ଅନ୍ଧାରରେ ପାଙ୍ଗାଲି ଗ୍ରାମବାସୀ, ଆନ୍ଦୋଳନ ପାଇଁ ନିଷ୍ପତ୍ତି ନେଇ କହିଲେ…

Jul 03, 2026 - 15:44

ଦାରିଙ୍ଗବାଡ଼ି,୩ା୭(ଅରୁଣ ସାହୁ): ଦିନେ କି ଦୁଇ ଦିନ ନୁହଁ ଗତ ୪ ଦିନ ବିତିଲା ଏକ ଅନୁସୂଚିତ ଜନଜାତି ବସବାସ କରୁଥିବା ଦୁର୍ଗମ ଗ୍ରାମ ଅନ୍ଧାରରେ ରହିଛି ଏହାକୁ ନେଇ ଗାଁରେ ବସବାସ କରୁଥିବା ଜନଜାତି ଉପଭୋକ୍ତା ଶୁକ୍ରବାର ପୂର୍ବାହ୍ନରେ ବୈଠକ କରି ଶନିବାର ରାଜରାସ୍ତାକୁ ଓହ୍ଲାଇବାକୁ ନିଷ୍ପତ୍ତି ନେଇଛନ୍ତି। ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ୍‌ ତିଲୋରୀ ପଞ୍ଚାୟତର ଦୁର୍ଗମ ପାଙ୍ଗାଲି ଗ୍ରାମରେ। ଗାଁରେ ଗତ ୩୦ ମଙ୍ଗଳବାର ପୂର୍ବାହ୍ନ ୧୧ଟାରୁ ବିଦ୍ୟୁତ୍‌ ଅଚଳ ହୋଇପଡିଛି ଯେ ଆଜକୁ ୪ ଦିନ ବିତିଯାଇଥିଲେ ମଧ୍ୟ ମରାମତି କାର୍ଯ୍ୟ ହୋଇନାହିଁ।

ଏନେଇ ଗ୍ରାମର ସମାଜସେବୀ ସାବତ ପ୍ରଧାନ, ତିଲୋରୀ ପଞ୍ଚାୟତର ପୂର୍ବତନ ସମିତିସଭ୍ୟ ଇନ୍ଦ୍ରଜିତ ପ୍ରଧାନ ପ୍ରମୁଖ ଟୋଲ ଫ୍ରି ଏବଂ ହ୍ବାଟ୍ସଆପ୍‌ରେ ବିଭାଗକୁ ଅବଗତ କରାଇଥିଲେ ମଧ୍ୟ କିଛି ସୁଫଳ ମିଳି ନ ଥିବା ଗ୍ରାମବାସୀ ପକ୍ଷରୁ ଅଭିଯୋଗ ହୋଇଛି। ସେହିପରି ବିଭାଗୀୟ ଅଧିକାରୀଙ୍କୁ ମଧ୍ୟ ବାରମ୍ବାର ଫୋନ୍‌ରେ ଜଣାଇବାକୁ ଗ୍ରାମର ଉପଭୋକ୍ତାମାନେ ପ୍ରୟାସ କରିଥିଲେ ମଧ୍ୟ ଫୋନ୍‌ କେହି ରିସିଭ କରୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏନେଇ ଶୁକ୍ରବାର ବୈଠକରେ ନିଷ୍ପତ୍ତି ନେଇଛନ୍ତି ଯେ, ଆଜି ସନ୍ଧ୍ୟା ସୁଦ୍ଧା ବିଦ୍ୟୁତ୍‌ ସେବା ସ୍ବାଭାବିକ ନହେଲେ ଶନିବାର ସକାଳଠାରୁ ଗ୍ରାମର ଶତାଧିକ ଲୋକ ରାଜରାସ୍ତାକୁ ଓହ୍ଲାଇବେ। ଯାହାବି ଆଇନଶୃଙ୍ଖଳା ପରିସ୍ଥିତି ବିଗିଡ଼ିବ ସେଥିପାଇଁ ବିଭାଗ ଦାୟୀ ବୋଲି ଯୁବ ସମାଜସେବୀ ସାବତ ପ୍ରଧାନ ଚେତାବନୀ ଦେଇଛନ୍ତି। ଏନେଇ ଦାରିଙ୍ଗବାଡ଼ି ବିଦ୍ୟୁତ୍‌ ବିଭାଗର ସହକାରୀ ଯନ୍ତ୍ରୀ ଶିବପ୍ରସାଦ ନାୟକଙ୍କ ପ୍ରତିକ୍ରିୟା ନିଆଯାଇଥିଲା। ସେ ଏ ସମ୍ପର୍କରେ କୌଣସି ଅଭିଯୋଗ ପାଇ ନ ଥିବା ଓ ସେହି ଅଞ୍ଚଳରେ ବିଦ୍ୟୁତ ମରାମତି କାର୍ଯ୍ୟ ନିୟମିତ କରାଯାଉଥିବା କହିବା ସହ ତାଙ୍କ କର୍ମଚାରୀଙ୍କ ସହ ଆଲୋଚନା କରି ପାଙ୍ଗାଲି ଲୋକଙ୍କ ସମସ୍ୟା ସମାଧାନ କରାଯିବ ବୋଲି କହିଛନ୍ତି।