ରାଜ୍ୟରେ ପିଭିଟିଜିଙ୍କ ସ୍ବାସ୍ଥ୍ୟାବସ୍ଥା ଚିନ୍ତାଜନକ, ୮୧ପ୍ରତିଶତ ମହିଳା ବ୍ୟବହାର କରୁନାହାନ୍ତି…

ଭୁବନେଶ୍ୱର,୨୧।୭(ସୁଚିସ୍ମିତା ସାହୁ): ଓଡ଼ିଶାର ବିଶେଷ ଭାବେ ଅନୁନ୍ନତ ଜନଜାତି ଗୋଷ୍ଠୀ(ପିଭିଟିଜି)ଙ୍କ ମଧ୍ୟରେ କୁପୋଷଣ, ରକ୍ତହୀନତା, ମାତୃ ସ୍ବାସ୍ଥ୍ୟ ଓ ମୌଳିକ ସ୍ବାସ୍ଥ୍ୟସେବାର ଅଭାବ ଚିନ୍ତାର ବିଷୟ ପାଲଟିଛି। ଉତ୍କଳ ବିଶ୍ୱବିଦ୍ୟାଳୟର ଜନଜାତି ଏବଂ ପ୍ରାନ୍ତିକ ସମ୍ପ୍ରଦାୟ ଅଧ୍ୟୟନ ଉତ୍କର୍ଷ କେନ୍ଦ୍ର ପକ୍ଷରୁ କରାଯାଇଥିବା ଅଧ୍ୟୟନରେ ଏଭଳି ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ସୋମବାର ରାଜ୍ୟପାଳଙ୍କୁ ଦିଆଯାଇଥିବା ଏହି ରିପୋର୍ଟରେ ପିଭିଟିଜିଙ୍କ ସ୍ବାସ୍ଥ୍ୟ ଓ ପୋଷଣ ସେବାକୁ ସୁଦୃଢ଼ କରିବାକୁ ସୁପାରିସ୍‌ କରାଯାଇଛି।
ସର୍ବେକ୍ଷଣରେ ଓଡ଼ିଶାର ୧୩ଟି ପିଭିଟିଜିଙ୍କ ମଧ୍ୟରୁ ବଣ୍ଡା, ଦିଦାୟୀ, ଡଙ୍ଗରିଆ କନ୍ଧ, କୁଟିଆ କନ୍ଧ, ଜୁଆଙ୍ଗ, ପାଉଡ଼ି ଭୂୟାଁ, ପାହାଡ଼ି ଖଡ଼ିଆ, ମାଙ୍କିଡ଼ିଆ, ଲୋଧା ଓ ଲାଞ୍ଜିଆ ସଉରା ସମେତ ୧୦ଟି ସମ୍ପ୍ରଦାୟକୁ ସାମିଲ କରାଯାଇଥିଲା। ମାଲକାନଗିରି, ରାୟଗଡ଼ା, କନ୍ଧମାଳ, କେନ୍ଦୁଝର, ଦେବଗଡ଼, ମୟୂରଭଞ୍ଜ ଓ ଗଜପତି ଜିଲାର ୨,୦୪୧ଟି ପରିବାରର ୯,୨୨୨ ବ୍ୟକ୍ତିଙ୍କ ଉପରେ କ୍ଷେତ୍ରଭିତ୍ତିକ ଅଧ୍ୟୟନ କରାଯାଇଥିଲା। ଅଧ୍ୟୟନ ଅନୁଯାୟୀ, ଋତୁସ୍ରାବ ସମୟରେ ୮୧ପ୍ରତିଶତ ମହିଳା ସାନିଟାରୀ ନାପ୍‌କିନ୍‌ ବ୍ୟବହାର କରୁନାହାନ୍ତି, ଯାହା ସେମାନଙ୍କୁ ବିଭିନ୍ନ ସଂକ୍ରମଣ ଓ ସ୍ବାସ୍ଥ୍ୟ ସମସ୍ୟାରେ ପକାଉଛି। ସେହିପରି ୫୯ପ୍ରତିଶତ ମହିଳା ଘରେ ପ୍ରସବ କରୁଥିବାରୁ ମା’ ଓ ନବଜାତ ଶିଶୁଙ୍କ ସ୍ବାସ୍ଥ୍ୟ ଗୁରୁତର ବିପଦରେ ପଡ଼ୁଛି। ପିଭିଟିଜି ଅଞ୍ଚଳରେ ନିରକ୍ଷରତା ହାର ୩୯ପ୍ରତିଶତ ରହିଛି। ବାସଗୃହ, ପରିମଳ ବ୍ୟବସ୍ଥା ଓ ବିଦ୍ୟୁତ୍‌ ସୁବିଧାରେ ବ୍ୟାପକ ଅସମାନତା ଥିବାବେଳେ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍‌ଓ)-ଓଏଚ୍‌ଇପିଇଇ ମାନଦଣ୍ଡ ତୁଳନାରେ ଶିଶୁଙ୍କ ଉଚ୍ଚତା ଏବଂ ଓଜନ କମ୍‌ ଥିବାରୁ ଦୀର୍ଘସ୍ଥାୟୀ କୁପୋଷଣ ସମସ୍ୟା ସ୍ପଷ୍ଟ ବାରିହୋଇପଡୁଛି। ସେହିପରି ୩୭ପ୍ରତିଶତ ପୁରୁଷ ଓ ୫୦ପ୍ରତିଶତରୁ ଅଧିକ ମହିଳା ରକ୍ତହୀନତାରେ ପୀଡ଼ିତ ହେଉଛନ୍ତି। ଉଚ୍ଚ ରକ୍ତଚାପ, ପ୍ରି-ଡାଇବେଟିସ୍‌ ଏବଂ ଅନ୍ୟାନ୍ୟା ବିପଜ୍ଜନକ ସମସ୍ୟା ମଧ୍ୟ ଦେଖାଯାଉଛି, ଯାହା ପିଭିଟିଜି ସମ୍ପ୍ରଦାୟର ସ୍ବାସ୍ଥ୍ୟସେବା ବ୍ୟବସ୍ଥାକୁ ନେଇ ଚିନ୍ତା ବଢ଼ାଇଛି।
ଅନ୍ୟପକ୍ଷରେ ପିଭିଟିଜି ସମ୍ପ୍ରଦାୟରେ ଦୃଢ଼ ସାଂସ୍କୃତିକ ପରମ୍ପରା, ପ୍ରକୃତି ସହ ସମନ୍ବିତ ଜୀବନଶୈଳୀ ଏବଂ ପରିବାର ନିୟୋଜନ ପ୍ରତି ସଚେତନତା ବୃଦ୍ଧି ପରିଲକ୍ଷିତ ହୋଇଛି। ଉତ୍କଳ ବିଶ୍ୱବିଦ୍ୟାଳୟ କୁଳପତି ପ୍ରଫେସର ଚଣ୍ଡୀ ଚରଣ ନନ୍ଦ କହିଛନ୍ତି, ଅଧ୍ୟୟନରେ ସର୍ବେକ୍ଷଣଭୁକ୍ତ ସମ୍ପ୍ରଦାୟମାନଙ୍କ ମଧ୍ୟରେ ଦୃଢ଼ ସାଂସ୍କୃତିକ ପରମ୍ପରା ଓ ପରିବାର ନିୟୋଜନ ଏବଂ ପୋଷଣ କ୍ଷେତ୍ରରେ ସକାରାତ୍ମକ ପରିବର୍ତ୍ତନ ଦେଖାଯାଇଛି। ପରିବାର ନିୟୋଜନ ସଚେତନତା ୬୮ପ୍ରତିଶତରେ ପହଞ୍ଚିଛି । ତେବେ ଜୁଆଙ୍ଗ ଓ ଡଙ୍ଗରିଆ କନ୍ଧ ସମ୍ପ୍ରଦାୟରେ ପ୍ରସବ ପୂର୍ବ ସ୍ବାସ୍ଥ୍ୟସେବାର ଉତ୍ତମ ଆବରଣ ଦେଖାଯାଇଥିବାବେଳେ କିଛି ସମ୍ପ୍ରଦାୟରେ ପୋଷଣ ସୂଚକରେ ଆଂଶିକ ଉନ୍ନତି ପରିଲକ୍ଷିତ ହୋଇଛି।