ମିଳିବ ୩୦୦ ୟୁନିଟ୍ର ମାଗଣା ବିଜୁଳି; ଜାଣନ୍ତୁ କେମିତି କରିବେ ଏହି ସରକାରୀ ଯୋଜନାରେ ଆବେଦନ…
ନୂଆଦିଲ୍ଲୀ,୨୬।୬: ବର୍ତ୍ତମାନ ସମୟରେ ଗରମ ନିଜ ଚରମରେ ପହଞ୍ଚି ସାରିଛି । ମଝିରେ ମଝିରେ ବର୍ଷା ହେଉଥିଲେ ମଧ୍ୟ ଗରମ ଉପରେ କୌଣସି ପ୍ରକାରର ପ୍ରଭାବ ପଡୁଥିବା ଭଳି ଲାଗୁନାହିଁ । ଆଉ ଏହି ଭିଷଣ ଗରମ ମଧ୍ୟରେ ଘରେ ରହିଥିବା ଏସି-କୁଲର ଓ ଫ୍ରିଜ୍ ଭଳି ବୈଦୁତିକ ସାମଗ୍ରୀ ପ୍ରାୟ ଦିନରାତି ଚାଲୁ ରହିଛନ୍ତି । ଆଉ ଏହା ମଧ୍ୟରେ ବିଜୁଳି ବିଭାଗ ନିକଟରୁ ଘରକୁ ଆସୁଥିବା ମୋଟା ଅଙ୍କର ବିଜୁଳି ବିଲ୍ ଦେଖି ଅନେକ ଲୋକଙ୍କର ହାଲୁକ୍ ଶୁଖିଯାଉଛି ।
ତେବେ ଯେଉଁମାନଙ୍କ ଘରେ ସରକାରୀ ଯୋଜନା ପିଏମ୍ ସୂର୍ଯ୍ୟ ଘର ମାଗଣା ବିଜୁଳି ଯୋଜନା ଅଧିନରେ ଛାତ ଉପରେ ସୋଲାର କନେକ୍ସନ ନେିଛନ୍ତି ସେମାନଙ୍କ ପାଇଁ ଏହି ଚିନ୍ତା କରିବାର ଆବଶ୍ୟକତା ଆଉ ନାହିଁ । ଏହି ସ୍କିମ୍ ଅଧିନରେ ଅନେକ ଲୋକ ନିଜ ଘରେ ସୋଲାର କନେକ୍ସନ ନେଇ ଗରମ ଦିନମାନଙ୍କରେ ଘରେ ଶୋଇ ମାଗଣାରେ ଥଣ୍ଡାର ମଜା ନେଉଛନ୍ତି । କାରଣ ସେମାନଙ୍କୁ ୩୦୦ ୟୁନିଟ ବିଜୁଳି ମାଗଣାରେ ମିଳୁଛି ।
ପ୍ରଧାନମନ୍ତ୍ରୀ ସୂର୍ଯ୍ୟ ଘର ଯୋଜନା ୩୦୦ ୟୁନିଟ୍ ଯାଏ ମାଗଣା ବିଦ୍ୟୁତ୍ ପ୍ରଦାନ କରେ। ଏହାର ଅର୍ଥ ହେଉଛି ଆପଣ ବିଲ୍ ଚିନ୍ତା ନକରି ଆପଣଙ୍କର ଏସି, ରେଫ୍ରିଜରେଟର ଏବଂ କୁଲର ଚଲାଇପାରିବେ । ଏହା ବ୍ୟତୀତ, ଏହି ଯୋଜନା ଅଧୀନରେ ଆପଣଙ୍କ ଛାତ ଉପରେ ସୌର ପ୍ୟାନେଲ ସ୍ଥାପନ କରିବା ଦ୍ୱାରା କେନ୍ଦ୍ର ସରକାରଙ୍କ ଅଧିନରେ ୭୮ ହଜାର ଟଙ୍କା ପର୍ଯ୍ୟନ୍ତ ସରକାରୀ ସବସିଡି ମଧ୍ୟ ମିଳିଥାଏ । ଏପର୍ଯ୍ୟନ୍ତ, ସରକାର ହିତାଧିକାରୀମାନଙ୍କୁ ୧୭,୯୬୭.୫୩ କୋଟି ସବସିଡି ବଣ୍ଟନ କରିଛନ୍ତି ।
ସରକାରଙ୍କ ସୂର୍ଯ୍ୟ ଘର ମାଗଣା ବିଦ୍ୟୁତ୍ ଯୋଜନାରେ ମୋଟା ସବସିଡି ସହିତ ୩୦୦ ୟୁନିଟ୍ ମାଗଣା ବିଦ୍ୟୁତ୍ ପ୍ରଦାନ କରାଯାଏ । ସରକାରୀ ସବସିଡି ବିଷୟରେ କହିବାକୁ ଗଲେ, ୦-୧୫୦ ୟୁନିଟ୍ ବିଦ୍ୟୁତ୍ ପାଇଁ ୧-୨ କିଲୋୱାଟ୍ ସୌର ପ୍ୟାନେଲ୍ ସ୍ଥାପନ କଲେ ୩୦,୦୦୦-୬୦,୦୦୦ ଟଙ୍କାର ସବସିଡି ମିଳିପାରିବ । ଏହି ସମୟରେ, ୧୫୦-୩୦୦ ୟୁନିଟ୍ ବିଦ୍ୟୁତ୍ ବ୍ୟବହାର ପାଇଁ ଆବଶ୍ୟକ ୩ କିଲୋୱାଟ୍ କିମ୍ବା ତା’ଠାରୁ ବଡ଼ ପ୍ୟାନେଲ୍ ପାଇଁ ୬୦,୦୦୦-୭୮,୦୦୦ ଟଙ୍କାର ସବସିଡି ମିଳିଥାଏ ।
ଏହି ଯୋଜନା ପାଇଁ ଆବେଦନ କରିବା ପାଇଁ, ଆପଣଙ୍କୁ https://pmsuryaghar.gov.in ୱେବସାଇଟ୍ ପରିଦର୍ଶନ କରିବାକୁ ପଡିବ ଏବଂ ‘ରୁଫ୍ ଟପ୍ ସୋଲାର ପାଇଁ ଆବେଦନ କରନ୍ତୁ’ ବିକଳ୍ପ ବାଛିବାକୁ ପଡିବ । ଏହା ପରେ, ଆପଣଙ୍କୁ ରାଜ୍ୟ ବିଦ୍ୟୁତ ବଣ୍ଟନ କମ୍ପାନୀ ଚୟନ କରିବାକୁ ପଡିବ ଏବଂ ବିଦ୍ୟୁତ ଗ୍ରାହକ ନମ୍ବର, ମୋବାଇଲ ନମ୍ବର ଏବଂ ଇମେଲ୍ ପ୍ରବେଶ କରିବାକୁ ପଡିବ । ଗ୍ରାହକ ନମ୍ବର ଏବଂ ମୋବାଇଲ ନମ୍ବର ବ୍ୟବହାର କରି ଲଗଇନ୍ କରିବା ପରେ, ଆପଣଙ୍କୁ ଏକ ଫର୍ମ ପୂରଣ କରିବାକୁ ପଡିବ ଏବଂ ଏକ RTS ପ୍ୟାନେଲ ପାଇଁ ଆବେଦନ କରିବାକୁ ପଡିବ ।
