ଗୁଣ୍ଡିଚା ମନ୍ଦିର ସମ୍ମୁଖରେ ଲାଗିଲା ତିନି ରଥ

ପୁରୀ : ଗୁଣ୍ଡିଚା ମନ୍ଦିର ସମ୍ମୁଖରେ ଲାଗିଲା ତିନି ରଥ। ଗତକାଲି ବଡଦାଣ୍ଡରେ ଅଟକ ରହିଥିବା ତିନି ରଥକୁ ଆଜି ସକାଳେ ପୁଣି ଟଣା ଯାଇଥିଲା। ପରମ୍ପରା ଅନୁସାରେ ତିନି ରଥରେ ପ୍ରଥମେ ମଙ୍ଗଳ ଆଳତି ନୀତି କରାଯାଥିଲା। ଏହା ପରେ ରଥ ଉପରେ ଶ୍ରୀଜିଉଙ୍କ ବେଶ କରାଯାଇ ତଡପ ଲାଗି ନୀତି ଅନୁଷ୍ଠିତ ହୋଇଥିଲା। ପରେ ରଥ ଉପରେ ଅବକାଶ ପୂଜା କରାଯିବା ସହ ମାର୍କେଟ ଛକ ନିକଟରେ ଅଟକି ଥିବା ବଳଭଦ୍ରଙ୍କ ରଥକୁ ଟଣା ଯାଇଥିଲା। ଏହା ପରେ ମା ସୁଭଦ୍ରାଙ୍କ ରଥକୁ ଟାଣି ନେଇଥିଲେ ଭକ୍ତ। ଶେଷରେ ସିଂହଦ୍ୱାର ନିକଟରେ ଅଟକି ଥିବା ନନ୍ଦିଘୋଷ ରଥକୁ ଭକ୍ତ ମାନେ ଟାଣି ଆଣି ଥିଲେ। ଦିନ ସାଢ଼େ ୧୨ଟାରେ ତାଳଧ୍ଵଜ ରଥ ଗୁଣ୍ଡିଚା ମନ୍ଦିର ସମ୍ମୁଖରେ ପହଞ୍ଚିଥିଲା। ଏହାପରେ ଦିନ ଗୋଟାଏ ୭ରେ ମା ସୁଭଦ୍ରାଙ୍କ ଦର୍ପଦଳନ ରଥ ପହଞ୍ଚିଥିଲା। କାଳିଆ ଠାକୁରଙ୍କ ନନ୍ଦିଘୋଷ ରଥ ଧୀରେ ଧୀରେ ଗୁଣ୍ଡିଚା ମନ୍ଦିର ଆଡ଼କୁ ଅଗ୍ରସର ହୋଇଥିବା ବେଳେ, ଦିନ ୨ଟା ୪୫ରେ ଶ୍ରୀଗୁଣ୍ଡିଚା ମନ୍ଦିର ନିକଟରେ ଲାଗିଥିଲା। ତିନି ରଥ ଗୁଣ୍ଡିଚା ମନ୍ଦିରରେ ଲାଗିବା ପରେ ବିଧି ଅନୁସାରେ ରଥ ଉପରେ ଶ୍ରୀବିଗ୍ରହଙ୍କର ଦୈନନ୍ଦିନ ନୀତି ଅନୁଷ୍ଠିତ ହେବ। ଅନ୍ୟ ପକ୍ଷରେ ଆସନ୍ତାକାଲି ଗୁଣ୍ଡିଚା ମନ୍ଦିରର ଆଡପ ମଣ୍ଡପକୁ ବିଜେ ନୀତି ଅନୁଷ୍ଠିତ ହେବା ନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି।