ପରିବେଶ ସୁରକ୍ଷାରେ ଉତ୍ସର୍ଗୀକୃତ ଦମ୍ପତି ସଙ୍ଗୀତା-ସତ୍ୟଜିତ: ୩୦୦ରୁ ଅଧିକ ଘରଚଟିଆ ସଂରକ୍ଷଣ

ଅମରପାଲି,୪ା୭(ପୀତାମ୍ବର ସାହୁ):ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକ ଅନ୍ତର୍ଗତ କୋଟସମଲାଇ ପଞ୍ଚାୟତର ଖଜୁରିଆପାଲି ଗ୍ରାମର ସ୍ବାମୀସ୍ତ୍ରୀ ସତ୍ୟଜିତ ଗଡୁଆ ଓ ସଙ୍ଗୀତା ପାତ୍ର ପରିବେଶ ସୁରକ୍ଷା ଏବଂ ବନ୍ୟପ୍ରାଣୀ ସଂରକ୍ଷଣ କ୍ଷେତ୍ରରେ ନିଷ୍ଠାର ସହ କାର୍ଯ୍ୟ କରି ସମସ୍ତଙ୍କ ପାଇଁ ପ୍ରେରଣା ପାଲଟିଛନ୍ତି। ପ୍ରକୃତି ସୁରକ୍ଷାକୁ ଜୀବନର ବ୍ରତ ଭାବେ ଗ୍ରହଣ କରିଥିବା ଏହି ଦମ୍ପତି ବିଭିନ୍ନ ଅଭିନବ ପଦକ୍ଷେପ ମାଧ୍ୟମରେ ପରିବେଶ ସଚେତନତାର ବାର୍ତ୍ତା ପହଞ୍ଚାଇ ଆସୁଛନ୍ତି। ବିଲୁପ୍ତପ୍ରାୟ ଘରଚଟିଆ ପକ୍ଷୀର ସଂରକ୍ଷଣ ପାଇଁ ସେମାନେ ବିଶେଷ ପ୍ରୟାସ କରୁଛନ୍ତି। ବର୍ତ୍ତମାନ ସୁଦ୍ଧା ୩୦୦ରୁ ଅଧିକ ଘରଚଟିଆକୁ ସଂରକ୍ଷଣ କରି ସେମାନଙ୍କ ପାଇଁ ବାସସ୍ଥାନ, ଖାଦ୍ୟ, ଚାଉଳ, ଖୁଦ ଓ ପାନୀୟ ଜଳର ବ୍ୟବସ୍ଥା କରି ଆସୁଛନ୍ତି। ଏହାସହ କ୍ଷତାକ୍ତ ପକ୍ଷୀ ଓ ବନ୍ୟପ୍ରାଣୀଙ୍କୁ ଉଦ୍ଧାର କରି ଚିକିତ୍ସା ପରେ ପୁଣି ଜଙ୍ଗଲରେ ଛାଡ଼ିବା, ଗ୍ରୀଷ୍ମଦିନରେ ଜଙ୍ଗଲ ମଧ୍ୟରେ ମାଟି ପାତ୍ରରେ ପ୍ରତିଦିନ ପାଣି ଯୋଗାଇବା, ଜଙ୍ଗଲରେ ଅଗ୍ନିକାଣ୍ଡ ସମୟରେ ନିଅଁା ଲିଭାଇବା ସହ ଲୋକଙ୍କୁ ସଚେତନ କରିବା ଏବଂ ଅଗ୍ନି ନିରୋଧକ ରେଖା ପ୍ରସ୍ତୁତ କରିବା ଭଳି କାର୍ଯ୍ୟରେ ସେମାନେ ସକ୍ରିୟ ଭାବେ ଜଡ଼ିତ ଅଛନ୍ତି। ଏଥିସହ ସେମାନେ ଚାରାରୋପଣ, ଔଷଧୀୟ ଗଛର ସଂରକ୍ଷଣ ଏବଂ ମଞ୍ଜି ଗୋଲା ପ୍ରସ୍ତୁତ କରି ବର୍ଷା ଋତୁରେ ଖୋଲା ସ୍ଥାନରେ ପକାଇ ନୂତନ ଜଙ୍ଗଲ ସୃଷ୍ଟି ପାଇଁ ମଧ୍ୟ ନିରନ୍ତର ପ୍ରୟାସ କରୁଛନ୍ତି। ଏହାସହ ଉଭୟ ସ୍ବାମୀସ୍ତ୍ରୀ ନିଶା ନିବାରଣ ସଚେତନତା, ସ୍ବଚ୍ଛତା କାର୍ଯ୍ୟକ୍ରମ, ବାଲ୍ୟ ବିବାହ ସଚେତନତା କାର୍ଯ୍ୟକ୍ରମ, ଯୋଗ ଶିକ୍ଷା ପ୍ରଦାନ, ବୃକ୍ଷର ଯତ୍ନ ଓ ସୁରକ୍ଷା ପାଇଁ ରକ୍ଷା ବନ୍ଧନ କରି ସଚେତନ କରିଥାନ୍ତି। ସେମାନଙ୍କ ଏହି ଉଲ୍ଲେଖନୀୟ ଅବଦାନ ପାଇଁ ସତ୍ୟଜିତ ଗଡୁଆଙ୍କୁ ଦୈନିକ ’ଧରିତ୍ରୀ’ ପକ୍ଷରୁ ପରିବେଶପ୍ରେମୀ ଭାବେ ମାନପତ୍ର ଦେଇ ସମ୍ମାନିତ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ବିଭାଗ ପକ୍ଷରୁ ବିଜୁ ପଟ୍ଟନାୟକ ବନ୍ୟପ୍ରାଣୀ ସଂରକ୍ଷଣ ପୁରସ୍କାର, ପ୍ରକୃତି ବନ୍ଧୁ ସମ୍ମାନ ଏବଂ ୱର୍ଲଡ ଚ୍ୟାରିଟି ଫାଉଣ୍ଡେଶନ ପକ୍ଷରୁ ଲାଇଫ ଟାଇମ ଆଚିଭମେଣ୍ଟ ଆୱାର୍ଡ ପ୍ରଦାନ କରାଯାଇଛି। ସେହିପରି ସଙ୍ଗୀତା ପାତ୍ର ମୁଖ୍ୟମନ୍ତ୍ରୀ ବନ୍ୟପ୍ରାଣୀ ସଂରକ୍ଷଣ ପୁରସ୍କାର ହାସଲ କରିଛନ୍ତି। ଦମ୍ପତିଙ୍କୁ ସୁବର୍ଣ୍ଣପୁର ଜିଲାପାଳ ମଧ୍ୟ ସମ୍ବର୍ଦ୍ଧିତ କରିଛନ୍ତି। ପରିବେଶ ଓ ବ୍ଯଯପ୍ରାଣୀ ସୁରକ୍ଷା ପାଇଁ ସେମାନଙ୍କର ନିଷ୍ଠା, ସମର୍ପଣ ଓ ନିରନ୍ତର ସେବାଭାବ ଆଜି ସେମାନଙ୍କୁ ସମାଜରେ ଏକ ସ୍ବତନ୍ତ୍ର ପରିଚୟ ଦେଇଛି। ଦମ୍ପତିଙ୍କ ଏହି ମହତ ପ୍ରୟାସକୁ ସବୁ ମହଲରୁ ଉଚ୍ଚ ପ୍ରଶଂସା କରାଯାଉଛି।

The post ପରିବେଶ ସୁରକ୍ଷାରେ ଉତ୍ସର୍ଗୀକୃତ ଦମ୍ପତି ସଙ୍ଗୀତା-ସତ୍ୟଜିତ: ୩୦୦ରୁ ଅଧିକ ଘରଚଟିଆ ସଂରକ୍ଷଣ appeared first on Dharitri Odia News.