମହାକାଶରେ କିଭଳି ବଦଳୁଛି ତାହା ଜାଣିବା । ମହାକାଶଚାରୀମାନଙ୍କ ଦ୍ୱାରା ଏହି ଗଛଗୁଡ଼ିକର ସଫଳ ଅମଳ କରାଯିବା ପରେ ସେଗୁଡ଼ିକୁ ଫ୍ରିଜରରେ ରଖି ‘ସିଆରଏସ ଏସପିଏକ୍ସ ୩୪ ’ କାର୍ଗୋ ଡ୍ରାଗନ୍ ସାହାଯ୍ୟରେ ପୃଥିବୀକୁ ଅଧିକ ଗବେଷଣା ପାଇଁ ପଠାଯାଇଛି । ସୋଫି କହିଛନ୍ତି ଯେ, ଏହି ବଗିଚାରେ କାମ କରିବା ଦ୍ୱାରା ସେମାନଙ୍କୁ ନିଜ ଘରର ଅନୁଭୂତି ମିଳିଥାଏ । ଭବିଷ୍ୟତର ଦୀର୍ଘ ମହାକାଶ ଅଭିଯାନରେ ସତେଜ ଖାଦ୍ୟର ଉତ୍ପାଦନ ମହାକାଶଚାରୀଙ୍କ ପୋଷଣ ସହ ସେମାନଙ୍କ ମନୋବଳ ବଢ଼ାଇବା ପାଇଁ ଅତ୍ୟନ୍ତ ଜରୁରୀ ଅଟେ । ଏହା ସହିତ ନାଇଟ୍ରୋଜେନ୍ ପ୍ରକ୍ରିୟାକରଣର ଏହି ଗବେଷଣା ପୃଥିବୀରେ ମାଟିର ଗୁଣବତ୍ତା ବଢ଼ାଇବା ଏବଂ କୃଷି ଓ ଜଙ୍ଗଲ ବିଜ୍ଞାନର ଉନ୍ନତିରେ ମଧ୍ୟ ବେଶ୍ ସହାୟକ ହେବ ।