ଛାତିଥରା….ଦିଲ୍ଲୀ ଅଗ୍ନିକାଣ୍ଡରେ ୨୧ ମୃତ, ଜୀବନ ବଞ୍ଚାଇବା ପାଇଁ ଛୁଆଙ୍କୁ ଧରି ତୃତୀୟ ମହଲାରୁ ଡ଼େଇଁଲେ ମହିଳା

ନୂଆଦିଲ୍ଲୀ,୩ା୬: ବୁଧବାର ସକାଳେ ଦକ୍ଷିଣ ଦିଲ୍ଲୀର ମାଲବ୍ୟ ନଗରରେ ଏକ ହୋଟେଲରେ ଭୟଙ୍କର ଅଗ୍ନିକାଣ୍ଡ ଘଟିଥିଲା । ନିଆଁ ଆଁରେ ୨୧ଜଣଙ୍କ ମୃତ୍ୟୁ ହୋଇଥିବା ବେଳେ ୪୦ରୁ ଅଧିକ ଲୋକଙ୍କୁ ଉଦ୍ଧାର କରାଯାଇଥିବା ନେଇ ଅଧିକାରୀମାନେ ସୂଚନା ଦେଇଛନ୍ତି । ଧୂଆଁ ଭର୍ତ୍ତି କୋଠାରୁ ବାହାରକୁ ପଳାଇବାକୁ ଲୋକମାନେ ଦୌଡ଼ି ଦୌଡ଼ି ବାହାରକୁ ବାହାରିଥିଲେ । ସେହି ସମୟର ଭିଡ଼ିଓ ବର୍ତ୍ତମାନ ଭାଇରାଲ ହେବାରେ ଲାଗିଛି, ଯାହାକି ସମସ୍ତଙ୍କୁ ସ୍ତବ୍ଧ କରିଦେଇଛି ।

ମୃତକଙ୍କ ମଧ୍ୟରୁ ଅନେକ ବିଦେଶୀ, ମୁଖ୍ୟତଃ ମଧ୍ୟ ଏସୀୟ ଏବଂ ଆଫ୍ରିକୀୟ ଦେଶରୁ ଆସିଥିବା ଅଧିକାରୀମାନେ କହିଛନ୍ତି । ଆହତଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ବୋଲି କୁହାଯାଉଛି । ଘଟଣାସ୍ଥଳରୁ ମିଳିଥିବା ନାଟକୀୟ ଦୃଶ୍ୟରେ ଦୁଇଜଣ ମହିଳା ନିଆଁ ଏବଂ ଘନ ଧୂଆଁରୁ ରକ୍ଷା ପାଇବା ପାଇଁ ପ୍ରାଣପଣେ ଚେଷ୍ଟା କରି କୋଠାରୁ ଡେଇଁ ପଡ଼ିଥିବା ଦେଖାଯାଇଥିଲା। ସେମାନଙ୍କ ଅବସ୍ଥା ତୁରନ୍ତ ଜଣାପଡିନଥିଲା।

ଏକ ସରକାରୀ ବିଜ୍ଞପ୍ତିରେ କୁହାଯାଇଛି ଯେ ନିଆଁକୁ ନିୟନ୍ତ୍ରଣ କରିବା ଏବଂ ଭିତରେ ଫସି ରହିଥିବା ଲୋକଙ୍କୁ ବାହାର କରିବା ପାଇଁ ପ୍ରାୟ ଆଠଟି ଦମକଳ ଗାଡ଼ି ପଠାଯାଇଥିଲା। ସକାଳ ପ୍ରାୟ ୯ଟାରେ ଦିଲ୍ଲୀ ଅଗ୍ନିଶମ ସେବାକୁ ଅଗ୍ନିକାଣ୍ଡ ବିଷୟରେ ସୂଚନା ମିଳିଥିଲା। ଦିଲ୍ଲୀ ଅଗ୍ନିଶମ ସେବା (ଡିଏଫଏସ)ର ଜଣେ ଅଧିକାରୀଙ୍କ ଅନୁଯାୟୀ, ପ୍ରାରମ୍ଭିକ ପ୍ରତିକ୍ରିୟାରେ ଦୁଇଟି ଜଳ ଟେଣ୍ଡର, ଦୁଇଟି ଜଳ ବୋଜର, ଏକ କ୍ୱିକ୍ ରେସପନ୍ସ ଯାନ ଏବଂ ଅନ୍ୟାନ୍ୟ ଅଗ୍ନି ନିର୍ବାପକ ୟୁନିଟ୍ ଅନ୍ତର୍ଭୁକ୍ତ ଥିଲେ ।

ପ୍ରଧାନମନ୍ତ୍ରୀ ଆହତମାନଙ୍କର ଆଶୁ ଆରୋଗ୍ୟ କାମନା କରିବା ସହ ମୃତକଙ୍କ ସମ୍ପର୍କୀୟଙ୍କୁ ପ୍ରଧାନମନ୍ତ୍ରୀ ରିଲିଫ୍‌ ଫଣ୍ଡରୁ ପ୍ରତ୍ୟେକ ପରିବାରକୁ ୨ ଲକ୍ଷ ଟଙ୍କା ଲେଖାଏ ଅନୁକମ୍ପାମୂଳକ ସହାୟତା ରାଶି ଘୋଷଣା କରିଛନ୍ତି। ଆହତଙ୍କ ପାଇଁ ୫୦ ହଜାର ଲେଖାଏ ସହାୟତା ଘୋଷଣା କରିଛନ୍ତି ପ୍ରଧାନମନ୍ତ୍ରୀ।