ଗାଁ ଗାଁ ବୁଲି ଆବର୍ଜନା ସଂଗ୍ରହ କରୁଛନ୍ତି ମଞ୍ଜୁଲତା, ସାଉଁଟୁଛନ୍ତି ପ୍ରଶଂସା

ପାଟଣା,୨ା୮(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକର ମୂଷାଖୋରୀ ପଞ୍ଚାୟତ ମୂଷାଖୋରୀ ଗ୍ରାମର କାଶିଆ ସାହିର ମଞ୍ଜୁଲତା ମହାନ୍ତ ସ୍ବଚ୍ଛ ଭାରତ ମିଶନର ଜଣେ ପ୍ରକୃତ ସାରଥୀ ଏବଂ ମୂର୍ତ୍ତିମନ୍ତ ପ୍ରତୀକ।
ବର୍ଷା, ଖରା କିମ୍ବା ଶୀତ କାକର କୌଣସି ପ୍ରତିକୂଳ ପରିସ୍ଥିତିକୁ ଖାତିର ନ କରି ସେ ପ୍ରତିଦିନ ନିଜେ ତିନି ଚକିଆ ସ୍ବଚ୍ଛତା ଗାଡ଼ି ଚଳାଇ ମଲ୍ଲୀପଶି ମାର୍କେଟଠାରୁ ଆରମ୍ଭ କରି ମୂଷାଖୋରୀ ଗ୍ରାମ ପଞ୍ଚାୟତର ସମସ୍ତ ଗାଁକୁ ଗାଁ ବୁଲି ବୁଲି ଅଳିଆ-ଆବର୍ଜନା ସଂଗ୍ରହ କରନ୍ତି। ତାଙ୍କର ଏହି ସମର୍ପିତ ସେବା ଫଳରେ ପରିବେଶ ସ୍ବଚ୍ଛ ଓ ସୁନ୍ଦର ରହିବା ସହ ସେ ଚର୍ଚ୍ଚିତ ହୋଇଛନ୍ତି। ଏହି କାର୍ଯ୍ୟକୁ ସେ କେବଳ ଚାକିରି ଭାବରେ ନୁହେଁ, ବରଂ ସମାଜସେବାର ଏକ ପବିତ୍ର ଦାୟିତ୍ୱବୋଧ ଭାବେ ଗ୍ରହଣ କରି ଆନନ୍ଦର ସହ କରିଆସୁଛନ୍ତି। ପ୍ରଚାର, ପ୍ରସାର କିମ୍ବା ଫଟୋ ଉଠାଇ ପ୍ରଶଂସା ସାଉଁଟିବାଠାରୁ ସେ ସଦା ସର୍ବଦା ଦୂରରେ ରହି ନିରବିଚ୍ଛିନ୍ନ ଭାବେ ସ୍ବଚ୍ଛ ଭାରତ ଅଭିଯାନକୁ ସଫଳ କରିବାରେ ନିଜକୁ ସମର୍ପିତ କରିଛନ୍ତି। ଏହି କାରଣରୁ ସେ ଆଜି ସ୍ବଚ୍ଛ ଭାରତ ମିଶନର ଜଣେ ପ୍ରକୃତ ବ୍ରାଣ୍ଡ ଆମ୍ବାସାଡର ଭାବେ ପରିଚିତ।
ତାଙ୍କର ଏହି ଅସାଧାରଣ ସେବା ଓ ସମର୍ପଣକୁ ସ୍ବୀକୃତି ପୂର୍ବକ ସମ୍ମାନ ଜଣାଇ ଆଗାମୀ ପବିତ୍ର ସ୍ବାଧୀନତା ଦିବସ ଅବସରରେ ପାଟଣା ବ୍ଲକ ସ୍ତରୀୟ ସ୍ବାଧୀନତା ଦିବସ ପାଳନ କମିଟି ପକ୍ଷରୁ ତାଙ୍କୁ ସମ୍ବର୍ଦ୍ଧିତ କରିବା ପାଇଁ ନିଷ୍ପତ୍ତି ଗ୍ରହଣ କରାଯାଇଛି। ଆଧୁନିକ ତଥାକଥିତ ମହିଳା ସମାଜ ପାଇଁ ସେ ନିଶ୍ଚୟ ଏକ ପ୍ରେରଣା।