ଘୁଙ୍ଗିଯୋର ପୋଲ ଉପରେ ୫ ଫୁଟ ବନ୍ୟାଜଳ: ବୀରମହାରାଜପୁର–ଅମରପାଲି ଯୋଗାଯୋଗ ବିଚ୍ଛିନ୍ନ

ଅମରପାଲି, ୨୬।୭ (ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ମୁର୍ଷୁଣ୍ଢୀ ପଞ୍ଚାୟତର ଭୂତିଆପାଲି ଏବଂ ଲୁତୁରପଙ୍କ ପଞ୍ଚାୟତର ମେଣ୍ଡିଲିପାଲି ମଧ୍ୟରେ ପ୍ରବାହିତ ଘୁଙ୍ଗିଯୋରରେ ବନ୍ୟାଜଳ ଆସିଛି। ଫଳରେ ଘୁଙ୍ଗିଯୋର ପୋଲ ଉପରେ ପ୍ରାୟ ୫ ଫୁଟ ଉଚ୍ଚତାରେ ବନ୍ୟାଜଳ ପ୍ରବାହିତ ହେଉଛି। ଏହା ଯୋଗୁ ବୀରମହାରାଜପୁର–ଅମରପାଲି ମଧ୍ୟରେ ସଡ଼କ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି।

ଗତକାଲି ରାତିସାରା ଲଗାଣ ବର୍ଷା ଯୋଗୁ ସମଗ୍ର ଅଞ୍ଚଳ ଜଳମଗ୍ନ ହୋଇପଡ଼ିଛି। ଛୋଟ ଛୋଟ ନାଳ ଓ ଜଳାଶୟଗୁଡ଼ିକ ଫୁଲି ଉଠିଥିବା ବେଳେ ଉଛୁଳା ପାଣି ସହ ବିଭିନ୍ନ ନାଳର ଜଳ ଘୁଙ୍ଗିଯୋରରେ ମିଶିବା ଫଳରେ ଏଭଳି ପରିସ୍ଥିତି ସୃଷ୍ଟି ହୋଇଛି।ପୋଲ ଉପରେ ବନ୍ୟାଜଳ ପ୍ରବାହିତ ହେଉଥିବାରୁ ସମସ୍ତ ପ୍ରକାର ଯାତାୟାତ ବାଧାପ୍ରାପ୍ତ ହୋଇଛି। ପୋଲର ଉଭୟ ପାର୍ଶ୍ୱରେ ବହୁ ଗାଡ଼ିମୋଟର ଅଟକି ରହିଥିବା ଦେଖିବାକୁ ମିଳିଛି।

ମୁର୍ଷୁଣ୍ଢୀରୁ ସମ୍ବଲପୁରକୁ ଚଳାଚଳ କରୁଥିବା ବସ୍ ସମେତ ସୋନପୁର–ରେଢାଖୋଲ, ରେଢାଖୋଲ–ସୋନପୁର ଏବଂ ବୀରମହାରାଜପୁର–ଅମରପାଲି–ଦୁର୍ଜନତୈଲା ରୁଟରେ ଚଳାଚଳ କରୁଥିବା ‘ମୁଖ୍ୟମନ୍ତ୍ରୀ ବସ୍ ସେବା’ ସମ୍ପୂର୍ଣ୍ଣ ବନ୍ଦ ରହିଛି।ଏହାଫଳରେ ଦୈନନ୍ଦିନ ଯାତାୟାତ, ବ୍ୟବସାୟ ଏବଂ ଜରୁରୀ କାମରେ ଯାଉଥିବା ଲୋକମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସ୍ଥାନୀୟ ଲୋକେ ପରିସ୍ଥିତି ସ୍ୱାଭାବିକ ହେବା ଏବଂ ବନ୍ୟାଜଳ କମିବାକୁ ଅପେକ୍ଷା କରି ରହିଛନ୍ତି।