ଲଗାଣ ବର୍ଷା ହେଲା କାଳ, କାନ୍ଥ ପଡି ସ୍ବାମୀ ମୃତ, ସ୍ତ୍ରୀ ଗୁରୁତର
ବଲାଙ୍ଗିର ୫।୭: ବଲାଙ୍ଗିର ଜିଲ୍ଲାରେ ଲାଗି ରହିଛି ବର୍ଷା । ଲଗାଣ ବର୍ଷା ଯୋଗୁଁ କାନ୍ଥପଡି ସ୍ୱାମୀଙ୍କ ମୃତ୍ୟୁ ହୋଇଥିବା ବେଳେ ସ୍ତ୍ରୀ ଗୁରୁତର ହୋଇଛନ୍ତି ବଲାଙ୍ଗିର ଜିଲ୍ଲା ପୁଇଁନ୍ତଲା ବ୍ଲକ୍ ପଥର୍ଲା ପଞ୍ଚାୟତ ଲୁହୁରେନପାଲି ଗାଁରେ ଏପରି ଘଟଣା ଘଟିଛି । ମୃତକ ଜଣକ ହେଲେ ଗଣ୍ଡାରାମ କୁମ୍ଭାର।
ଶନିବାର ରାତିରେ ଗଣ୍ଡାରାମ କୁମ୍ଭାର ଓ ସ୍ତ୍ରୀ ଲକ୍ଷ୍ମୀ କୁମ୍ଭାର ଝାଟିମାଟି ଘରେ ଶୋଇଥିଲେ । ପ୍ରବଳ ବର୍ଷା ଯୋଗୁଁ ଘର ଭାଙ୍ଗିଯାଇ ଦୁଇ ଜଣ ଚାପି ହୋଇଯାଇଥିଲେ । ରବିବାର ସକାଳୁ ପଡୋଶୀ ଦେଖିବା ପରେ ଗୁରୁତର ଅବସ୍ଥାରେ ଲକ୍ଷ୍ମୀଙ୍କୁ ଉଦ୍ଧାର କରି ହସ୍ପିଟାଲକୁ ପଠାଇଥିଲେ । କିନ୍ତୁ ଘଟଣାସ୍ଥଳରେ ଗଣ୍ଡରାମଙ୍କର ଜୀବନ ଚାଲିଯାଇଥିଲା । ପୁଇଁତଲା ପୋଲିସ ମୃତଦେହ ଉଦ୍ଧାର କରି ବ୍ୟବଛେଦ ପାଇଁ ପଠାଇଛି। ସେହିପରି ଗୋଟିଏ ବାଛୁରୀର ମଧ୍ୟ ମୃତ୍ୟୁ ହୋଇଥିବା ସୂଚନା ମିଳିଛି ।
