ବୀମା ଟଙ୍କା ଲୋଭରେ ସ୍ତ୍ରୀ ଉପରେ ଗାଡ଼ି ଚଢାଇ ଦେଲେ ସ୍ବାମୀ

ହମ୍ମିରପୁର, ୩ା୮ (ଉତ୍ତର ପ୍ରଦେଶ): ୪୪ ଲକ୍ଷ ଟଙ୍କାର ବୀମା ରାଶି ହଡ଼ପ କରିବା ଲୋଭରେ ଜଣେ ସ୍ବାମୀ ନିଜ ସ୍ତ୍ରୀଙ୍କୁ ପିଟି ପିଟି ହତ୍ୟା କରିଛନ୍ତି। ଏହାପରେ ତାହାକୁ ଏକ ସଡ଼କ ଦୁର୍ଘଟଣାର ରୂପ ଦେବାକୁ ମୃତଦେହ ଉପରେ କାର୍‌ ଚଢ଼ାଇ ଦେଇଛନ୍ତି। ଉତ୍ତର ପ୍ରଦେଶର ହମ୍ମିରପୁର ଜିଲାରେ ଘଟିଥିବା ଏହି ଘଟଣାରେ ପୋଲିସ ମୁଖ୍ୟ ଅଭିଯୋଗକାରୀ ସ୍ବାମୀ ଅମର ସିଂ ଏବଂ ତାଙ୍କର ୩ ଜଣ ସହଯୋଗୀଙ୍କୁ ଗିରଫ କରି ଜେଲ୍‌କୁ ପଠାଇଛି।
ମୃତ ମହିଳାଙ୍କ ନାମ ହେଉଛି ରୀତା। ସେ ନିଖୋଜ ଥିବା ନେଇ ସ୍ବାମୀ ଅମର ସିଂହ ଥାନାରେ ଏକ ଏତଲା ଦେବାକୁ ଆସିଥିଲେ। ମାତ୍ର ପୋଲିସର ପଚରାଉଚରା ସମୟରେ ଅମରଙ୍କ କଥାରେ ଅସଙ୍ଗତି ଦେଖାଦେଇଥିଲା ଏବଂ ସେ ଛନ୍ଦି ହୋଇପଡ଼ିଥିଲେ। ପୋଲିସର ସନ୍ଦେହ ବଢ଼ିବାରୁ କଡ଼ା ଜେରା କରାଯିବାରୁ ଅମର ନିଜର ଦୋଷ ସ୍ବୀକାର କରିଥିଲେ। ଜେରା ବେଳେ ଅମର କହିଥିଲେ, ବୀମା ଟଙ୍କା ଲୋଭରେ ସେ ଓ ତାଙ୍କର ୩ ଜଣ ସହଯୋଗୀ ବାଡ଼ି ଏବଂ ଲାଠିରେ ପିଟି ପିଟି ରୀତାଙ୍କୁ ହତ୍ୟା କରିଥିଲେ। ଏହାପରେ ଘଟଣାକୁ ଦୁର୍ଘଟଣାର ରୂପ ଦେବା ପାଇଁ ମୃତଦେହ ଉପରେ କାର୍‌ ଚଢ଼ାଇ ଦେଇଥିଲେ। ଗୁରୁବାର ବିଳମ୍ବିତ ରାତିରେ ହମ୍ମିରପୁରର ଲାଲପୁର ଅଞ୍ଚଳରେ ଥିବା ବୈଠକା ଧାମ ମନ୍ଦିର ନିକଟରୁ ରୀତାଙ୍କ ମୃତଦେହ ଜବତ କରାଯାଇଥିଲା। ବ୍ୟବଚ୍ଛେଦ ରିପୋର୍ଟ ଅନୁଯାୟୀ, ରୀତାଙ୍କ ଶରୀରରେ ୧୨ରୁ ଅଧିକ ଗୁରୁତର ବାହ୍ୟ କ୍ଷତଚିହ୍ନ ରହିଛି। ଗାଡ଼ି ଚଢ଼ିଯିବା ଯୋଗୁ ତାଙ୍କ କିଡ୍‌ନୀକୁ ଛାଡ଼ି ବାକି ସମସ୍ତ ଅଙ୍ଗପ୍ରତ୍ୟଙ୍ଗ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା।
ରୀତାଙ୍କ ବାପା ସର୍ବେଶ କୁମାରଙ୍କ କହିବା ଅନୁଯାୟୀ, ୨୦୦୨ରେ ମୈନପୁରୀରେ ରୀତାଙ୍କର ପ୍ରଥମ ବିବାହ ହୋଇଥିଲା। ପ୍ରଥମ ସ୍ବାମୀଙ୍କ ମୃତ୍ୟୁ ପରେ ସେ ନିଜର ୩ ଝିଅ ଓ ଗୋଟିଏ ପୁଅ ସହ କାନପୁରର ଗୁଜୈନି ଅଞ୍ଚଳରେ ରହୁଥିଲେ। ସେଠାରେ ଫ୍ଲାୱାର ମିଲ୍‌ରେ କାମ କରୁଥିବା ଅମର ସିଂହଙ୍କ ସହ ତାଙ୍କର ଦେଖାହୋଇଥିଲା ଏବଂ ୨ ବର୍ଷ ପୂର୍ବେ ସେ ଅମରଙ୍କୁ ବିବାହ କରିଥିଲେ। ୨ ମାସ ପୂର୍ବରୁ ରୀତାଙ୍କ ନାଁରେ ଅମର ୪୪ ଲକ୍ଷ ଟଙ୍କାର ଏକ ଲାଇଫ୍‌ ଇନ୍‌ସୁରାନ୍ସ ପଲିସି କରିଥିଲେ ଏବଂ ଏଥିପାଇଁ ପ୍ରଥମ କିସ୍ତି (ପ୍ରିମିୟମ) ବାବଦକୁ ୨.୬୦ ଲକ୍ଷ ଟଙ୍କା ମଧ୍ୟ ଜମା କରିଥିଲେ। ହମ୍ମିରପୁରର ଅତିରିକ୍ତ ପୋଲିସ ସୁପରିଣ୍ଟେଣ୍ଡେଣ୍ଟ (ଏଏସ୍‌ପି) ଅରବିନ୍ଦ କୁମାର ବର୍ମା କହିଛନ୍ତି, ସମସ୍ତ ଅଭିଯୁକ୍ତଙ୍କୁ ଗିରଫ କରାଯାଇ ଜେଲ୍‌କୁ ପଠାଯାଇଛି। ବର୍ତ୍ତମାନ ରୀତାଙ୍କ ୪ ସନ୍ତାନ ମୈନପୁରୀରେ ସେମାନଙ୍କ ଜେଜେବାପା-ଜେଜେମା’ଙ୍କ ପାଖରେ ରହୁଛନ୍ତି।