ଭାଜପାରେ ସାମିଲ ହେବେ କି ମହୁଆ? ଚମକାଇଲା ଭଳି ଜବାବ ଦେଲେ ଟିଏମସି ସାଂସଦ
କୋଲକାତା,୨୮।୬: ପଶ୍ଚିମବଙ୍ଗ ରାଜନୀତିରେ ଆଜିକାଲି ବେଶ୍ ହଲଚଲ ଦେଖିବାକୁ ମିଳୁଛି। ବିଧାନସଭା ନିର୍ବାଚନ ପରେ ଟିଏମସି (TMC) ରେ ବଡ଼ ଧରଣର ବିଭାଜନ ହେବାର ଖବର ସାମ୍ନାକୁ ଆସିଥିଲା। ଅନେକ ସାଂସଦ ଏବଂ ବିଧାୟକ ଦଳରୁ ଅଲଗା ହୋଇଯାଇଥିଲେ। ଏଭଳି ପରିସ୍ଥିତିରେ ମହୁଆ ମୋଇତ୍ରାଙ୍କୁ ନେଇ ମଧ୍ୟ ଚର୍ଚ୍ଚା ଜୋର ଧରିଥିଲା ଯେ ସେ ମଧ୍ୟ ଭାଜପାକୁ (BJP) ଯାଇପାରନ୍ତି। ଏହି ଅଟକଳକୁ ସେତେବେଳେ ଆହୁରି ଖୋରାକ ମିଳିଥିଲା ଯେତେବେଳେ ମହୁଆ ଶୁଭେନ୍ଦୁ ଅଧିକାରୀଙ୍କ ପ୍ରଶଂସା କରିଥିଲେ। ଏହାପରେ ରାଜନୈତିକ କରିଡରରେ ପ୍ରଶ୍ନ ଉଠିବାକୁ ଲାଗିଲା ଯେ କ’ଣ ମହୁଆ ମଧ୍ୟ ମମତା ବାନାର୍ଜୀଙ୍କଠାରୁ ଦୂରତା ରକ୍ଷା କରିପାରନ୍ତି।
ଏବେ ମହୁଆ ନିଜେ ଏହି ସବୁ ଚର୍ଚ୍ଚା ଉପରେ ଖୋଲାଖୋଲି ଭାବେ ଜବାବ ଦେଇଛନ୍ତି। ଏକ ସାକ୍ଷାତକାରରେ ଯେତେବେଳେ ତାଙ୍କୁ ପଚରାଗଲା ଯେ ସେ କେବେ ଭାଜପାକୁ ଯିବେ, ସେତେବେଳେ ସେ ସ୍ପଷ୍ଟ ଶବ୍ଦରେ ଏହି ସବୁ ଅଟକଳକୁ ଖାରଜ କରିଦେଇଥିଲେ।
ମହୁଆ କହିଛନ୍ତି ଯେ ରାଜନୀତିକୁ ଆସିବା ପାଇଁ ସେ ନିଜର ଯୁବ ବୟସ ଏବଂ ଜୀବନର ଏକ ବଡ଼ ଅଂଶ ଉତ୍ସର୍ଗ କରିଛନ୍ତି। ତାଙ୍କର ଉଦ୍ଦେଶ୍ୟ ହେଉଛି ଏଭଳି ଏକ ଭାରତ ପାଇଁ କାମ କରିବା ଯେଉଁଠାରେ ସବୁ ଧର୍ମର ଲୋକେ ଏକାଠି ରହିବେ। ଭାଜପାକୁ ଟାର୍ଗେଟ କହିଛନ୍ତି , ଦଳ ଦେଶରେ ସାମ୍ପ୍ରଦାୟିକତାକୁ ପ୍ରୋତ୍ସାହନ ଦେଇଛି। ମହୁଆ କହିଛନ୍ତି , ସେ ନିଜର ଶେଷ ନିଶ୍ୱାସ ପର୍ଯ୍ୟନ୍ତ ଏହାର ବିରୋଧ କରିବେ ଏବଂ ଯେପର୍ଯ୍ୟନ୍ତ ସେ ବଞ୍ଚିଥିବେ, ଭାଜପା ବିରୁଦ୍ଧରେ ଲଢ଼େଇ ଜାରି ରଖିବେ। ଏହି ସାକ୍ଷାତକାରରେ ମହୁଆ ଶୁଭେନ୍ଦୁ ଅଧିକାରୀଙ୍କ ସହ ନିଜର ପୁରୁଣା ସମ୍ପର୍କକୁ ମଧ୍ୟ ମନେ ପକାଇଥିଲେ। ସେ କହିଥିଲେ ଯେ ଯେତେବେଳେ ଦୁହେଁ ଗୋଟିଏ ଦଳରେ ଥିଲେ, ସେତେବେଳେ ଶୁଭେନ୍ଦୁ ତାଙ୍କୁ ବହୁତ ସାହାଯ୍ୟ କରିଥିଲେ।
