ପ୍ରଥମ ଥର ଗଜାନନ ବେଶ ଧାରଣ କଲେ ଶ୍ରୀଜଗନ୍ନାଥ: ନୂତନ ସ୍ନାନମଣ୍ଡପ ପ୍ରତିଷ୍ଠା
ଦାରିଙ୍ଗବାଡି, ୨୯।୬ (ଅରୁଣ ସାହୁ): ପବିତ୍ର ସ୍ନାନଯାତ୍ରା ଅବସରରେ ଶ୍ରୀକ୍ଷେତ୍ର ପୁରୀ ସମେତ ସମଗ୍ର ରାଜ୍ୟରେ ଶ୍ରୀଜଗନ୍ନାଥଙ୍କ ସ୍ନାନଯାତ୍ରା ଭକ୍ତିଭାବର ସହ ପାଳିତ ହେଉଥିବା ବେଳେ କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅନ୍ତର୍ଗତ ସିମନବାଡି ପତିତପାବନ ମନ୍ଦିରରେ ମଧ୍ୟ ବଡ଼ ଆଡ଼ମ୍ବରର ସହ ଶ୍ରୀଜଗନ୍ନାଥଙ୍କ ସ୍ନାନଯାତ୍ରା ଓ ଗଜାନନ ବେଶ ଅନୁଷ୍ଠିତ ହୋଇଯାଇଛି। ବିଶେଷ କଥା ହେଲା, ଏହି ମନ୍ଦିରରେ ପ୍ରଥମ ଥର ପାଇଁ ମହାପ୍ରଭୁ ଗଜାନନ ବେଶ ଧାରଣ କରିଥିବାରୁ ଭକ୍ତମାନଙ୍କ ମଧ୍ୟରେ ବେଶ ଉତ୍ସାହ ଦେଖିବାକୁ ମିଳିଥିଲା।
ଏହି ଅବସରରେ ମନ୍ଦିର ପରିସରରେ ନିର୍ମିତ ନୂତନ ସ୍ନାନମଣ୍ଡପର ମଧ୍ୟ ପ୍ରତିଷ୍ଠା କରାଯାଇଥିଲା। ସ୍ନାନଯାତ୍ରା ପୂର୍ବରୁ ପୂଜକ ସତ୍ୟନାରାୟଣ ପଣ୍ଡାଙ୍କ ଦ୍ୱାରା ବୈଦିକ ରୀତିନୀତି, ପୂଜାର୍ଚ୍ଚନା ଓ ହୋମଯଜ୍ଞ ସହ ସ୍ନାନମଣ୍ଡପ ପ୍ରତିଷ୍ଠା ସମ୍ପନ୍ନ ହୋଇଥିଲା। ଏହି ପବିତ୍ର କାର୍ଯ୍ୟରେ ବରୁଣ ପାତ୍ର କର୍ତ୍ତା ଭାବେ ଦାୟିତ୍ୱ ନିର୍ବାହ କରିଥିଲେ।
ମଣ୍ଡପ ପ୍ରତିଷ୍ଠା ପରେ ମହାପ୍ରଭୁ ଶ୍ରୀଜଗନ୍ନାଥଙ୍କୁ ସ୍ନାନମଣ୍ଡପକୁ ପାହାଣ୍ଡି କରାଯାଇ ସମସ୍ତ ବିଧିବିଧାନ ଅନୁଯାୟୀ ପୂଜାର୍ଚ୍ଚନା ଓ ପବିତ୍ର ସ୍ନାନ ବିଧି ସମ୍ପନ୍ନ କରାଯାଇଥିଲା। ପରବର୍ତ୍ତୀ ସମୟରେ ଦାରିଙ୍ଗବାଡିର ଯୁବ ଡିଜିଟାଲ କଳାକାର ନିହାର ରଞ୍ଜନ ସାହୁଙ୍କ ଦ୍ୱାରା ଅତ୍ୟନ୍ତ ସୁନ୍ଦର ଓ ନିଖୁଣ ଭାବେ ପ୍ରସ୍ତୁତ ଗଜାନନ ବେଶରେ ମହାପ୍ରଭୁଙ୍କୁ ସଜ୍ଜିତ କରାଯାଇଥିଲା। ଏହି ମନୋରମ ବେଶ ପ୍ରଥମ ଥର ପାଇଁ ସିମନବାଡି ପତିତପାବନ ମନ୍ଦିରରେ କରାଯାଇଥିବାରୁ ଏହା ଶ୍ରଦ୍ଧାଳୁଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲା।
ଗଜାନନ ବେଶ ଦର୍ଶନ ପାଇଁ ସିମନବାଡି ସମେତ ଦାରିଙ୍ଗବାଡି, ଶ୍ରାନିକେତା, କିରିକୁଟି, ତିଲୋରୀ ଓ ଆଖପାଖ ଅଞ୍ଚଳରୁ ବହୁ ସଂଖ୍ୟାରେ ଭକ୍ତମାନେ ମନ୍ଦିରକୁ ଆସିଥିଲେ। ସେମାନେ ମହାପ୍ରଭୁଙ୍କ ଅଲୌକିକ ଗଜାନନ ବେଶ ଦର୍ଶନ କରି ଆଧ୍ୟାତ୍ମିକ ଆନନ୍ଦ ଲାଭ କରିବା ସହ ଏହି ସୁନ୍ଦର ବେଶ ପ୍ରସ୍ତୁତ କରିଥିବା ଯୁବ କଳାକାର ନିହାର ରଞ୍ଜନ ସାହୁଙ୍କୁ ଭୂୟସୀ ପ୍ରଶଂସା କରିଥିଲେ।
ସମଗ୍ର କାର୍ଯ୍ୟକ୍ରମକୁ ସିମନବାଡି ପତିତପାବନ ମନ୍ଦିର ଓ ରଥଯାତ୍ରା କମିଟିର ସଭାପତି ପ୍ରଦୀପ ସାହୁଙ୍କ ନେତୃତ୍ୱରେ ଆଶୁତୋଷ ସାହୁ, କେଦାରନାଥ ସାହୁ, ମହେଶ ସାହୁ, ଉତ୍ତମ ପୂଜାରୀ ଓ ଅନ୍ୟାନ୍ୟ କର୍ମକର୍ତ୍ତାମାନେ ସୁଚାରୁରୂପେ ପରିଚାଳନା କରିଥିଲେ। ଭକ୍ତମାନଙ୍କ ଭିଡ଼ ଏବଂ ଭକ୍ତିମୟ ପରିବେଶ ଯୋଗୁଁ ସମଗ୍ର ସିମନବାଡି ଅଞ୍ଚଳ ଉତ୍ସବମୁଖର ହୋଇଉଠିଥିଲା।
