ବୁଣାକାର ପରିବାରର ପୁଅଙ୍କ ବଡ଼ ସଫଳତା: ନିଟ୍ ପରୀକ୍ଷାରେ କୃତକାର୍ଯ୍ୟ ପାଇଁ ଆଣିଲେ ଗୌରବ
ଅମରପାଲି, ୧୮।୭ (ପୀତାମ୍ବର ସାହୁ) : ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ କମିରା ପଞ୍ଚାୟତର ଆମ୍ବଶରଭଟା ଗ୍ରାମର ଯତୀନ ମେହେର ନିଟ୍ ୟୁଜି ପ୍ରବେଶିକା ପରୀକ୍ଷାରେ କୃତକାର୍ଯ୍ୟ ହୋଇ ଅଞ୍ଚଳ ପାଇଁ ଗୌରବ ଆଣିଛନ୍ତି। ଜଣେ ସାଧାରଣ ବୁଣାକାର ପରିବାରରୁ ଆସିଥିବା ଯତୀନ ସମୁଦାୟ ୭୨୦ ନମ୍ବରରୁ ୫୮୩ ନମ୍ବର ହାସଲ କରି ଅଲ ଇଣ୍ଡିଆ ରାଙ୍କ ୧୬ହଜାର ୫୮୭ ଅଧିକାର କରିଛନ୍ତି। ଯତୀନଙ୍କ ପିତା ଚୈତନ୍ୟ ମେହେର ଜଣେ ବୁଣାକାର ହୋଇଥିବାବେଳେ ମାତା ସୁମିତ୍ରା ମେହେର ଜଣେ ଗୃହିଣୀ। ସୀମିତ ଆର୍ଥିକ ସାମର୍ଥ୍ୟ ସତ୍ତ୍ୱେ ପରିବାରର ସହଯୋଗ ଓ ନିଜର ଅକ୍ଳାନ୍ତ ପରିଶ୍ରମ ବଳରେ ସେ ଏହି ସଫଳତା ହାସଲ କରିଛନ୍ତି।
ଯତୀନ ନିଜର ପ୍ରାଥମିକ ଶିକ୍ଷା ଗ୍ରାମ ବିଦ୍ୟାଳୟରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ସମାପ୍ତ କରିଥିଲେ। ପରେ ରଥପୁରସ୍ଥିତ ଓଡ଼ିଶା ଆଦର୍ଶ ବିଦ୍ୟାଳୟରୁ ହାଇସ୍କୁଲ ଶିକ୍ଷା ଶେଷ କରି ବଲାଙ୍ଗୀରର ଏକ ଘରୋଇ କଲେଜରୁ ଯୁକ୍ତ ଦୁଇ ବିଜ୍ଞାନରେ କୃତକାର୍ଯ୍ୟ ହୋଇଥିଲେ। ଗତ ଦୁଇ ବର୍ଷ ଧରି ବଲାଙ୍ଗୀରର ଏକ ଘରୋଇ କୋଚିଂ ପ୍ରତିଷ୍ଠାନରେ ନିଟ ପାଇଁ ପ୍ରସ୍ତୁତି ଚଳାଇଥିଲେ। ସଫଳତା ପଛରେ ଦୈନିକ ୧୦ରୁ ୧୧ ଘଣ୍ଟା ନିୟମିତ ଅଧ୍ୟୟନ ଓ କଠିନ ପରିଶ୍ରମ ରହିଥିବା ଯତୀନ କହିଛନ୍ତି। ଦ୍ୱିତୀୟ ପ୍ରୟାସରେ ସେ ଏହି ସଫଳତା ହାସଲ କରିଛନ୍ତି। ଏହି କୃତିତ୍ୱର ଶ୍ରେୟ ସେ ତାଙ୍କର ମାତାପିତା, ବଡ଼ ଭଉଣୀ, ସାଙ୍ଗସାଥି ଏବଂ ଶିକ୍ଷକମାନଙ୍କୁ ଦେଇଛନ୍ତି। ଏହା ସହିତ ସେ ଗତ ବର୍ଷ ଓଜେଇଇ ବିଫାର୍ମରେ ଓଡ଼ିଶା ଟପ୍ପର ହୋଇଥିଲେ ମଧ୍ୟ ଡାକ୍ତରୀ ପଢ଼ିବା ପାଇଁ ପୁଣି ନିଜକୁ ପ୍ରସ୍ତୁତ କରୁଥିଲେ। ଭବିଷ୍ୟତରେ ଜଣେ ଦକ୍ଷ ଡାକ୍ତର ହୋଇ ସମାଜର ସେବା କରିବାକୁ ଲକ୍ଷ୍ୟ ରଖିଥିବା ଯତୀନ କହିଛନ୍ତି ଯେ, “ଜୀବନରେ ସଫଳତା ପାଇବା ପାଇଁ କଠିନ ପରିଶ୍ରମ, ଆତ୍ମବିଶ୍ୱାସ ଓ ନିୟମିତ ଅଧ୍ୟୟନର କୌଣସି ବିକଳ୍ପ ନାହିଁ।” ତାଙ୍କର ଏହି ସଫଳତା ପରେ ପରିବାର, ଗ୍ରାମବାସୀ ଓ ଅଞ୍ଚଳବାସୀଙ୍କ ମଧ୍ୟରେ ଆନନ୍ଦର ପରିବେଶ ସୃଷ୍ଟି ହୋଇଛି।
Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
